Read Fulfulde Zekariya 14 Bible Online

Zekariya 14 - Fulfulde bible

Zekariya 14

¹Ndaa, nyalaade Jawmiraawo ɗon wara, onon jooɗiiɓe haa Urusaliima. Ɓe cenndan mardi mon yeeso mooɗon.

²Jawmiraawo mooɓtan yimɓe ummaatooje fuu haa Urusaliima ngam konu. Ɓe nyaama berniwol, ɓe mbila cuuɗi, ɓe toskina rewɓe. Reeta jooɗiiɓe nder berniwol ɓe ndaheteeɓe, ammaa luttanɓe nattataa nder berniwol.

³Nden Jawmiraawo wurtoto, haɓan bee ummaatooje ɗe'e, bana o woowri haɓugo nder nyalaade haɓre.

⁴Nyalaade man kosɗe maako ndaroto dow Hooseere Jaytunje, kommbi Urusaliima, gal fuunaaŋge. Hooseere Jaytunje seekan caka cak, waadiwol maŋngol masin waŋgan gal fuunaaŋge dilla hiirnaaŋge. Reeta hooseere daayoto gal woyla, reeta feere boo gal fombina.

⁵On ndoggan gal waadiwol ceekŋgol caka towndiije go, ngam ngol yottoto Asal. On ndoggan bana kaakiraaɓe mooɗon ndoggirno daliila dimmbaaki lesdi nder zamanu Uzziya, laamiiɗo Yahuuda. Nden Allah Jawmiraawo am wardan bee seniiɓe muuɗum fuu.

⁶Nyalaade man jayŋgol e jaaŋgol e mallimallooje ngonataa[18].

⁷Nde laatoto nyalaade feereere. Jawmiraawo tan anndi nde. Nde walaa nyalawma, non boo jemma. Ammaa koo kiikiiɗe boo, jayŋgol laatoto.

⁸Nyalaade man ndiyam ndokkanɗam ngeendam ɓuloyan diga Urusaliima. Reeta maajam ilan haa mbeela fuunaaŋge, reeta boo haa mbeela hiirnaaŋge. Ɗam tokkoto ilugo nduŋngu e ceeɗu.

⁹Nden Jawmiraawo laamanto duniyaaru fuu. Saa'i man kaŋko tan wonata Jawmiraawo, walaa goɗɗo maran innde nde'e.

¹⁰Lesdi taariindi Urusaliima fuu laatoto yayre, diga Geba haa yotto Rimmon haa fombina Urusaliima. Ammaa berniwol Urusaliima towtan, ngol tabitan haa nokkuure muuɗum. Ngol yaajan diga Dammugal Benyamin haa yotto babal dammugal kiiɗŋgal e Dammugal Toldu, diga suudu Hananiyel towndu haa yotto ɓiɗɗirde laamiiɗo.

¹¹Yimɓe njooɗoto ton, nattinki meetataa laataago, yimɓe Urusaliima njooɗoto jam.

¹²Ndaa masiibooji ɗi Jawmiraawo ukkanto yimɓe ummaatooje honiiɓe Urusaliima fuu: O nyolnan kusel ɓalli maɓɓe diga ɓe ɗon ndari dow kosɗe maɓɓe tawon. Gite maɓɓe nyolan nder gasɗe muuɗum'en, ɗemɗe maɓɓe boo nder kunnduɗe maɓɓe.

¹³Nyalaade man Jawmiraawo hebbinan ɓe bee kultoreeŋgol maŋngol. Ɓe kaɓan hakkunde maɓɓe. Koo moy ukkanto keeddiɗɗum.

¹⁴Yimɓe Yahuuda boo kaɓan ngam wallugo Urusaliima. Ɓe njaɓtan mardi ummaatooje taariiɗe fuu: Kaŋŋeeri e cardi e limce ɗuuɗɗe masin.

¹⁵Masiibo ukkanto pucci e alfadariije e geelooɗi e bamɗe e dabbaaji gonɗi nder caŋngeeje ɗe'e fuu. Masiibo oo nanndi bee oya go.

¹⁶Nden yimɓe luttanɓe haa ummaatooje ummaniiɗe Urusaliima fuu ngaran ton nde hitaande yaalti fuu, ngam sujidango Laamiiɗo, Jawmiraawo honooɓe asama e ngam waɗugo juulde bukkaaji.

¹⁷To asŋgol koo ngole nder duniyaaru waraay sujidango Laamiiɗo haa Urusaliima, Jawmiraawo honooɓe asama, iyeende toɓataa nder lesdi maagol.

¹⁸To asŋgol Misra waraay haa Urusaliima ngam waɗugo juulde bukkaaji, nden kam masiibo ukkanto ngol bana ummaatooje ɗe ngarataa waɗugo juulde nde'e.

¹⁹Bana non kiita waran dow Misra e ummaatooje ɗe ngarataa waɗugo juulde bukkaaji.

²⁰Nder wakkati man, binndol laatoto dow leŋngi pucci bana ni'i: “Senaama ngam Jawmiraawo.” Defruɗe nder haykaliiru Jawmiraawo laatoto cenaaɗe bana taasaaje gonɗe yeeso hirsirde.

²¹Payanɗe gonɗe nder Urusaliima e Yahuuda fuu laatoto cenaaɗe ngam Jawmiraawo honooɓe asama. Lii'otooɓe kirseteeɗi fuu kuuwtiniran ɗe, ndefa nder maaje. Nder wakkati ki'i, piloowo wonataa nder suudu Jawmiraawo honooɓe asama.