Read Fulfulde Zekariya 5 Bible Online

Zekariya 5 - Fulfulde bible

Zekariya 5

¹Mi tijji fahin, mi yi'i deftere taggaande, ɗon fiira.

²Malaa'ikaajo ƴami yam: “Ɗume ngi'ata?” Mi jaabi: “Mi ɗon yi'a deftere taggaande ɗon fiira. Njuutirka maare waɗi meetir sappo (10), njaajirka maare boo meetir jowi (5).”

³O wi'i yam: “Ɗum naaloore tammiinde ukkanaago duniyaaru fuu. Haa wakeere woore ɗum winndaama: Koo moy wujji, o diiweteeɗo diga lesdi. Haa wakeere ndeya boo ɗum winndaama: Koo moy huni dow fewre, o diiweteeɗo bana non.

⁴Jawmiraawo honooɓe asama wi'i: Mi neldi naaloore nde'e ngam haa nde nasta suudu gujjo e suudu kunotooɗo dow fewre bee innde am. Nde jooɗoto ton, haa nde halkida kuuje fuu, koo piile e kaa'e fuu.”

⁵Malaa'ikaajo bolidanɗo bee am ɓaditi, wi'i yam: “Tijja, laar ko waŋgata to!”

⁶Mi ƴami mo: “Ɗum ɗume?” O jaabi: “Ko waŋgata ton, ɗum etirgal.” O tokki wi'ugo: “Ɗum aybeeji yimɓe dow lesdi fuu.”

⁷Nden maɓɓoode nde dalma[5] maɓɓiti diga hunnduko etirgal go. Mi yi'i debbo ɗon jooɗi nder maagal.

⁸Malaa'ikaajo wi'i: “Kaŋko woni zunuuba.” Nden o wudini mo nder etirgal, o maɓɓi ngal bee maɓɓorde dalma go.

⁹Nde mi tijji fahin, mi yi'i rewɓe ɗiɗo ɗon mbaŋga. Ɓe ngoodi bileeji bana ɗi ngaasiyoowal, henndu wifi caka maaji. Ɓe ndoondi etirgal go, ɓe dilliri ngal hakkunde lesdi e asama.

¹⁰Mi ƴami malaa'ikaajo bolidanɗo bee am: “Toy ɓe njahrata ngal?”

¹¹O jaabi yam: “Woɗɓe ɗon nyiɓana debbo go suudu haa Sine'ar[6]. To ndu timmi, ɓe njo'inan mo haa nokkuure maako.”