Read Fulfulde Zekariya 8 Bible Online

Zekariya 8 - Fulfulde bible

Zekariya 8

¹Jawmiraawo honooɓe asama wolwani yam, wi'i:

²“Min Jawmiraawo honooɓe asama, mi woodi yiide haajunde masin ngam Siyona. Nde ɗon wula nder am jaw bana yiite.”

³Ndaa nii Jawmiraawo wi'i: “Mi wartan haa Siyona, mi jooɗoto haa caka Urusaliima. Innde Urusaliima laatoto Berniwol-Gooŋga, innde hooseere Jawmiraawo honooɓe asama boo laatoto Hooseere-Seniinde.”

⁴“Min Jawmiraawo honooɓe asama mi wi'i: Ndotti'en worɓe e fulerewɓe njooɗoto fahin haa laabi Urusaliima. Koo moy maɓɓe woodi sawru haa juŋngo muuɗum ngam ɗuuɗeeŋga balɗe muuɗum.

⁵Babe berniwol keewan ɓikkoy, ngorkoy e ndehoy, koy pijan ton.”

⁶Jawmiraawo honooɓe asama wi'i: “To ɗum laatani luttuɓe yimɓe ɓe'e kayɗiniiɗum nder nyalɗe man, ɗum laatanto yam min boo kayɗiniiɗum na?”

⁷Jawmiraawo honooɓe asama wi'i: “Ndaare, mi hisnan yimɓe am diga lesdi fuunaaŋgeeri e lesdi hiirnaaŋgeeri.

⁸Mi wartiran ɓe, ngam ɓe njooɗo nder Urusaliima. Ɓe laatoto yimɓe ummaatoore am, min boo mi laatoto Allah maɓɓe nder gooŋgaaku e adilaaku.”

⁹Jawmiraawo honooɓe asama wi'i: “Cemmbiɗine juuɗe mooɗon, onon nanɓe bolle ɗe'e haa kunnduɗe annabi'en nder saa'iire nde'e, nder nyalaade nde ɓe mballini caɓɓaaje ngam nyiɓtaago haykaliiru am.

¹⁰Ngam hiddeko nyalɗe ɗe'e ngara, walaa mo yoɓanno kuuwoowo. Dabbaaji boo kuuwi meere. Daliila konne'en, walaa mo waɗata jahaaŋgal nder hoolɗinaare. Mi acci yimɓe fuu, koo moy ummani tanum.

¹¹Min Jawmiraawo honooɓe asama mi wi'i: Jonta kam mi laatantaako luttuɓe yimɓe ɓe'e bana laatoriimi nder nyalɗe caaliiɗe.

¹²Jonta kam, mi waddanan lesdi mon jam, inabooje ndiman, lesdi waɗan nyaamle, asama toɓnan iyeende. Hayruuji ɗi'i fuu mi hokkan ɗi luttuɓe ummaatoore nde'e haa ɓe mara ɗi.

¹³Onon yimɓe Yahuuda e Isra'iila, bana no on laatorino alaama naaloore caka ummaatooje, bana non on laatorto alaama barka, ngam mi hisnan on. Taa kultore, ammaa cemmbiɗine juuɗe mooɗon!”

¹⁴Jawmiraawo honooɓe asama wi'i: “Mi anninino ukkanaago on sarru, ngam kaakiraaɓe mon tikkini yam, mi mimsitaaki boo.

¹⁵Ammaa jonta mi annini woonango Urusaliima e yimɓe Yahuuda. Taa kultore sam!

¹⁶Ndaa ko ngiɗmi on mbaɗa: Mbolwindire gooŋga, ta'e kiita gooŋgaaha haa babe kiita, ngam haa jam tabito.

¹⁷Taa koo moy nufano keeddiɗɗum kalluɗum nder ɓernde mum, taa ngiɗe hunayeere fewre, ngam mi ɗon wanya ɗum fuu. Min Allah Jawmiraawo wi'i ɗum.”

¹⁸Jawmiraawo honooɓe asama wolwani yam,

¹⁹wi'i: “Suumaago nder lewru nayaɓru e jowaɓru e joweeɗiɗawru e sappooru laatanto yimɓe ummaatoore Yahuuda nyalɗe juulɗe e welwelo e seyo. Ammaa ngiɗe gooŋgaaku e salaaman.”

²⁰Jawmiraawo honooɓe asama wi'i: “Fakat, ummaatooje e yimɓe jooɗiiɓe berniiji ɗuuɗɗi ngaran haa ɗo.

²¹Jooɗiiɓe nder berniwol ngo'ol njahan haa jooɗiiɓe nder berniwol ngola, mbi'an: Njemmen toroyaago Jawmiraawo, pottoyen bee Jawmiraawo honooɓe asama. Min boo mi yahan.

²²Ummaatooje ɗuuɗɗe e cemmbiɗɗe ngaran haa Urusaliima ngam fottugo bee Jawmiraawo honooɓe asama e toraago mo.

²³Saa'i man yimɓe sappo wolwanɓe ɗemɗe feere feere njogoto limce Yahuuduujo gooto, ɓe mbi'a: Min njahdan bee mooɗon, ngam min nani Allah ɗon wondi bee mooɗon.”