Read Fulfulde Malakiya 1 Bible Online

Malakiya 1 - Fulfulde bible

Malakiya 1

¹Ndaa koŋngol ngol Jawmiraawo wolwi bee hunnduko Malakiya[1]:

²Jawmiraawo wi'i: “Mi yiɗi on.” Ammaa onon on ɗon ƴama: “Ɗume hollata a yiɗi min?” Jawmiraawo ɗon jaabo: “Naa Isuwa woni deerɗu Yaakubu? Ammaa Yaakubu ngiɗmi,

³Isuwa kam mi wanyi ɗum. Mi wartiri kooseeje maako bille meere, mi hokki cuuli maral maako.”

⁴To Edoomi'en mbi'i: “Ɓe mbili min gure, ammaa min mahititto bille amin”, nden kam Jawmiraawo honooɓe asama wi'an: “Booɗɗum, kamɓe ɓe mahan, ammaa min mi yibbinan ɗum.” Ngam maajum yimɓe ewnoto Edoom lesdi halleende e ummaatoore nde Jawmiraawo tikkani haa foroy.

⁵Gite mooɗon ngi'an ɗum. Nden on mbi'an: “Jawmiraawo woni mawɗo, koo gaɗa keeri Isra'iila boo.”

⁶Jawmiraawo honooɓe asama wi'i liman'en: “Ɓiɗɗo teddinan baaba mum, maccuɗo boo teddinan jawmum. Nde nii mi Baabiraawo, toy tedduŋgal ngal haandani yam? Nde nii mi Jawmiraawo, toy teddinoore nde haandani yam? Onon liman'en, on ɗon njawo innde am. Ammaa on ɗon mbi'a: Bee ɗume min njawri nde?

⁷Bee lii'aago nyaamdu soɓndu dow hirsirde am. Ammaa on ɗon mbi'a: Bee ɗume min coɓniri ma? Bee numugo: Taabal Jawmiraawo[2] woni huunde meere.

⁸To on lii'anake yam dabbaaji bumɗi kirseteeɗi, naa ɗum kalluɗum na? To on lii'ani yam dabbaaji boosɗi e nyaawɗi, naa ɗum kalluɗum na? Sey on njaha, on ndokka ɗum ngomna mooɗon. On tammi ɗum fottanan mo na? Koo o yerdoto on na?” Non Jawmiraawo honooɓe asama wi'i.

⁹Jonta tore Allah haa o mo'ana en. Nde nii on lii'anake mo dokke bana nii, kaŋko o yerdoto on na? Non Jawmiraawo honooɓe asama wi'i.

¹⁰“Ayye! Ɓuranno to gooto mon maɓɓi dammuɗe haykaliiru, ngam taa on kuɓɓa yiite meere dow hirsirde am! Mi seyoraaki on sam, mi jaɓataa dokkal diga juuɗe mooɗon. Non Jawmiraawo honooɓe asama wi'i.

¹¹Ngam diga fuɗirde naaŋge haa mutirde maage, ummaatooje ɗon teddina innde am mawnde. Koo toy fuu yimɓe ɗon ngula uurle ngam innde am, ɓe ɗon lii'ano yam dokke laaɓɗe ngam innde am mawnde caka ummaatooje. Non Jawmiraawo honooɓe asama wi'i.

¹²Ammaa onon on ɗon coɓna innde am bee wi'ugo: Taabal Jawmiraawo soɓi, nyaamdu dow maagal boo laati meere.

¹³On ɗon mbi'a boo: Kayya, torra meere non! On ɗon njawo yam. Non Jawmiraawo honooɓe asama wi'i. On ɗon ngadda dabbaaji ɗi on ngujji malla boosɗi e nyaawɗi, haa on lii'ano yam ɗi kirseteeɗi. On tammi mi jaɓan ɗi diga juuɗe mooɗon na? Non Jawmiraawo wi'i.

¹⁴Naaloore dow rikiciijo marɗo njawdiri ndi o togani yam nder tokkere maako, ammaa o lii'ani yam kallundi. Ngam mi laamiiɗo mawɗo, innde am boo nde hulniinde caka ummaatooje.” Non Jawmiraawo honooɓe asama wi'i.