Read Fulfulde Malakiya 3 Bible Online

Malakiya 3 - Fulfulde bible

Malakiya 3

¹Jawmiraawo honooɓe asama wi'i: “Ndaa, mi ɗon nela nelaaɗo am[4], haa o mo'ina laawol yeeso am. Jawmiraawo mo ɗaɓɓoton, nastan nder haykaliiru mum bee juhuki. Nelaaɗo mo alkawal mo ngerduɗon, ndaa o ɗon wara.” Non Jawmiraawo honooɓe asama wi'i.

²Ammaa moy waawata ɓusugo nyalaade garki maako? Moy waawata dartaago nyalaade nde o waŋgoyta? Ngam o laatoto bana yiite ɓolinoowo, bana saabulu lootoowo.

³O jooɗoto bana ɓolinoowo e laɓɓinoowo cardi. O laɓɓinan ɓiɓɓe Lewi, o wo'inan ɓe bana kaŋŋeeri e cardi, haa ɓe lii'ano Jawmiraawo dokke pottanɗe.

⁴Nden dokke Yahuuda e Urusaliima pottanan Jawmiraawo, bana nder balɗe caaliiɗe, bana nder duuɓi ɓooymaaji.

⁵Jawmiraawo honooɓe asama wi'i: “Mi waranan on ngam kiita. Mi yaawɗoto laataago ceedoowo dow waɗooɓe hiila e jeenooɓe e seedooɓe fewre, dow waɗanɓe huuwooɓe muuɗum'en rikici bee ngeenaari, dow toonyooɓe rewɓe yurumɓe e atiime'en, dow waɗanɓe aybe heedi jananɓe e dow yimɓe ɓe kulataa yam.”

⁶[5] “Min, Jawmiraawo, mi waylataako. Ammaa onon haa jonta on ɓiɓɓe Yaakubu.

⁷Diga saa'i kaakiraaɓe mon on celi laawol farillaaji am, on ɗowtanaaki ɗi. Lorte haa am! Nden kam mi loroto haa mooɗon.” Non Jawmiraawo honooɓe asama wi'i. “Ammaa on ɗon mbi'a: Noy min lortorto?

⁸Goɗɗo waawan zammbaago Allah na? Ammaa onon on ɗon zammbo yam. On ɗon mbi'a: Noy min zammbori ma? Haa zakka e haa dokkal boo.

⁹On naalaaɓe, onon yimɓe ummaatoore fuu on ɗon zammbo yam.

¹⁰Ngadde zakka fuu nder sigordu, haa nyaamdu tawe nder suudu am.” Non Jawmiraawo honooɓe asama wi'i. “Poondeeɗam bee waɗugo bana non, on ngi'an fakat mi maɓɓitan burɗe asama, mi waanja barka dow mooɗon bee fantugo.

¹¹Mi telɓanan nyaamooji ngam mooɗon, ɗi mbonnataa ƴaamle lesdi mon. Inabooje haa gese mon ndiman foroy, meetataa tampugo. Non Jawmiraawo honooɓe asama wi'i.

¹²Ummaatooje fuu ewnoto on barkiɗinaaɓe, ngam lesdi mon laatoto mboondi.” Non Jawmiraawo honooɓe asama wi'i.

¹³Jawmiraawo wi'i: “Bolle mooɗon caati dow am. Ammaa on ɗon ƴama: Ɗume min mbolwindiri dow maaɗa?

¹⁴On mbi'i: Jagganaago Jawmiraawo woni meere. Ko nafata to min kakkilani umrooje maako? Ko nafata to min cunake yeeso Jawmiraawo honooɓe asama?

¹⁵Jonta min ɗon ndaara yedduɓe bana kamɓe ngoni barkiɗinaaɓe. Waɗanɓe halleende keɓi hayru. Naa kanjum tan, ammaa koo to ɓe njarribake Allah, ɓe ndaɗan.”

¹⁶Nden hulɓe Jawmiraawo mbolwindiri. Jawmiraawo boo heɗiti, nani. Deftere ciftorki winndaama yeeso maako ngam hulɓe mo, teddinanɓe innde maako.

¹⁷Jawmiraawo honooɓe asama wi'i: “Kamɓe ɓe laatoto yiɗaaɓe am nder nyalaade nde taaskitinanmi. Mi enɗan ɓe, bana baaba enɗirta ɓiyum jaggantooɗo ɗum.

¹⁸Nden on cenndindiran gooŋgaajo bee kalluɗo fahin, non boo jaggantooɗo Allah bee mo jaggantaako ɗum.”

¹⁹“Fakat, nyalaade nde'e waran, wulannde bana yiite ɓolinirde. Nden yedduɓe e waɗanɓe halleende laatoto bana tiitiiho. Nyalaade man wulan ɓe, accantaa ɓe koo ɗaɗol koo lisal.” Non Jawmiraawo honooɓe asama wi'i.

²⁰“Ammaa teddinanɓe innde am kam, ndaa iinaare am: Adilaaku am waŋganan on bana puɗki naaŋge. Nyawnduki wardan bee laasol maage. Nden on ngurtoto, on ndiwan bee seyo bana nyalahoy gantaakoy.

²¹On ndamman halluɓe, ngam ɓe laatoto ndoondi les jaaɓruɗe kosɗe mon nder nyalaade nde taaskitinanmi.” Non Jawmiraawo honooɓe asama wi'i.

²²“Ciftore tawreeta ka mi hokki jagganoowo yam Muusa dow hooseere Sina, waato farillaaji e kiitaaji ngam Isra'iila fuu.

²³Ndaa, mi nelan annabi Eliya haa mooɗon, hiddeko nyalaade Jawmiraawo mawnde hulniinde wara.

²⁴Kaŋko o lortinan ɓerɗe baabiraaɓe haa ɓikkoy e ɓerɗe ɓikkoy haa baabiraaɓe maakoy, ngam taa mi wara, mi nattina lesdi ndi'i.”