Read Fulfulde Matta 1 Bible Online

Matta 1 - Fulfulde bible

Matta 1

¹Ndaa inɗe kaakiraaɓe nder asŋgol Yeesu Almasiihu, ɓii Daawuda, ɓii Ibrahiima:

²Ibrahiima danyi Isiyaaku, Isiyaaku danyi Yaakubu, Yaakubu danyi Yahuuda e deerɗiraaɓe muuɗum.

³Yahuuda danyi Peres e Zara, Tamar woni daada maɓɓe. Peres danyi Hesruunu, Hesruunu danyi Siriya.

⁴Siriya danyi Amminadabu, Amminadabu danyi Nahasunu, Nahasunu danyi Salmuuna,

⁵Salmuuna danyi Bo'es, Rahab woni daada maako. Bo'es danyi Obet, Ruut woni daada maako. Obet danyi Yessa,

⁶Yessa danyi laamiiɗo Daawuda. Daawuda danyi Suleymaanu, daada maako wonno debbo Uriya.

⁷Suleymaanu danyi Robo'am, Robo'am danyi Abiya, Abiya danyi Asa,

⁸Asa danyi Yosafat, Yosafat danyi Yoram. Yoram danyi Uzziya,

⁹Uzziya danyi Yotam, Yotam danyi Akas, Akas danyi Hezekiya,

¹⁰Hezekiya danyi Manassa, Manassa danyi Amon, Amon danyi Yusiya,

¹¹Yusiya danyi Yekoniya e deerɗiraaɓe muuɗum saa'i daheeki[1] Isra'iila'en haa Baabila.

¹²Ɓaawo daheeki Isra'iila'en haa lesdi Baabila, Yekoniya danyi Salatiyel, Salatiyel danyi Zorobaabila,

¹³Zorobaabila danyi Abihuda, Abihuda danyi Eliyakim, Eliyakim danyi Ajora,

¹⁴Ajora danyi Cadok, Cadok danyi Ahim, Ahim danyi Eliyuda,

¹⁵Eliyuda danyi Eli'azaaru, Eli'azaaru danyi Mattan, Mattan danyi Yaakubu,

¹⁶Yaakubu danyi Yusufu, gorko Mariyama mo danyi Yeesu bi'eteeɗo Almasiihu.

¹⁷Diga Ibrahiima haa Daawuda waɗi gide sappo e nayi; diga Daawuda haa daheeki Isra'iila'en haa Baabila boo waɗi gide sappo e nayi; diga daheeki Isra'iila'en haa Baabila haa Almasiihu danya boo waɗi gide sappo e nayi.

¹⁸Ndaa nii danyeeki Yeesu Almasiihu laatori. Daada[2] maako Mariyama o kaɓɓanaaɗo Yusufu, ammaa diga ɓe ngondaay tawon, Mariyama reedi bee baawɗe Ruuhu Ceniiɗo.

¹⁹Yusufu kaɓɓanɗo mo o adiliijo, o yiɗaa feftugo mo yeeso yimɓe, o annini accugo mo bee sirri.

²⁰Nde o ɗonno numta haala ka'a, malaa'ikaajo Jawmiraawo waŋgani mo nder koyɗol, wi'i mo: “Yusufu, ɓii Daawuda, taa hul ɓaŋgo Mariyama mo kaɓɓanɗa, ngam ko reeda nder maako iwi haa Ruuhu Ceniiɗo.

²¹O tammi danyugo ɓiɗɗo gorko, a inndan mo Yeesu, ngam kaŋko hisnata ummaatoore maako diga hakkeeji maare.”

²²Ɗum fuu ɗum laati ngam hiɓɓingo ko Jawmiraawo wi'no bee hunnduko annabiijo:

²³“Paanyo debbo mo annda gorko reedan, danyan ɓiɗɗo gorko, ɓe inndan mo Immanuyila, bana wi'go: Allah ɗon wondi bee meeɗen.”

²⁴Nde Yusufu fini, o waɗi bana no malaa'ikaajo Jawmiraawo umri mo, o hoo'i debbo maako,

²⁵ammaa o hawtaay bee maako haa o danyi ɓiyiiko gorko. Yusufu inndi mo Yeesu.