Read Fulfulde Matta 10 Bible Online

Matta 10 - Fulfulde bible

Matta 10

¹Yeesu ewni pukara'en muuɗum sappo e ɗiɗo. O hokki ɓe baawɗe riiwugo ginnaaji e nyawndugo yimɓe diga nyawuji feere feere fuu.

²Ndaa inɗe nelaaɓe sappo e ɗiɗo man: Aran, Simon bi'eteeɗo Piyer e deerɗum Andire, Yaakuba e deerɗum Yuhanna, ɓiɓɓe Zebede,

³Filip e Bartolome, Tomas e Matta jomnoowo, Yaakuba ɓii Alfa e Tadde,

⁴Simon Kanaaniijo e Yahuuda Iskariyot zammbotooɗo Yeesu.

⁵Yeesu neli pukara'en sappo e ɗiɗo ɓe'e, o umri ɓe: “Taa njehe haa ummaatooje goɗɗe ngoni, taa naste gure Samariya'en boo.

⁶Ammaa njehe haa Isra'iila'en laatiiɓe bana baali majjuɗi.

⁷Njehe, ngaazine bee wi'ugo: Laamu asamanji ɓaditake.

⁸Njamɗitine nyawɓe, ummitine maayɓe, laɓɓine kuturu'en, ndiiwe ginnaaji. On keɓi ɗum caahu, onon boo caahe ɗum.

⁹Taa njoge kaŋŋeeri malla cardi malla ceede.

¹⁰Taa njoge booro ngam jahaaŋgal malla limce ɗiɗi. Taa koo'e paɗe malla sawru boo, ngam kuuwoowo he'i heɓugo nguure muuɗum.

¹¹To on nasti berniwol malla wuro fuu, ɗaɓɓite goɗɗo mo he'i jaɓɓaago on, njooɗe haa maako haa to on ndilli.

¹²To on ɗon nasta saare goɗɗo, koofne wonɓe ton.

¹³To yimɓe saare man njaɓɓake on, jam mooɗon laatanto ɓe. Ammaa to ɓe njaɓɓaaki on, jam mooɗon loroto haa mooɗon.

¹⁴To on nasti saare malla wuro, ɓe cali jaɓɓaago on malla nanango on, ngurte saare man malla wuro man, piɗɗe collaaje kosɗe mooɗon.

¹⁵Gooŋga mbi'anmi on: Nyalaade darŋgal, kiita maɓɓe tullan dow kiita yimɓe Sodoma e Gomorra.”

¹⁶“Ndaa, mi ɗon nela on bana baali caka caafaali. Ngam man laate on ƴoyɓe bana boɗɗe, laaɓɓe bana pooli.

¹⁷Ammaa ndeene ko'e mooɗon, ngam ɓe njahran on yeeso hiitooɓe, ɓe ɓoccan on nder cuuɗi dewal maɓɓe.

¹⁸Ɓe njahran on yeeso ngomna'en e laamiiɓe ngam daliila am, ngam haa on ceedo seedamku mooɗon yeeso maɓɓe e yeeso yimɓe ummaatooje goɗɗe.

¹⁹To ɓe njahri on yeeso hiitooɓe, taa cakle dow ko mbi'oton malla no mbolwirton, bolle ɗe on mbolwata ngaranan on saa'i man nden.

²⁰Ngam naa onon tammi wolwugo, ammaa Ruuhu Baabiraawo mooɗon wolwan nder mooɗon.

²¹Yimɓe ndokkan deerɗiraaɓe muuɗum'en ngam mbareego, baabiraaɓe boo ɓikkoy muuɗum'en, ɓikkoy ummanto saaro'en muuɗum'en, mbara ɓe.

²²Yimɓe fuu nganyan on ngam daliila am. Ammaa mo munyi haa timmoode, hisan.

²³To ɓe puɗɗi toonyaago on haa berniwol ngol, ndille haa berniwol ngola. Gooŋga mbi'anmi on: On mbaawataa fiiltugo berniiji Isra'iila hiddeko Ɓii-neɗɗo wara.

²⁴Jaŋngoowo ɓurataa jaŋnginoowo muuɗum maŋngu, maccuɗo boo ɓurataa jaagorɗo muuɗum maŋngu.

²⁵To jaŋngoowo yottake darnde jaŋnginoowo muuɗum, maccuɗo boo yottake darnde jaagorɗo muuɗum, ɗum he'i. To ɓe ewnake jawmu saare Be'elzebul[13], ɓe ɓurataa hallingo yimɓe saare maako na?”

²⁶“Kadi, taa kule ɓe. Cuuɗiiɗum fuu waŋgan, sirriijum fuu faamoto.

²⁷Ko mi wi'ata on nder nyiɓre, mbaŋgine ɗum caka nyalawma. Ko on nanata nder sofndaago, ngooyne ɗum bee baŋguɗum.

²⁸Taa kule yimɓe ngam koo ɓe mbaawan mbarugo ɓalli mooɗon, ɓe mbaawataa mbarugo yoŋki. Ammaa kule Allah baawɗo halkugo ɓanndu e yoŋki fuu nder yiite jahannama.

²⁹Ɓe coorrataa colloy ɗiɗoy baakin suleyje ɗiɗi na? Ammaa walaa koo gootel maakoy do'oto haa lesdi sonaa to Baabiraawo mooɗon yerdake ɗum.

³⁰Onon boo, koo gaasaaji ko'e mooɗon ɗi limaaɗi gootol gootol fuu.

³¹Ngam maajum taa kultore, on ɓuri colloy ɗuuɗkoy saman.”

³²“Koo moy seedi yeeso yimɓe o anndi yam, min boo mi seedoto yeeso Baabiraawo am mo asama mi anndi mo.

³³Ammaa mo yeddi yam yeeso yimɓe, min boo mi yeddan mo yeeso Baabiraawo am mo asama.”

³⁴“Taa nume mi waddi salaaman haa duniyaaru. Naa salaaman ngaddumi, ammaa kaafahi.

³⁵Mi wari ngam waadugo ɓiɗɗo gorko bee baaba mum, ɓiɗɗo debbo bee daada mum, debbo boo bee esum debbo.

³⁶Yimɓe saare goɗɗo laatoto wanywanyɓe mum.

³⁷Koo moy ɓuri yiɗugo baaba muuɗum malla daada muuɗum dow am, he'aay laataago mo am. Koo moy ɓuri yiɗugo ɓiŋngel muuɗum gorgel malla deyel dow am he'aay laataago mo am.

³⁸Koo moy to hoo'aay gaafaaŋgal muuɗum, tokki yam, he'aay laataago mo am.

³⁹Koo moy yiɗi aynugo yoŋki muuɗum, majjinan ki. Ammaa mo majjini yoŋki muuɗum ngam am, heɓtan ki.”

⁴⁰“Koo moy jaɓɓi on, jaɓɓi yam. Mo jaɓɓi yam, jaɓɓi nelɗo yam boo.

⁴¹Koo moy jaɓɓi annabiijo ngam o annabiijo, heɓan mbarjaari bana ndi annabiijo. Koo moy jaɓɓi adiliijo ngam o adiliijo, heɓan mbarjaari bana ndi adiliijo.

⁴²Gooŋga mbi'anmi on: Koo moy hokki koo ndiyam peewɗam nder jardugel haa ɓurɗo leesugo caka pukara'en am ɓe'e ngam o pukaraajo am, heɓan mbarjaari muuɗum fakat.”