Read Fulfulde Matta 15 Bible Online

Matta 15 - Fulfulde bible

Matta 15

¹Farisa'en e moodiɓɓe tawreeta ngari diga Urusaliima haa Yeesu, ɓe ƴami mo:

²“Koni pukara'en maaɗa ɗowtantaako al'aada kaakiraaɓe meeɗen? Ngam ɓe ɗon nyaama bilaa lootugo juuɗe.”

³Yeesu jaabi ɓe: “Onon, koni on ɗowtantaako umroore Allah ngam daliila al'aada mooɗon?

⁴Allah wi'i: Teddin baaba ma e daada ma, koo moy wolwi kalluka dow baaba malla daada mum, sey o mbare.

⁵Ammaa onon on ɗon mbi'a: To goɗɗo wi'i baaba malla daada mum: Geɗal jawdi am ndi mi waawanno wallugo ma bee maari, doole mi hokka ngal Allah.

⁶Nden kam walaa haaje o teddina baaba maako. Bana non on mbonni umroore Allah ngam daliila al'aada mooɗon.

⁷Naafiki'en! Annabaaku ngu Esaaya waɗi dow mooɗon gooŋɗi:

⁸Allah wi'i: Yimɓe ummaatoore nde'e ɗon teddinammi bee kunnduɗe tan, ammaa ɓerɗe maɓɓe ndaayake yam.

⁹Ɓe ɗon cujidanammi meere, ngam ɓe ɗon ekkitina geccaaji yimɓe.”

¹⁰Nden Yeesu ewni yimɓe, wi'i ɓe: “Nane, paame ɗu'um:

¹¹Naa ko nastata hunnduko neɗɗo soɓnata mo, ammaa ko wurtoto hunnduko maako, kanjum soɓnata mo.”

¹²Pukara'en ngari haa Yeesu, mbi'i mo: “A anndi bolle ma mettini ɓerɗe Farisa'en na?”

¹³O jaabi ɓe: “Fuɗŋgo ngo Baabiraawo mo asama tiggaay fuu, ngo ɗoofeteeŋgo.

¹⁴Acce ɓe, ɓe wumɓe, ɗowooɓe wumɓe. To bumɗo ɗon ɗowa bumɗo, ɓe ɗiɗo fuu ɓe ndo'oto nder ngaska.”

¹⁵Piyer wi'i mo: “Faamtin min balndol ngol.”

¹⁶Yeesu wi'i: “Haa jonta, onon boo on paamataa na?

¹⁷Ko nastata hunnduko neɗɗo fuu, haa reedu mum ɗum yahata, nden ɗum wurto ɓanndu maako. On anndaa ɗum na?

¹⁸Ammaa ko wurtoto hunnduko, ɗum ɗon iwa haa ɓernde, kanjum soɓnata neɗɗo.

¹⁹Ngam haa ɓernde neɗɗo, numooji kalluɗi e mbar-hoore e njeenu e daakaareeku e nguyka e seedamkuuji pewooji e kuudi kalluɗi iwata.

²⁰Kanjum soɓnata neɗɗo. Ammaa nyaamugo bilaa lootugo juuɗe, ɗum soɓnataa neɗɗo.”

²¹Yeesu ummi nokkuure man, dilli haa lesdi Tirus e Sidon.

²²Debbo Kanaaniijo, jooɗiiɗo lesdi man, wari haa maako, tori mo bee sawtu: “Yaa Jawmiraawo, Ɓii Daawuda, enɗam! Ndaa ɓiŋngel am deyel ngel ginnawol ɗon torra masin.”

²³Ammaa Yeesu jaabaaki mo. Pukara'en maako ɓaditi mo, mbi'i mo: “Riiw mo, ngam o ɗon tokki en bee hoolo.”

²⁴Yeesu jaabi: “Mi nelaaka haa yimɓe feere, sey haa baali majjuɗi, ummaatoore Isra'iila.”

²⁵Ammaa debbo go wari, tuggani mo koppi, wi'i: “Wallam, yaa Jawmiraawo!”

²⁶Yeesu jaabi mo: “Wooɗaay hoo'ugo nyaamdu ɓikkoy, sakkinana ndawaakon.”

²⁷Debbo wi'i: “Nonnon, yaa Jawmiraawo, ammaa koo ndawaakon boo ɗon nyaama caamɗum diga taabal jawmiikon.”

²⁸Nden Yeesu wi'i: “An debbo, nuɗɗinki maaɗa makki, ɗum laatano ma bana a yiɗi.” Ɓiŋngel maako deyel go yamɗiti saa'i man nden.

²⁹Yeesu ummi nokkuure man, tokki kommbi weendu Galiili. O wa'i hooseere, o jooɗi ton.

³⁰Mooɓe ɗuuɗɗe ngari haa maako, ɓe ngaddi woosɓe e wumɓe e waata-terɗe'en e muuka'en e nyawɓe woɗɓe ɗuuɗɓe. Ɓe mballini ɓe kommbi Yeesu, o yamɗitini ɓe.

³¹Yimɓe mooɓre kayɗini nde ɓe ngi'i muuka'en ɗon mbolwa, waata-terɗe'en njamɗiti, woosɓe ɗon njaha bee kosɗe muuɗum'en, wumɓe boo ɗon ngi'a. Ɓe teddini Allah Isra'iila.

³²Yeesu ewni pukara'en muuɗum, wi'i ɓe: “Mi ɗon yurmina yimɓe ɓe'e, ngam ɓe ɗon ngondi bee am nyalɗe tati, ɓe ngalaa ko ɓe nyaama. Mi yiɗaa jaɓɓitaago ɓe bee dolo ngo'o, ngam taa ɓe tampa dow laawol.”

³³Pukara'en mbi'i mo: “Haa toy keɓeten tamseeje nder ladde hamaadaare ɗo, haa en ndokka mooɓre ɗuuɗnde nde'e fuu?”

³⁴Yeesu ƴami ɓe: “Tamseeje noy marɗon?” Ɓe njaabi mo: “Tamseeje joweeɗiɗi e liikon seɗɗa.”

³⁵Nden Yeesu umri mooɓre jooɗo.

³⁶O hoo'i tamseeje joweeɗiɗi e liɗɗi go, o yetti Allah, o yewi ɗe, o hokki ɗe pukara'en maako, kamɓe boo ɓe ndokki ɗe mooɓre.

³⁷Yimɓe fuu nyaami, kaari. Pukara'en mooɓti luttuɗum man, ɗum hebbini cilaaje joweeɗiɗi.

³⁸Limgal nyaamɓe nyaamdu man dillani worɓe ujine nayo, rewɓe e ɓikkoy limaaka.

³⁹Nde Yeesu jaɓɓiti mooɓre, o nasti koommbowal[21], o dilli haa lesdi Magadan.