Read Fulfulde Matta 17 Bible Online

Matta 17 - Fulfulde bible

Matta 17

¹Ɓaawo nyalɗe joweego, Yeesu hoo'i Piyer e Yaakuba e Yuhanna deerɗu Yaakuba, o dillidi bee maɓɓe dow hooseere townde, ɓe ɗon ton feere maɓɓe.

²Jaati maako wayliti haa gite maɓɓe, yeeso maako yayni bana naaŋge, limce maako laati daneeje tal bana annoora.

³Nden Muusa e Eliya mbaŋgani ɓe, ɗon mbolida bee Yeesu.

⁴Piyer wi'i Yeesu: “Yaa Jawmiraawo, ɗum booɗɗum en ngona haa ɗo! To a yiɗi, mi waɗanan on bukkaaji tati, wooru ngam maaɗa, wooru ngam Muusa, wooru boo ngam Eliya.”

⁵Nde o ɗon wolwa tawon, ndaa ruuldere ɗelkannde wari, suddi ɓe, sawtu iwi haa ruulde man, wi'i: “Oo woni Ɓiɗɗo am giɗaaɗo, mi ɗon seyoro ɗum. Nanane mo.”

⁶Nde pukara'en nani ɗum, ɓe kultori masin, ɓe ndo'i, ɓe kippi geese maɓɓe.

⁷Yeesu ɓaditi ɓe, meemi ɓe, wi'i: “Umme, taa kultore.”

⁸Ɓe ɓaŋgti gite maɓɓe, ɓe ngi'aay goɗɗo feere, sey Yeesu tan.

⁹Nde ɓe ɗon njippo hooseere go, Yeesu wi'i ɓe: “Taa mbi'e koo moy ko on ngi'i, haa to Ɓii-neɗɗo ummitake diga maayde.”

¹⁰Nden pukara'en ƴami mo: “Ngam ɗume moodiɓɓe tawreeta ɗon mbi'a sey Eliya aarta wargo tawon?”

¹¹O jaabi ɓe: “Gooŋga Eliya aartan wargo, o mo'itina kuuje fuu.

¹²Ammaa mi ɗon wi'a on Eliya wari timmi, yimɓe annditaay mo, ɓe mbaɗi mo ko ɓe ngiɗi, ɓe torran Ɓii-neɗɗo boo bana non.”

¹³Pukara'en paami o wolwani ɓe haala Yuhanna baɗoowo baptisma.

¹⁴Nde ɓe njotti haa mooɓre, goɗɗo wari haa Yeesu, tuggani mo koppi,

¹⁵wi'i: “Yaa Jawmiraawo, enɗu ɓiŋngel am! Ngel ɗon bee paɗɗe, o torraaɗo masin, nde ɗuuɗɗum o ɗon do'o nder yiite malla nder ndiyam.

¹⁶Mi waddi ngel haa pukara'en maaɗa, ammaa ɓe mbaawaay yamɗitingo ngel.”

¹⁷Yeesu wi'i: “Hey yimɓe sooya-nuɗɗinki'en, wonniiɓe! Haa ndey tokkotoomi wondugo bee mooɗon e munyango on? Ngaddaneeɗam ɓiŋngel ngel!”

¹⁸Yeesu telɓani ginnawol, ngol wurti ɓiŋngel, ngel yamɗiti saa'i man nden.

¹⁹Ɓaawoɗon pukara'en Yeesu ngari haa maako feere maɓɓe, ƴami mo: “Ngam ɗume min mbaawaay wurtingo ginnawol ngo'ol?”

²⁰Yeesu jaabi ɓe: “Ngam nuɗɗinki mooɗon famɗi. Gooŋga mbi'anmi on: To on ngoodi nuɗɗinki koo seɗɗa bana gawel citta, on mbi'an hooseere nde'e sotta ɗo, yaha to, nde sottoto, walaa ko salorta on sam. [

²¹Ammaa irin ginnawol ngo'ol wurtintaake sonaa bee do'aago e suumaago.]”

²²Pukara'en Yeesu kawti haa lesdi Galiili. Yeesu wi'i ɓe: “Ɓe tammi hokkugo Ɓii-neɗɗo haa juuɗe yimɓe,

²³yimɓe man mbaran mo, ammaa nyannde tataɓre o ummititto diga maayde.” Nde pukara'en nani ɗum, ɓe cuni masin.

²⁴Nde Yeesu bee pukara'en muuɗum njotti Kafarnahum, jomnooɓe jomorgol haykaliiru ngari haa Piyer, ƴami mo: “Moodibbo mooɗon yoɓataa jomorgol haykaliiru na?”

²⁵Piyer jaabi: “O ɗon yoɓa.” Saa'i Piyer nasti suudu, Yeesu aarti wolwango mo, wi'i: “Ko numɗa, Simon? Ɓeye njoɓata jomorli malla garaama ngam laamiiɓe duniyaaru ndu'u? Ɓiɓɓe lesdi naa malla jananɓe?”

²⁶Piyer jaabi: “Ɗum jananɓe njoɓata.” Yeesu wi'i: “Nden kam ɓiɓɓe lesdi njoɓataa.

²⁷Ammaa ngam taa en mettina ɓe ɓerɗe, yah haa weendu, sakkin ngalum nder ndiyam, liiŋgu ngu a aartata naŋngugo, hoocu ngu, maɓɓitu hunnduko maagu, a tawan ceede cardi ton. Hoocu, yoɓ ɓe ngam am e ma.”