Read Fulfulde Matta 2 Bible Online

Matta 2 - Fulfulde bible

Matta 2

¹Yeesu danyaama haa Baytilaama, nder lesdi Yahudiya, nder zamanu laamiiɗo Hirudus. Nden annduɓe alaamaaji koode ngari diga fuunaaŋge haa Urusaliima.

²Ɓe ƴami: “Toy ɓiŋngel danyaaŋgel laatiiŋgel laamiiɗo Yahuudu'en woni? Ngam min ngi'i horre maagel haa fuunaaŋge e min ngari sujidango ngel.”

³Nde laamiiɗo Hirudus nani ɗum, o sakli, yimɓe Urusaliima fuu cakli.

⁴O mooɓti mawɓe liman'en ummaatoore e moodiɓɓe tawreeta fuu, o ƴami ɓe: “Haa toy Almasiihu danyete?”

⁵Ɓe mbi'i mo: “Haa Baytilaama, nder lesdi Yahudiya. Ngam ndaa ko annabiijo winndino:

⁶An Baytilaama nder lesdi Yahudiya, fakat a ɓuraay gure Yahudiya fuu leesugo, Ngam haa maaɗa ardiiɗo iwata, kaŋko durata ummaatoore am Isra'iila.”

⁷Nden Hirudus ewni annduɓe alaamaaji koode go bee sirri, ɓe paamtini mo saa'i horre waŋgi.

⁸O neli ɓe haa Baytilaama, o wi'i ɓe: “Keɓe habaru maagel bee laaɓɗum. To on tawi ngel, anndineeɗam, haa min boo mi yaha, mi sujidana ngel.”

⁹Nde ɓe nani ko laamiiɗo wi'i ɓe, ɓe ndilli. Horre nde ɓe ngi'no haa fuunaaŋge go ardi ɓe, nde yotti dow nokkuure ɓiŋngel woni, nde dari.

¹⁰Nde ɓe ngi'i horre, ɓe ceyi bee seyo maŋngo masin.

¹¹Ɓe nasti suudu, ɓe tawi ɓiŋngel e Mariyama, daada maagel. Ɓe tuggi koppi, ɓe cujidani ngel. Nden ɓe piisti doŋgle maɓɓe, ɓe ndokki ngel dokke: kaŋŋeeri e uurle daneeje guleteeɗe e uurdi baɗaadi.

¹²Ɓaawoɗon Allah reentini ɓe nder koyɗol taa ɓe loro haa Hirudus. Ɓe kooti lesdi maɓɓe bee laawol feere.

¹³Nde linyooɓe alaamaaji go ndilli, malaa'ikaajo Jawmiraawo waŋgani Yusufu nder koyɗol, o wi'i: “Umma, law hoo'u ɓiŋngel e daada maagel, dillu haa Misra, jooɗa ton haa to mi yecci ma: Wartu, ngam Hirudus tammi tefugo ɓiŋngel haa o halka ngel.”

¹⁴Nden Yusufu ummi, hoo'i ɓiŋngel e daada maagel, dilli Misra bee jemma.

¹⁵O jooɗi ton haa yotti maayde Hirudus, ngam haa ko Jawmiraawo wi'no bee hunnduko annabiijo hiɓɓa: “Mi ewni ɓiɗɗo am, mi wurtini mo lesdi Misra.”

¹⁶Nde Hirudus faami annduɓe alaamaaji koode go cargi mo, o tikki masin, o neli, ɓe mbari ɓikkoy ngorkoy haa Baytilaama e gure taariiɗe ngo fuu, diga markoy duuɓi ɗiɗi bee koy cikaay duuɓi ɗiɗi, fodde saa'iire nde annduɓe alaamaaji anndini mo baŋguki horre go bee laaɓɗum.

¹⁷Bana nii annabaaku Yeremiya hiɓɓiri:

¹⁸“Gookaali mbaɗi haa Rama, bojji e yooyooji ɗuuɗi. Rahiilu ɗon woya ɓikkoy mum, o yiɗaa de'itineego, ngam koy maayi.”

¹⁹Nde Hirudus maayi, malaa'ikaajo Jawmiraawo waŋgani Yusufu nder koyɗol haa Misra,

²⁰o wi'i mo: “Umma, hoo'u ɓiŋngel bee daada maagel, hootu lesdi Isra'iila, ngam tefnooɓe mbarugo ɓiŋngel go maayi.”

²¹Yusufu ummi, hoosi ɓiŋngel e daada maagel, hooti lesdi Isra'iila.

²²Ammaa nde o nani Arkilawus roni laamu baaba muuɗum Hirudus dow lesdi Yahudiya, o huli yahugo ton. Ammaa Allah reentini mo nder koyɗol, o yehi haa lesdi Galiili,

²³o jooɗi nder berniwol bi'eteeŋgol Nasaratu. Ɗum waɗi non ngam hiɓɓingo bolle annabi'en, anndinɓe: “O bi'eteeɗo Nasaratuujo.”