Read Fulfulde Matta 25 Bible Online

Matta 25 - Fulfulde bible

Matta 25

¹“Saa'i man laamu asamanji nanndan bee faanyɓe rewɓe sappo. Ɓe koo'i pittirlaaji maɓɓe, ɓe ngurti ngam fottoygo bee ɓaŋɗo.

²Njowo nder maɓɓe faataaɓe, njowo luttuɓe boo hakkilɓe.

³Faataaɓe ngaddi pittirlaaji muuɗum'en, ammaa ɓe njogaaki nebbam ngoɗɗam.

⁴Hakkilɓe ngaddi pittirlaaji muuɗum'en, ɓe njogi nebbam ngoɗɗam nder paali boo.

⁵Nde ɓaŋɗo waraay law, faanyɓe rewɓe ɓe'e fuu ngoŋngi, ɗaani.”

⁶Caka jemma ɓe nani hoolo: “Ndaa ɓaŋɗo! Umme, njaɓɓe mo.”

⁷Ɓe fuu ɓe pini, ɓe taaskitini pittirlaaji maɓɓe.

⁸Faataaɓe mbi'i hakkilɓe: Useni ndokke min haa nebbam mooɗon seɗɗa, ngam pittirlaaji amin ɗon nyifa!

⁹Hakkilɓe njaabi ɓe: Ɗum waɗataako! Ngam ɗum he'ataa en fuu, ndikka on njaha haa soorrooɓe, on coodoya.

¹⁰Faataaɓe ndilli soodoygo nebbam, wakkati man boo ɓaŋɗo yotti. Faanyɓe taaskitiiɓe nastidi bee maako nder suudu ɓaŋgal. Nden dammugal maɓɓaama.

¹¹Nde neeɓi seɗɗa, faanyɓe rewɓe luttuɓe go ngari, ɓe tappi dammugal: Jaagorɗo! Jaagorɗo! Maɓɓitan min!

¹²Ammaa o jaabi ɓe: “Gooŋga mbi'anmi on: Mi anndaa on.

¹³Ngam maajum ayne, ngam on anndaa nyalaade koo saa'i maajum.”

¹⁴“Ɗum laatoto bana goɗɗo mo yiɗi dillugo jahaaŋgal. O ewni huuwooɓe maako, o halfini ɓe mardi maako.

¹⁵O hokki gooto ceede kaŋŋeeri teemeɗɗe jowi, gooto teemeɗɗe ɗiɗi, tataɓo boo teemerre, haa koo moy maɓɓe fuu deydey semmbe muuɗum. Nden o dilli.

¹⁶Keɓɗo ceede kaŋŋeeri teemeɗɗe jowi dilli law, waɗi filu bee maaje. O heɓi riba ceede kaŋŋeeri teemeɗɗe jowi goɗɗe.

¹⁷Keɓɗo ceede kaŋŋeeri teemeɗɗe ɗiɗi dilli, waɗi bana man boo. O heɓi riba ceede kaŋŋeeri teemeɗɗe ɗiɗi goɗɗe.

¹⁸Ammaa keɓɗo ceede kaŋŋeeri teemerre dilli, wasi lesdi, nyukkini ceede jaagorɗo mum ton.

¹⁹Nde neeɓi jaagorɗo huuwooɓe go wartoyi, o ƴami ɓe lisaafi ceede maako.

²⁰Keɓɗo ceede kaŋŋeeri teemeɗɗe jowi go ɓaditi, wi'i: Jaagorɗo, a hokki yam ceede kaŋŋeeri teemeɗɗe jowi. Ndaa, mi heɓi riba teemeɗɗe jowi goɗɗe.

²¹Jaagorɗo maako wi'i mo: Booɗɗum, a kuuwoowo booɗɗo, koolaaɗo! A waŋgini adilaaku ma nder kuuje seɗɗa, mi halfinte kuuje ɗuuɗɗe. War, seyoda bee am!

²²Keɓɗo ceede kaŋŋeeri teemeɗɗe ɗiɗi go ɓaditi, wi'i: Jaagorɗo, a hokki yam ceede kaŋŋeeri teemeɗɗe ɗiɗi. Ndaa mi heɓi riba teemeɗɗe ɗiɗi goɗɗe.

²³Jaagorɗo maako wi'i: Booɗɗum, a kuuwoowo booɗɗo, koolaaɗo, a huuwi booɗɗum bee kuuje seɗɗa, mi halfinte kuuje ɗuuɗɗe. War, seyoda bee am!

²⁴Keɓɗo ceede kaŋŋeeri teemerre boo wari, wi'i: Jaagorɗo, mi anndi a goɗɗo caatuɗo, a ɗon soda haa a aawaay, a ɗon mooɓta boo haa a saakaay.

²⁵Mi huli, mi yehi, mi nyukkini ceede ma nder lesdi. Ndaa ceede ma.

²⁶Jaagorɗo maako wi'i mo: A kuuwoowo kalluɗo, mbaateendamjo! A anndi mi ɗon soda haa mi aawaay, mi ɗon mooɓta haa mi saakaay,

²⁷haandino a resa ceede am haa sigooɓe ceede, to mi warti mi heɓtanno ɗe am bee riba.

²⁸Njaɓte ceede kaŋŋeeri teemerre go haa maako, ndokke ɗe haa mo mari ceede kaŋŋeeri ujineere!

²⁹Ngam koo moy marɗo huunde, ɓe ɓesdanan mo haa o wona nder jeynitaare, ammaa mo walaa koo ɗume, ɓe koocan koo peetum maako.

³⁰Ammaa kuuwoowo meereejo go, ngudine mo yaasi nder nyiɓre. O woya, o hirƴindira nyii'e ton.”

³¹“To Ɓii-neɗɗo wari nder tedduŋgal muuɗum bee malaa'ika'en muuɗum fuu, o jooɗoto dow leeso laamu maako.

³²Ummaatooje duniyaaru fuu mooɓtoto yeeso maako, o senndan yimɓe bana gaynaako senndirta baali bee be'i.

³³O darnan baali haa nyaamo maako, be'i boo haa nano maako.

³⁴Nden laamiiɗo wi'an wonɓe haa nyaamo muuɗum: Ngare, onon barkiɗinaaɓe Baabiraawo am, ndone laamu taaskitinaaŋgu ngam mooɗon diga tageeki duniyaaru.

³⁵Ngam mi beelaaɗono, on nyaamni yam, mi ɗomɗuɗono, on njarni yam, mi koɗono, on mbeerni yam,

³⁶mi walaano limce, on ɓorni yam, mi nyawɗono, on ngilli yam, mi kaɓɓaaɗono nder suudu fursina[27], on ngilli yam.

³⁷Nden adili'en ɓe'e ƴaman mo: Jawmiraawo, ndey min ngi'i ma a beelaaɗo, min nyaamni ma? Malla a ɗomɗuɗo, min njarni ma?

³⁸Ndey min ngi'i ma a koɗo, min mbeerni ma? Malla a walaa limce, min ɓorni ma?

³⁹Ndey min ngi'i ma a nyawɗo malla a kaɓɓaaɗo nder suudu fursina, min ngilli ma?

⁴⁰Laamiiɗo jaaboto ɓe: Gooŋga mbi'anmi on: Ko on mbaɗani gooto nder deerɗiraaɓe am ɓurɓe leesugo ɓe'e, min on mbaɗani.

⁴¹Nden laamiiɗo wi'an wonɓe haa nano muuɗum: Ndaayeeɗam, onon naalaaɓe! Ndille nder yiite duumiiŋge, taaskitinaaŋge ngam Iblisa e malaa'ika'en muuɗum.

⁴²Ngam mi beelaaɗono, on nyaamnaay yam, mi ɗomɗuɗono, on njarnaay yam.

⁴³Mi koɗono, on mbeernaay yam, mi walaano limce, on ɓornaay yam, mi nyawɗono, mi kaɓɓaaɗono haa suudu fursina, on ngillaaki yam.

⁴⁴Nden ɓe ƴaman mo: Jawmiraawo, ndey min ngi'i ma a beelaaɗo malla a ɗomɗuɗo, a koɗo malla a walaa limce, a nyawɗo malla a kaɓɓaaɗo nder suudu fursina, min cuklanaaki ma?

⁴⁵Laamiiɗo jaaboto ɓe: Gooŋga mbi'anmi on: Ko on mbaɗanaay gooto nder yimɓe am ɓurɓe leesugo ɓe'e, min on cali waɗango ɗum.

⁴⁶Kamɓe ɓe nastan haa yaŋgada nduumiika, ammaa adili'en go keɓan ngeendam nduumiiɗam.”