Read Fulfulde Matta 26 Bible Online

Matta 26 - Fulfulde bible

Matta 26

¹Nde Yeesu timmini wolwugo bolle ɗe'e fuu, o wi'i pukara'en maako:

²“On anndi lutti nyalɗe ɗiɗi haa juulde Paska waɗa. Ɓe ndokkan Ɓii-neɗɗo ngam ɓilugo mo dow leggal gaafaaŋgal.”

³Saa'i man mawɓe liman'en e ndotti'en ummaatoore kawti haa saare Kayafas, hooreejo liman'en.

⁴Ɓe carwootiri haa ɓe ƴoyra Yeesu, ɓe naŋnga mo, ɓe mbara mo.

⁵Ammaa ɓe mbi'i: “Taa en mbaɗa ɗum wakkati juulde, ngam taa ɗum ummina fitina caka ummaatoore.”

⁶Yaake Yeesu ɗonno haa Baytaniya nder saare Simon, kuturuujo,

⁷debbo feere ɓaditi mo. O ɗon jogi faandu saɗndu heewndu uurdi marndi saman masin. O rufi ndi dow hoore Yeesu saa'i o ɗonno nyaama.

⁸Nde pukara'en ngi'i ɗum, ɓe ɓerni, ɓe mbi'i: “Wonnuru meere, ko ɗum nafi!

⁹To ɓe coorrino uurdi man, ɓe keɓanno ceede ɗuuɗɗe, haa ɓe ndokka ɗe talaka'en.”

¹⁰Nde Yeesu anndi ko ɓe mbolwata, o wi'i ɓe: “Koni on ɗon pitina debbo oo? O huuwani yam kuugal booɗŋgal.

¹¹Ngam talaka'en ngondan bee mooɗon foroy, ammaa min, mi wondataa bee mooɗon foroy.

¹²O rufi uurdi dow ɓanndu am ngam uweeki am.

¹³Gooŋga mbi'anmi on: Haa ɓe ngaazoto Linjiila ka'a nder duniyaaru fuu, ɓe mbolwan ko debbo oo waɗi, ngam siftorgo mo.”

¹⁴Nden gooto nder pukara'en sappo e ɗiɗo mo innde muuɗum Yahuuda Iskariyot, yehi haa mawɓe liman'en.

¹⁵O wi'i ɓe: “Ɗume on ndokkatammi to mi hokki on Yeesu?” Ɓe limani mo ceede cardi cappanɗe tati.

¹⁶Diga saa'i man Yahuuda fuɗɗi tefugo saa'iire fottannde haa o hokka ɓe Yeesu.

¹⁷Nder nyalaade go'oore juulde tamseeje ɗe ufnaaka, pukara'en Yeesu ɓaditi, ƴami mo: “Haa toy a yiɗi min mbaɗa taaskara kiirtaari Paska?”

¹⁸Nden Yeesu wi'i ɓe: “Njehe nder berniwol, haa wayne, mbi'e mo: Moodibbo wi'i: Wakkati am wari, mi yiɗi waɗugo juulde Paska bee pukara'en am haa saare maaɗa.”

¹⁹Pukara'en mbaɗi ko Yeesu umri ɓe, ɓe taaskitini kiirtaari Paska.

²⁰Nde kiikiiɗe waɗi, Yeesu jooɗodi bee pukara'en muuɗum sappo e ɗiɗo ngam haa ɓe nyaama.

²¹Nde ɓe ɗon nyaama, Yeesu wi'i: Gooŋga mbi'anmi on: “Gooto mooɗon zammboto yam.”

²²Ɗum suni pukara'en masin, koo moy maɓɓe fuɗɗi ƴamugo mo: “Naa ɗum min sika, Jawmiraawo?”

²³Yeesu jaabi: “Mo ɗon suuwa juŋngo mum bee am nder le'al jonta, kaŋko zammboto yam.

²⁴Gooŋga Ɓii-neɗɗo maayan bana ko winnda dow maako. Ammaa bone laatanto mo zammboto Ɓii-neɗɗo, to o danyaakano, ɓurananno mo.”

²⁵Yahuuda zammbotooɗo mo ƴami: “Naa ɗum min sika, Moodibbo?” Yeesu jaabi mo: “Bana mbi'ɗa, ɗum an!”

²⁶Nde ɓe ɗon nyaama, Yeesu hoo'i tamseere, o yetti Allah, o yewi nde, o hokki pukara'en maako, o wi'i ɓe: “Koo'e ɗum, nyaame, ɗum ɓanndu am.”

²⁷Nden o hoo'i jardugel, o yetti Allah, o hokki ɓe, o wi'i: “Njare on fuu,

²⁸ngam ɗum ƴiiƴam am, ndufaaɗam ngam yaafuye hakkeeji yimɓe ɗuuɗɓe, bee maajam Allah tabitiniri alkawal muuɗum.

²⁹Mi ɗon wi'a on: Yeeso ɗo, mi meetataa yarugo inaboojam ɗa'am sam, haa nyannde njardanmi kesam bee mooɗon nder laamu Baabiraawo am.”

³⁰Nden ɓe ngimi gime maŋgtooje, ɓe ndilli haa Hooseere Jaytunje.

³¹Dow laawol Yeesu wi'i pukara'en muuɗum: “Jemmaare nde'e on accatam on fuu. Ngam Deftere wi'i: Mi mbaran gaynaako, tokkere baali boo saŋkititto.

³²Ammaa to mi ummitake, mi aartan on yahugo lesdi Galiili.”

³³Piyer wi'i mo: “Koo to yimɓe fuu acci ma, min kam mi accataa ma sam!”

³⁴Yeesu jaabi mo: “Gooŋga mbi'anmaami: Jemmaare nde'e, hiddeko asgumri[28] u'a, a wi'an nde tati a anndaa yam.”

³⁵Piyer wi'i mo: “Mi meeɗataa wi'go mi anndaa ma koo to doole mi maayda bee maaɗa.” Pukara'en luttuɓe fuu mbi'i non.

³⁶Nden Yeesu wardi bee pukara'en muuɗum haa nokkuure wi'eteende Gecemane, o wi'i ɓe: “Njooɗe haa ɗo, haa mi waɗoya do'a haa to.”

³⁷O yahdi bee Piyer e ɓiɓɓe Zebede ɗiɗo, o fuɗɗi sunaago e maatugo torra nder ɓernde maako.

³⁸Nden o wi'i ɓe: “Torra ɓernde am yiɗi mbarugo yam. Tokke jooɗaago haa ɗo, ayne bee am.”

³⁹O yehi yeeso seɗɗa, o hippi yeeso maako haa lesdi, o waɗi do'a bana ni'i: “Baabiraawo am, to ɗum heɓoto, daaynanam jardugel torra nge'el. Ammaa waɗ ko ngiɗɗa, naa ko ngiɗmi.”

⁴⁰O lori haa pukara'en tato go, o tawi ɓe ɗaanake. O wi'i Piyer: “On mbaawaay aynugo bee am koo saa'a ngoota!

⁴¹Ayne, tore, ngam taa on nasta jarribeeki. Ko ruuhu neɗɗo yiɗi, ɓanndu muuɗum waawataa waɗugo ɗum, ngam ndu tampundu.”

⁴²O yehi ɗiɗawre, o waɗi do'a bana ni'i: “Baabiraawo am, to heɓataako jardugel ngel daayo, accammi, nden kam sey mi yara ngel, muuyo maaɗa laato.”

⁴³O lorti haa pukara'en maako fahin, o tawi ɓe ɓe ɗon ɗaani, ngam gite maɓɓe teddi.

⁴⁴O acci ɓe, o yehi fahin, o waɗi do'a kal-kal bana naane.

⁴⁵Nden o lorti haa pukara'en maako, o wi'i ɓe: “On ɗon ɗaani haa jonta na? On ɗon ciwto na? Ndaa saa'i waɗi haa ɓe ndokka Ɓii-neɗɗo haa juuɗe marɓe hakke.

⁴⁶Umme, ndillen! Ndaa zammbotooɗo yam ɓaditake.”

⁴⁷Diga Yeesu timminaay wolwugo tawon, Yahuuda, gooto nder pukara'en sappo e ɗiɗo wari. Yimɓe ɗuuɗɓe ngardi bee maako, ɓe ɗon njogi kaafaaje e cabbi. Mawɓe liman'en e ndotti'en Yahuudu'en neli ɓe.

⁴⁸Yahuuda, zammbotooɗo Yeesu, hokkuno ɓe alaama, wi'i: “Mo mi hebbata, ɗum kaŋko, naŋnge mo.”

⁴⁹Law Yahuuda ɓaditi Yeesu, wi'i mo: “Sannu, moodibbo!” Nden o hebbi mo.

⁵⁰Yeesu wi'i mo: “Soobaajo, timmin ko waddu ma haa ɗo.” Nden yimɓe ɓaditi, ukki dow Yeesu, naŋngi ɗum.

⁵¹Gooto nder wonduɓe bee Yeesu losi kaafahi muuɗum, fe'i suka hooreejo liman'en, ta'i mo nofru.

⁵²Ammaa Yeesu wi'i mo: “Waatu kaafahi maaɗa haa suudu maaki! Ngam hoosanɓe kaafahi kalkiran bee maaki.

⁵³Malla a anndaa mi waawanno toraago Baabiraawo am ballal, kaŋko boo o neldanno yam mooɓe malaa'ika'en mawɗe sappo e ɗiɗi na?

⁵⁴Ammaa to non kam, noy ko winnda nder Defte Ceniiɗe gooŋɗirta? Ngam ɗe mbi'i sey ɗum laato bana nii.”

⁵⁵Saa'i man, Yeesu wi'i ɓe: “On ngari naŋngugo yam bee kaafaaje e cabbi bana mi pasoowo! Tum mi ɗonno jooɗi nder haykaliiru, mi ɗonno ekkitina yimɓe, on naŋngaay yam!

⁵⁶Ammaa ɗum fuu ɗum waɗi ngam haa ko winnda nder defte annabi'en ngooŋɗa.” Nden pukara'en fuu acci mo, ndoggi.

⁵⁷Naŋnguɓe Yeesu njahri mo haa saare Kayafas, hooreejo liman'en. Moodiɓɓe tawreeta e Ndotti'en ɗon mooɓi ton.

⁵⁸Piyer tokki Yeesu haa daayiiɗum, haa yotti daldal saare hooreejo liman'en. O nasti saare, o jooɗodi bee aynooɓe ton, haa o laara no ɗum timmirta.

⁵⁹Mawɓe liman'en e hiitooɓe nder dawriinde fuu ɗaɓɓi wullaandu dow Yeesu haa ɓe ndo'a mo kiita maayde.

⁶⁰Ammaa ɓe keɓaay, koo nde seedooɓe fewooɓe ɗuuɗɓe ngari. Ɓaawoɗon yimɓe ɗiɗo ngari,

⁶¹mbi'i: “Goɗɗo oo wi'no: Mi waawan yibbingo haykaliiru Allah, mi mahita ndu nder nyalɗe tati.”

⁶²Hooreejo liman'en ummi, wi'i Yeesu: “A jaabataako koo ɗume na? Ko mbi'ɗa dow gullaali wulliiɓe ma ɓe'e?”

⁶³Ammaa Yeesu jeeɗi. Nden hooreejo liman'en wi'i mo: “Mi ɗon hunne bee innde Allah geeto, wi' min: An woni Almasiihu, Ɓiɗɗo Allah na?”

⁶⁴Yeesu wi'i mo: “Nonnon, bana mbi'ɗa. Ammaa mi ɗon wi'a on: Yeeso ɗo, on ngi'an Ɓii-neɗɗo ɗon jooɗi haa nyaamo Allah Baawɗo. On ngi'an mo boo o ɗon wara dow duule asama.”

⁶⁵Nden hooreejo liman'en seeki limce muuɗum, wi'i: “O wolwi kalluka dow Allah! En ngalaa haaje seedooɓe feere, kalluka ka on nani jonta he'i.

⁶⁶Ko mbi'ɗon?” Ɓe njaabi mo: “O he'i mbareego.”

⁶⁷Nden ɓe tuuti mo tuuɗe haa yeeso, ɓe lukki mo bee juuɗe, ɓe maari mo,

⁶⁸ɓe mbi'i: “An Almasiihu, heɓtu mo fiyi ma, to a annabiijo!”

⁶⁹Piyer ɗonno jooɗi haa daldal saare go, nden korɗo hooreejo liman'en wari haa maako, wi'i mo: “An boo a ɗonno wondi bee Yeesu mo Galiili.”

⁷⁰Ammaa Piyer yeddi ɗum yeeso yimɓe fuu, wi'i: “Mi anndaa ko a yiɗi wi'go.”

⁷¹Nde o yehi gal dammugal zawleeru, debbo feere yi'i mo, wi'i yimɓe wonɓe ton: “Goɗɗo oo ɗonno wondi bee Yeesu mo Nasaratu.”

⁷²Piyer yeddi fahin, wi'i: “Mi hunake, gooŋga mi anndaa mo.”

⁷³Yeeso seɗɗa, yimɓe dariiɓe ton ngari haa Piyer, ɓe mbi'i mo: “Fakat a gooto maɓɓe, ɗemŋgal maaɗa ɗon waŋgina ɗum bee laaɓɗum.”

⁷⁴Nden Piyer wi'i: “Allah hiito yam to mi fewi. Mi hunake, gooŋga mi anndaa gorko oo!” Saa'i man nden, asgumri[29] u'i.

⁷⁵Piyer siftori ko Yeesu wi'no mo: “Hiddeko asgumri u'a, a wi'an nde tati a anndaa yam.” O wurti haa yaasi, o woyi masin.