Read Fulfulde Matta 5 Bible Online

Matta 5 - Fulfulde bible

Matta 5

¹Nde Yeesu yi'i mooɓre ɗuuɗnde nde'e, o wa'i hooseere, o jooɗi. Pukara'en[6] maako ngari haa maako.

²O fuɗɗi ekkitingo ɓe, o wi'i:

³“Barka laatanto annduɓe ko'e muuɗum'en ɓe talaka'en fodde Ruuhu, ngam kamɓe njeyi laamu asamanji.

⁴Barka laatanto woyanɓe, ngam Allah de'itinan ɓe.

⁵Barka laatanto yaŋkiniiɓe, ngam ɓe ndonan lesdi.

⁶Barka laatanto ɗaɓɓanɓe waɗugo muuyo Allah bee ɓernde fuu, ngam Allah hokkan ɓe ko ɓe ɗaɓɓi.

⁷Barka laatanto enɗooɓe, ngam Allah enɗan ɓe.

⁸Barka laatanto laaɓa-ɓerɗe'en, ngam ɓe ngi'an Allah.

⁹Barka laatanto sulhindiranɓe yimɓe, ngam ɓe wi'eteeɓe ɓiɓɓe Allah.

¹⁰Barka laatanto toonyaaɓe ngam ɓe ɗon ngaɗa ko Allah yiɗi, ngam kamɓe njeyi laamu asamanji.

¹¹Barka laatanto on, to yimɓe kuɗi on malla toonyi on malla mbaɗi tufle feere feere dow mooɗon daliila am.

¹²Ceye, mbelmbelte masin ngam Allah warjoto on mbarjaari ɗuuɗndi haa asamanji. Bana non ɓe toonyino annabi'en aartuɓe on.”

¹³“Onon ngoni mannda ngam duniyaaru: Ammaa to lammeeŋga mannda ittake, noy ɗam heɓtirta lammeeŋga maajam fahin? Mannda man nafataa sam, sey wudingo ɗam yaasi tan, yimɓe njaaɓan ɗam.

¹⁴Onon ngoni annoora ngam duniyaaru, berniwol nyiɓaaŋgol dow hooseere wiirnataako sam.

¹⁵Ɓe njamnataa boo pittirla ngam suuɗugo nga les bokoti. Ammaa ɓe njo'ina nga dow jo'inirɗum pittirla, haa nga yaynana wonɓe nder suudu man fuu.

¹⁶Sey annoora mooɗon yayna bana non yeeso yimɓe, ngam haa ɓe ndaara kuuɗe mooɗon booɗɗe, ɓe teddina Baabiraawo mooɗon mo asama.”

¹⁷“Taa nume mi wari fiistugo tawreeta Muusa malla bolle annabi'en. Mi waraay ngam fiistugo ɗum, ammaa ngam hiɓɓingo ɗum.

¹⁸Gooŋga mbi'anmi on: No asama e lesdi nduurdi fuu, walaa koo harfeere ɓurdunde famɗugo malla toɓɓere woore haa tawreeta Muusa wudinte, haa to kuuje fuu laatake.

¹⁹Ngam man koo moy luuti umroore ɓurdunde famɗugo nder tawreeta malla ekkitini woɗɓe waɗugo bana non, laatoto ɓurduɗo leesugo nder laamu asamanji. Ammaa koo moy jogi ɗe, ekkitini woɗɓe boo jogaago ɗe, kaŋko o laatoto mawɗo nder laamu asamanji.

²⁰Gooŋga mbi'anmi on: On keɓataa nastugo laamu asamanji sam, sonaa to adilaaku mooɗon ɓuri ngu moodiɓɓe tawreeta e Farisa'en.”

²¹“On nani ko wi'a haa kaakiraaɓe meeɗen: Taa mbar-hoore. Koo moy mbari goɗɗo, he'i hiiteego.

²²Ammaa min mi ɗon wi'a on: Koo moy tikkani deerɗum, he'i yahreego yeeso alkaali. Koo moy wi'i deerɗum: A meereejo, he'i yahreego yeeso hiitooɓe nder dawriinde. Koo moy wi'i deerɗum: A ginnaaɗo, ɗum he'i nastingo mo nder yiite jahannama.

²³Ngam maajum to a wari haa hirsirde bee dokkal ma, ton a siftori woodi deerɗiraawo ma ɗon tikkani ma,

²⁴nden kam accu dokkal maaɗa haa hirsirde ton, yah law, sulhotir bee deerɗa tawon. Nden a loro, a lii'ano Allah dokkal maaɗa.

²⁵To goɗɗo wullake ma, nden on ɗon njahda haa alkaali, yaaw narrugo bee maako law diga on ɗon dow laawol tawon, ngam taa o yahre haa juŋngo alkaali, alkaali boo hokke haa juuɗe sooje'en, ɓe nastine fursina[7].

²⁶Gooŋga mbi'anmaami: A wurtataako ton sam, sonaa to a yoɓi ko o tokki ma fuu.”

²⁷“On nani ɗum wi'aama: Taa waɗ njeenu.

²⁸Ammaa min mi ɗon wi'a on: Koo moy to laari debbo bee suuno, waɗi njeenu bee muuɗum nder ɓernde muuɗum.

²⁹To yiitere ma nyaamre laatanake ma fergere, ɗoof nde, wudin nde daayiiɗum. Ngam ndikka a majjina tergal ɓanndu ma gootal dow ɓanndu ma fuu wube nder yiite jahannama.

³⁰To juŋngo ma nyaamo laatanake ma fergere, ta'u ngo, wudin ngo daayiiɗum. Ngam ndikka a majjina tergal ɓanndu ma gootal dow ɓanndu ma fuu nasta yiite jahannama.”

³¹“Ɗum wi'aama boo: Mo yiɗi seerugo debbo mum, sey hokka mo ɗereewol ceergal.

³²Ammaa min mi ɗon wi'a on: Koo moy seeri debbo muuɗum, naa ngam debbo oo njeeni, nden kam o laatini mo jeenoowo. Koo moy te'i debbo ceeraaɗo boo, waɗi njeenu.”

³³“On nani boo ko wi'a kaakiraaɓe meeɗen: Taa huna dow fewre, ammaa hebbin hunayeere ma yeeso Jawmiraawo.

³⁴Ammaa min mi ɗon wi'a on: Taa kunore sam, koo bee asama, ngam ɗum leeso laamu Allah,

³⁵koo bee lesdi, ngam ɗum jaaɓruɗum kosɗe Allah, koo bee Urusaliima boo, ngam ɗum berniwol Laamiiɗo Mawɗo.

³⁶Taa kunore koo bee ko'e mon boo, ngam on mbaawataa wartirgo gaasa mooɗon ndaneeha malla ɓaleeha.

³⁷Sey ooho mooɗon laato ooho, aa'a mooɗon boo laato aa'a tan, ngam wolwugo ko ɓuri non, iwi haa Kalluɗo.”

³⁸“On nani ɗum wi'aama: Yiitere bee yiitere, nyiindere bee nyiindere.

³⁹Ammaa min mi ɗon wi'a on: Taa mbaate baɗɗo on halleende. To goɗɗo maari ma haa galaŋgal nyaamal, waylitan mo nanal boo.

⁴⁰To goɗɗo yiɗi wullaago ma ngam o jaɓta toggoyel maaɗa, accu mo o hoosa ngapaleewol maaɗa boo.

⁴¹To goɗɗo dooli ma yahugo kilomeetir gootel, yah kilomeetir ɗiɗi.

⁴²To goɗɗo ƴami ma huunde, hokku mo nde. To goɗɗo ƴami ma nyamaande, taa salana mo.”

⁴³“On nani ɗum wi'aama: Yiɗ keeddiɗɗiraawo ma, a wanya konneejo ma.

⁴⁴Ammaa min mi ɗon wi'a on: Ngiɗe konne'en mooɗon, tore Allah ngam toonyiiɓe on,

⁴⁵ngam haa on laato ɓiɓɓe Baabiraawo mooɗon mo asama. O ɗon fuɗna naaŋge maako dow halluɓe e wooɗɓe fuu, o ɗon toɓna iyeende dow adili'en e dow sooya-adilaaku'en.

⁴⁶Mbarjaari ndiye Allah tammi hokkugo on to on ngiɗi yiɗɓe on tan? Koo jomnooɓe boo ɗon mbaɗa bana non!

⁴⁷To on ɗon koofna banndiraaɓe mooɗon tan, on mbaɗi huunde kaayeefiire na? Koo heefeerɓe boo ɗon mbaɗa bana non!

⁴⁸Laate on timmuɓe, bana Baabiraawo mooɗon mo asama o timmuɗo.”