Read Fulfulde Matta 6 Bible Online

Matta 6 - Fulfulde bible

Matta 6

¹“Kakkile: Taa kuuwe kuuɗe adilaaku ngam yimɓe ngi'a on. To on mbaɗi non, on keɓataa mbarjaari haa Baabiraawo mooɗon mo asama.

²To a ɗon hokka talakaajo huunde, taa wooynu ɗum, bana naafiki'en mbaɗata nder cuuɗi dewal e dow laabi. Ɓe ɗon mbaɗa non ngam yimɓe teddina ɓe. Gooŋga mbi'anmi on: Ɓe keɓi mbarjaari maɓɓe, jinni.

³Ammaa an, to a ɗon hokka talakaajo huunde, taa juŋngo ma nano anndita ko nyaamo waɗata,

⁴ngam haa dokkal ma wona nder cuuɗiiɗum, Baabiraawo ma gi'anɗo ko mbaɗata nder cuuɗiiɗum, warjoto ma.”

⁵“Nde on ɗon mbaɗa do'a fuu, taa laate bana naafiki'en. Kamɓe ɓe ngiɗi daraago nder cuuɗi dewal e haa kawtirɗe laabi, ɓe mbaɗa do'a ngam yimɓe ngi'a ɓe. Gooŋga mbi'anmi on: Ɓe keɓi mbarjaari maɓɓe, jinni.

⁶Ammaa an, nde a yiɗi waɗugo do'a fuu, nastu suudu ma, maɓɓu dammugal, nden tora Baabiraawo ma gonɗo nder cuuɗiiɗum, Baabiraawo ma gi'anɗo ko mbaɗata nder cuuɗiiɗum, warjoto ma.

⁷To on ɗon mbaɗa do'a, taa ɗuɗɗine bolle meereeje bana heefeerɓe mbaɗata. Ɓe ɗon tammo Allah nanan do'a maɓɓe to ɓe ɗuɗɗini bolle.

⁸Taa mbaɗe bana maɓɓe, ngam Baabiraawo mooɗon anndi haaje mooɗon diga on ciwaa toraago mo.”

⁹Ngam man, onon, to on ɗon mbaɗa do'a, ndaa nii mbi'oton: “Yaa Baabiraawo amin mo asama, a Ceniiɗo, waɗ koo moy teddina innde ma.

¹⁰Laamu maaɗa wara. Muuyo ma laato nder duniyaaru bana haa asama.

¹¹Hokku min nyaamdu deydey haaje amin hannde.

¹²Yaafana min aybeeji amin, bana no minin boo min njaaforani waɗɓe min aybe[8].

¹³Aynu min ngam taa min nasta jarribeeki, ammaa hisnu min diga Kalluɗo. [Ngam an mari laamu e baawɗe e tedduŋgal, haa foroy. Aamiina!]

¹⁴To on njaafanake woɗɓe aybeeji muuɗum'en, Baabiraawo mooɗon mo asama yaafanto on boo.

¹⁵Ammaa to on njaafanaaki woɗɓe, nden kam Baabiraawo mooɗon boo yaafantaako on hakkeeji mooɗon.”

¹⁶“Nde on ɗon cuumo fuu, taa mbaɗe bana naafiki'en: Ɓe ɗon nyiɓɓina geese maɓɓe, ɓe ɗon nyobba ɗe ngam haa yimɓe ngi'a ɓe ɗon cuumi. Gooŋga mbi'anmi on: Ɓe keɓi mbarjaari maɓɓe, jinni.

¹⁷Ammaa an, to a ɗon suumo, sulmu e wuja yeeso ma,

¹⁸ngam taa yimɓe anndita a ɗon suumi. Sey Baabiraawo ma gonɗo nder cuuɗiiɗum kaŋko tan anndi. O ɗon yi'a ko mbaɗata nder cuuɗiiɗum, o warjoto ma.”

¹⁹“Taa paggane ko'e mooɗon jawdi haa duniyaaru, haa gilɗi e peewol mbonnata ɗum, haa wuyɓe boo ngasata cuuɗi, ngujja ɗum.

²⁰Ammaa paggane ko'e mooɗon jawdi haa asama, haa ton gilɗi e peewol mbaawataa wonnugo ndi, wuyɓe boo mbaawataa sumpititgo cuuɗi, ngujja ndi.

²¹Ngam haa jawdi maaɗa woni, ton ɓernde maaɗa boo wonata.”

²²“Gite laati pittirla ɓanndu. To gite maaɗa njame, ɓanndu maaɗa fuu ɗon nder annoora.

²³Ammaa to gite maaɗa njamɗaay, ɓanndu ma fuu ɗon nder nyiɓre. Ngam maajum to annoora ngonka nder ma nyiɓɓi, nden kam nyiɓre man nyiɓɓan jamum.”

²⁴“Walaa mo waawata jagganaago jaagorɓe ɗiɗo, ngam o wanyan oo e o yiɗan oya malla o ɗakkotira bee oo e o meeriɗina oya. On mbaawataa jagganaago Allah e jawdi.”

²⁵“Ngam maajum mi ɗon wi'a on: Taa caklane nguure mooɗon, waato ko on nyaamata malla ko on njarata malla ko on ɓornoto. Yoŋki ɓuri nyaamdu saman, ɓanndu boo ɓuri limce saman, naa non na?

²⁶Ndaare colli: Ɗi aawataa, ɗi codataa, ɗi mooɓtataa koo ɗume nder beembe, ammaa Baabiraawo mooɗon mo asama ɗon nyaamna ɗi. On ɓurataa ɗi saman piw na?

²⁷Moy caka mooɗon waawi ɓesdugo balɗe muuɗum koo seɗɗa bee saklere muuɗum?

²⁸Ngam ɗume on caklanto haala limce? Ndaare pinndi ladde no ndi mawnirta. Ndi huuwataa, ndi sannyataa,

²⁹ammaa mi ɗon wi'a on: koo Suleymaanu bee daraja muuɗum fuu meeɗaay ɓornaago limce booɗɗe bana ngoori man.

³⁰Allah ɓorni huɗooji ɗi tawe hannde nder ladde, jaŋngo boo ɗi cakkine nder yiite. To non kam, o ɓornataa on ko ɓuri non na, onon famɗa-nuɗɗinki'en?

³¹Ngam maajum taa cakle ko'e mooɗon bee wi'go: Ɗume min nyaamata? Malla: Ɗume min njarata? Malla: Ɗume min ɓornoto?

³²Heefeerɓe cuklanto kuuje ɗe'e nde weeti fuu. Ammaa Baabiraawo mooɗon mo asama anndi on ngoodi haaje kuuje ɗe'e fuu.

³³Aarte suklanaago laamu Allah e adilaaku muuɗum, nden kam o hokkan on kuuje ɗe'e fuu bana ɓesdaari.

³⁴Taa caklane haala jaŋngo, ngam jaŋngo saklanto hoore muuɗum. Nyalaade fuu, torra maare he'i nde.”