Read Fulfulde Matta 7 Bible Online

Matta 7 - Fulfulde bible

Matta 7

¹“Taa laate hiitooɓe woɗɓe ngam taa Allah hiito on.

²Ngam Allah hiitoto on bana on kiitori woɗɓe, o etanan on bee etirgal ngal on etirani woɗɓe.

³Koni a ɗon yi'a kuɗel haa yiitere deerɗa, ammaa a hakkilantaa leggal gonŋgal nder yiitere ma?

⁴Noy mbi'rata deerɗa: Accu mi ittane kuɗel haa yiitere ma, an maa, leggal ɗon nder yiitere maaɗa!

⁵An naafikiijo, aartu ittugo leggal gonŋgal haa yiitere maaɗa, nden kam a yi'an laaɓɗum, haa a itta kuɗel nder yiitere deerɗa.

⁶Taa ndokke dawaaɗi huunde seniinde, ngam taa ɗi loro dow mooɗon, ɗi ceeka on. Taa cakkinane gaduuji luuluuje mon, ngam taa ɗi ndamma ɗe bee kosɗe maaji.”

⁷“Tore, on keɓan. Ɗaɓɓite, on tawan. Cilmine, ɓe maɓɓitanan on.

⁸Ngam koo moy tori, heɓan. Koo moy ɗaɓɓiti, tawan. Koo moy silmini boo, ɓe maɓɓitanan mo.

⁹Moyjo caka mooɗon, to ɓiŋngel muuɗum ƴami ɗum nyiiri, o hokkan ngel hayre?

¹⁰Malla to ngel ƴami ɗum liiŋgu, o hokkan ngel mboodi?

¹¹Onon halluɓe maa, on anndi hokkugo ɓiɓɓe mooɗon kuuje booɗɗe. Sakkomaa Baabiraawo mooɗon mo asama, o ɓurataa hokkugo kuuje booɗɗe haa torotooɓe mo na?

¹²Ngam maajum mbaɗane yimɓe ko ngiɗɗon ɓe mbaɗana on fuu. Kanjum Tawreeta Muusa e defte annabi'en caawi.”

¹³“Nastire dammugal paaɗŋgal. Ngam dammugal jaasŋgal e laawol jaasŋgol ɗon njahra haa halkere, ɗuuɗɓe ɗon tokko ton.

¹⁴Ammaa dammugal paaɗŋgal e laawol paaɗŋgol ɗon njahra haa ngeendam, tawɓe ngol ɗuuɗaay.”

¹⁵“Ndeente e fewooɓe wi'anɓe ɓe annabi'en, waranɓe haa mooɗon nder laral baali, ammaa nder maɓɓe ɓe caafaali kaaŋaaɗi.

¹⁶On annditan ɓe nder kuuɗe maɓɓe. Gi'e ndimataa inabooje, giŋngille boo ndimataa ibbe.

¹⁷Non boo, lekki booɗki ɗon rima ɓiɓɓe booɗɗe, lekki kalluki boo ɗon rima ɓiɓɓe kalluɗe.

¹⁸Lekki booɗki rimataa ɓiɓɓe kalluɗe, lekki kalluki boo rimataa ɓiɓɓe booɗɗe.

¹⁹Lekki ki rimataa ɓiɓɓe booɗɗe fuu, ɓe pe'an ki, ɓe ngudina ki nder yiite.

²⁰Bana non boo on annditiran fewooɓe wi'anɓe ɓe annabi'en bee kuuɗe maɓɓe.”

²¹“Annde, naa wi'anɓe yam: Jawmiraawo, Jawmiraawo fuu nastata laamu asamanji, sey waɗanɓe muuyo Baabiraawo am mo asama.

²²Nyalaade man, ɗuuɗɓe mbi'atam: Jawmiraawo, Jawmiraawo! Naa bee innde ma min mbaɗi annabaaku, min ndiiwi ginnaaji e min mbaɗi kaayeefiiji ɗuuɗɗi!

²³Nden mi wi'an ɓe bee baŋguɗum: Mi meeɗaay anndugo on sam, onon waɗooɓe halleende, ndille!”

²⁴“Ngam maajum koo moy nani bolle ɗe'e, ɗowtani ɗe, nanndi bee goɗɗo marɗo hakkiilo, mahɗo suudu mum dow tapaare.

²⁵Iyeende toɓi, maaje ngaddi ndiyam, keni ummi dow suudu man, ammaa ndu yibbaay, ngam ndu mahaandu dow tapaare.

²⁶Ammaa koo moy nani bolle ɗe'e, ɗowtanaaki ɗe, nanndi bee goɗɗo mo walaa hakkiilo, mahɗo suudu muuɗum dow njaareendi.

²⁷Iyeende toɓi, maaje ngaddi ndiyam, keni mbaɗi dow suudu man, ndu yibbi yibbere hallunde.”

²⁸Nde Yeesu timmini wolwugo bolle ɗe'e, ekkitinol maako hayɗini mooɓe fuu,

²⁹ngam o ekkitinaay ɓe bana moodiɓɓe tawreeta ekkitinirta, ammaa bana marɗo baawɗe.