Read Fulfulde Matta 9 Bible Online

Matta 9 - Fulfulde bible

Matta 9

¹Yeesu nasti koommbowal[10], ta'i weendu, warti wuro muuɗum.

²Ɓe ngaddani mo waata-terɗeejo, ɓe ɗon ndoondi mo dow be'itte. Nde Yeesu yi'i nuɗɗinki maɓɓe, o wi'i waata-terɗeejo: “Ɓiŋngel am, tiɗɗin ɓernde ma, hakkeeji maaɗa njaafaama.”

³Moodiɓɓe tawreeta woɗɓe numi: “Gorko oo ɗon wolwa kalluka dow Allah.”

⁴Yeesu anndi numooji maɓɓe, o wi'i: “Koni numoton numooji kalluɗi?

⁵Ko ɓuri hoygo? Wi'go mo: Hakkeeji maaɗa njaafaama naa malla wi'go mo: Umma, yah?

⁶Ammaa ngam haa mi faamtina on Ɓii-neɗɗo woodi baawɗe yaafaago hakkeeji nder duniyaaru…” Nden o wi'i waata-terɗeejo go: “Umma, hoocu be'itte ma, hootu saare ma.”

⁷O ummi, o hooti saare maako.

⁸Nde yimɓe ngi'i ɗum, ɓe kultori, ɓe teddini Allah ngam o hokki ɓiɓɓe Adaama baawɗe bana ɗe'e.

⁹Yeesu ummi nokkuure man, dilli. Nden o yi'i bi'eteeɗo Matta ɗon jooɗi haa baariki jomorgol. Yeesu wi'i mo: “Tokkam.” Matta ummi, tokki mo.

¹⁰Nde Yeesu ɗon nyaamda bee pukara'en muuɗum haa saare Matta, jomnooɓe woɗɓe e hakke'en ngari nyaamdi bee maɓɓe.

¹¹Farisa'en ngi'i ɗum, ƴami pukara'en Yeesu: “Koni moodibbo mooɗon ɗon nyaamda bee jomnooɓe e hakke'en?”

¹²Yeesu nani ko ɓe mbi'i, nden o wi'i ɓe: “Yamɓe ngalaa haaje kurgoowo, sey nyawɓe.

¹³Ndille, ekkite ko saawi nder bolle ɗe'e: Enɗam ngiɗmi, naa dabbaaji kirsaaɗi. Mi waraay ewnaago adili'en, ammaa hakke'en.”

¹⁴Nden pukara'en Yuhanna ngari haa Yeesu, ƴami mo: “Ngam ɗume minin bee Farisa'en min ɗon cuumo, ammaa pukara'en maaɗa cuumataako?”

¹⁵Yeesu jaabi ɓe: “Kadi on tammi ewnaaɓe haa ɓaŋgal cunoto saa'i ɓe ɗon ngondi bee ɓaŋɗo na? Naa non sam! Wakkati waran ɓaŋɗo tawataake bee maɓɓe, saa'i maajum ɓe cuumoto.

¹⁶Walaa mo takkata leppel kesel dow limce kiiɗɗe, ngam leppel kesel fooɗan limce kiiɗɗe, nden ceekgol man tullitan.

¹⁷Walaa mo loowata inaboojam kesam nder kanyakanyaaji[11] kiiɗɗi boo. Ngam inaboojam kesam seekan ɗi, ɗam rufa, kanyakanyaaji boo mbonnoto. Ammaa ɓe loowan inaboojam kesam nder kanyakanyaaji kesi, nden kam walaa ko wonnoto.”

¹⁸Saa'i Yeesu ɗon wolwana ɓe bolle ɗe'e, mawɗo feere wari haa maako, tuggi koppi, wi'i mo: “Ɓiŋngel am deyel maayi jonta nii. Ammaa useni, war, wallin juŋngo maaɗa dow maagel, nden ngel yeeɗitan.”

¹⁹Yeesu ummi, kaŋko bee pukara'en maako, ɓe tokki mo.

²⁰Woodi debbo torraaɗo nyawu ilugo ƴiiƴam waɗi duuɓi sappo e ɗiɗi. O ɓaditi gal ɓaawo Yeesu, o meemi gawargal limce Yeesu,

²¹ngam o numno: “To mi meemi koo limce maako tan, mi yamɗitan.”

²²Yeesu yeesiti, laari mo, wi'i mo: “Tiɗɗin ɓernde ma, ɓiŋngel am, nuɗɗinki maaɗa hisni ma.” Debbo man yamɗiti saa'i man nden.

²³Nde Yeesu yotti saare mawɗo go, o yi'i fuufooɓe ciide e mooɓre ɗon waɗa hoolo,

²⁴o wi'i: “Ngurte ɗo, ngam ɓiŋngel maayaay, ammaa ngel ɗon ɗaani.” Ammaa ɓe njanci mo.

²⁵Nde ɓe ngurtini mooɓre nde'e fuu yaasi, Yeesu nasti suudu, naŋngi juŋngo ɓiŋngel, nden ngel ummi.

²⁶Habaru man saŋkiti nder lesdi man fuu.

²⁷Nde Yeesu ummi nokkuure man, ɗonno dilla, wumɓe ɗiɗo tokki mo, ɓe ɗon mbi'a bee sawtu: “An Ɓii Daawuda, enɗu min!”

²⁸Nde Yeesu nasti saare, wumɓe go ɓaditi mo. O ƴami ɓe: “On nuɗɗini mi woodi baawɗe waɗugo ɗum na?” Ɓe njaabi mo: “Ooho, Jawmiraawo, a woodi baawɗe man.”

²⁹Nden Yeesu meemi gite maɓɓe, wi'i: “Ɗum laatano on bana on nuɗɗini.”

³⁰Law gite maɓɓe mbumti. Nden Yeesu barri[12] ɓe, wi'i: “Taa goɗɗo koo gooto nana haala ka.”

³¹Ammaa kamɓe ɓe njehi, ɓe caŋkiti habaru Yeesu nder lesdi man fuu.

³²Saa'i ɓe ɗon ndilla, yimɓe ngaddani Yeesu goɗɗo mo waawataa wolwugo sam, ngam o marɗo ginnawol.

³³Yeesu riiwi ginnawol man, muukaajo fuɗɗi wolwugo. Mooɓre hayɗini, wi'i: “Huunde bana nii meeɗaay yi'eego nder Isra'iila sam.”

³⁴Ammaa Farisa'en mbi'i: “Bee baawɗe laamiiɗo ginnaaji o riiwrata ginnaaji!”

³⁵Yeesu yiiloyi berniiji e gure fuu. O ekkitini yimɓe nder cuuɗi dewal Yahuudu'en, o waazi ɓe kubaruwol belŋgol ngol laamu asamanji, o nyawndi yimɓe diga nyawuji feere feere fuu.

³⁶Nde Yeesu yi'i mooɓe, o yurmini ɓe, ngam ɓe tampuɓe, ɓe sakliiɓe bana baali ɗi ngalaa gaynaako.

³⁷Nden o wi'i pukara'en maako: “Ƴaamle ɗuuɗi, ammaa sodooɓe ɗuuɗaay.

³⁸Tore Jawmu ƴaamnde o ɓesda nelugo sodooɓe haa ƴaamnde maako.”