Read Fulfulde Markus 1 Bible Online

Markus 1 - Fulfulde bible

Markus 1

¹Haa ɗo Kubaruwol Belŋgol dow Yeesu Almasiihu Ɓiɗɗo Allah fuɗɗi.

²Bana ko winnda nder deftere annabi Esaaya: “Allah wi'i: Ndaa mi ɗon nela nelaaɗo am yeeso ma, ngam o mo'ina laawol maaɗa.

³Goɗɗo ɗon hoola nder ladde: Mo'inane Jawmiraawo laawol. Mbaɗane mo buuwi darnuɗi!”

⁴Bana non Yuhanna baɗoowo baptisma waŋgi nder ladde, o ɗon waazina yimɓe, o ɗon wi'a ɓe: “Tuube, njaɓe baptisma, Allah boo yaafanto on hakkeeji mooɗon.”

⁵Lesdi Yahudiya e yimɓe Urusaliima fuu ngari haa Yuhanna, ɓe mbaŋgini hakkeeji maɓɓe, nden Yuhanna waɗani ɓe baptisma nder maayo Urdun.

⁶Yuhanna ɗon ɓorni limce kuuwraaɗe bee gaasa ngeelooba, o ɗon taadi taadorgol laral, baɓɓatti e njumri ladde ngoni nyaamdu maako.

⁷Nder waazu maako, o wi'i: “Goɗɗo waran ɓaawo am. Kaŋko o ɓuratam daraja, koo turaago fiista ɓoggi paɗe maako mi he'aay.

⁸Min mi waɗani on baptisma bee ndiyam, ammaa kaŋko o waɗanan on baptisma bee Ruuhu Ceniiɗo.”

⁹Nder nyalɗe maajum Yeesu wari diga Nasaratu nder lesdi Galiili, Yuhanna waɗani mo baptisma nder maayo Urdun.

¹⁰Wakkati Yeesu ɗon wurto ndiyam, o yi'i asamanji maɓɓiti, Ruuhu Allah ɗon jippo dow maako bana poola.

¹¹Sawtu iwi diga asamanji, wi'i: “An woni Ɓiɗɗo am giɗaaɗo, mi ɗon seyoro ma.”

¹²Law Ruuhu Allah dilliri Yeesu nder ladde.

¹³O jooɗi ton nyalɗe cappanɗe nayi, Sayɗaanu ɗon jarribo mo. O ɗon wondi bee dabbaaji ladde, malaa'ika'en boo ɗon kuuwana mo.

¹⁴Ɓaawo naŋngeeki Yuhanna, Yeesu wari haa lesdi Galiili, o waazi Linjiila Allah,

¹⁵o wi'i: “Saa'i waɗi, laamu Allah ɓaditake, tuube, nuɗɗine Linjiila.”

¹⁶Nde Yeesu tokki laawol kommbi weendu Galiili, o yi'i Simon e deerɗiraawo mum Andire, ɓe ɗon ngubo zubaaji[1] nder weendu, ngam ɓe waawooɓe liɗɗi.

¹⁷Yeesu wi'i ɓe: “Tokkeeɗam, mi waɗan on waawooɓe yimɓe.”

¹⁸Law ɓe acci zubaaji maɓɓe, ɓe tokki mo.

¹⁹Nde o yehi yeeso seɗɗa, o yi'i deerɗiraaɓe ɗiɗo, Yaakuba e Yuhanna, ɓiɓɓe Zebede. Ɓe ɗon nder koommbowal[2], ɓe ɗon mbo'itina zubaaji maɓɓe.

²⁰O ewni ɓe, law ɓe acci baaba maɓɓe Zebede e huuwooɓe maako nder koommbowal, ɓe tokki mo.

²¹Yeesu e pukara'en muuɗum nasti berniwol Kafarnahum. Nde nyannde siwtorde waɗi, Yeesu nasti suudu dewal Yahuudu'en, o ekkitini ɓe.

²²Heɗitiiɓe ekkitinol maako kayɗini masin, ngam o ekkitini ɓe bee baawɗe, naa bana moodiɓɓe tawreeta.

²³Woodino nder suudu man goɗɗo mo ruuhuwol coɓŋgol torri, o wooki.

²⁴O wi'i: “An Yeesu Nasaratuujo, ko yaalu ma bee amin? A wari ngam halkugo min na? Mi anndi fakat, a Ceniiɗo nelaaɗo Allah.”

²⁵Yeesu telɓani ruuhu coɓŋgu, wi'i: “Jeeɗa, wurta nder maako.”

²⁶Ngu ɓosli gorko go, nden ngu wooki, ngu wurti diga maako.

²⁷Yimɓe fuu kayɗini, ɓe ƴamƴamtiri: “Ɗum ɗume? Ɗum ekkitinol kesol bee baawɗe! Goɗɗo oo ɗon umra koo ruuhuuji coɓɗi ɗi ɗowtano mo!”

²⁸Law habaru Yeesu saŋkiti koo toy fuu nder lesdi Galiili.

²⁹Ɓe ngurti suudu dewal Yahuudu'en, law ɓe njehi haa saare Simon e Andire. Yaakuba e Yuhanna njahdi bee maako.

³⁰Esiraawo Simon debbo ɗon waali o nyawɗo yontere. Nde Yeesu wari, ɓe ngecci mo haala nyawu maako.

³¹Yeesu yehi haa maako, naŋngi juŋngo maako, ummini mo. O yamɗiti, o weerni ɓe.

³²Nde naaŋge muti, yimɓe ngaddi nyawɓe e marɓe ginnaaji fuu haa Yeesu.

³³Ummaatoore berniwol man fuu mooɓi haa yolnde saare.

³⁴Yeesu yamɗitini nyawɓe ɗuuɗɓe e nyawuji maɓɓe feere feere, o riiwi boo ginnaaji ɗuuɗɗi. O accaay ginnaaji ɗi mbolwa koo ɗume, ngam ɗi anndi mo.

³⁵Jaŋngo maajum Yeesu dawi cub. O wurti, o dilli ladde. O waɗi do'a haa ton.

³⁶Simon e wonduɓe bee muuɗum taasni mo, ndilli ɗaɓɓitoygo mo.

³⁷Nde ɓe tawi mo, ɓe mbi'i mo: “Yimɓe fuu ɗon ɗaɓɓite.”

³⁸Ammaa o jaabi: “Ndillen haa kawyeeji ɓadiiɗi, haa mi waazina yimɓe ton boo. Ngam kuugal man waddi yam.”

³⁹Bana non, o yehi cuuɗi dewal Yahuudu'en nder lesdi Galiili fuu, o waazi e o riiwi boo ginnaaji.

⁴⁰Kuturuujo wari haa Yeesu, tuggi koppi yeeso maako, tori mo: “To a muuyi, a waawan yamɗitingo yam.”

⁴¹Yeesu yurmini mo, forti juŋngo muuɗum, meemi mo, wi'i: “Mi muuyi, a yamɗita!”

⁴²Law saɗawre acci mo, o yamɗiti.

⁴³Nden, Yeesu jaɓɓiti mo, wi'i mo bee caatal, dillu!

⁴⁴“Hakkil, taa yeccu ɗum koo moy. Ammaa yah jonta, hollu limanjo hoore ma. Nden lii'a dokkal ngal Muusa umri, ngam seedamku yeeso yimɓe.”

⁴⁵Ammaa goɗɗo oo dilli, o fuɗɗi saŋkitugo habaru man koo toy. Ngam daliila man, Yeesu waawaay nastugo berniwol. Ammaa o jooɗi yaasi berniwol. Yimɓe ngari haa maako diga koo toy.