Read Fulfulde Markus 11 Bible Online

Markus 11 - Fulfulde bible

Markus 11

¹Nde ɓe ɓaditi Urusaliima, gal wakeere gure Baytifaaji e Baytaniya, kommbi Hooseere Jaytunje, Yeesu neli pukara'en muuɗum ɗiɗo,

²o wi'i ɓe: “Njehe wuro wonŋgo yeeso mooɗon. To on nasti ngo, on tawan wamnde molde haɓɓaande nde goɗɗo meeɗaay wa'aago. Piiste nde, ngadde.

³To goɗɗo ƴami on: Koni piistoton nde? Njaabe mo: Jawmiraawo woodi haaje maare, o lornan nde law.”

⁴Nden ɓe ndilli, ɓe tawi molde haa laawol, nde ɗon haɓɓi haa yolnde goɗɗo, ɓe piisti nde.

⁵Woɗɓe dariiɓe ton ƴami ɓe: “Ɗume mbaɗoton ɗo? Ngam ɗume piistoton molde nde?”

⁶Ɓe njaabi bana Yeesu wi'no ɓe, nden yimɓe man acci ɓe.

⁷Ɓe ngaddani Yeesu molde, ɓe ndaɗɗi limce maɓɓe dow maare, Yeesu wa'i nde.

⁸Yimɓe ɗuuɗɓe mbe'iti limce muuɗum'en dow laawol, woɗɓe itti haakooji haa gese, caɓɓi ɗi dow laawol.

⁹Yimɓe ardiiɓe Yeesu e tokkiiɓe ɓaawo fuu kooli, mbi'i: “Hosanna, barka laatano garanɗo bee innde Jawmiraawo.

¹⁰Allah barkiɗina laamu ngaranŋgu, ngu baaba meeɗen Daawuda! Hosanna, tedduŋgal laatano Allah haa asama!”

¹¹Yeesu nasti Urusaliima. O nasti haykaliiru boo, o timmini laarugo ko woni nder maaru fuu, nde hiiri, o dilli Baytaniya bee pukara'en maako sappo e ɗiɗo.

¹²Jaŋngo maajum nde ɓe ngurti Baytaniya, Yeesu maati dolo.

¹³O eewi ibbi bee haakooji ɗuuɗɗi, o yehi ngam o laara teema ibbe ɗon haa maaki. Ammaa nde o yehi les maaki, o tawi sey haakooji tan, ngam naa ɗum saa'i ibbe.

¹⁴Nden Yeesu wi'i ibbi: “Taa goɗɗo meeta nyaamugo ibbe haa maaɗa!” Pukara'en maako nani.

¹⁵Nde ɓe njotti Urusaliima, Yeesu nasti haykaliiru. O fuɗɗi faartugo soorrooɓe e soodooɓe nder haykaliiru. O hippi taabe sannjooɓe ceede e koromje soorrooɓe pooli.

¹⁶O accaay koo gooto saalo nder haykaliiru bee doŋngal.

¹⁷Nden o ekkitini yimɓe, o wi'i: “Ndaa ko winnda nder Deftere Seniinde: Suudu am wi'ete suudu waɗugo do'a ngam ummaatooje fuu. Ammaa onon on ngartiri ndu lowol fasooɓe.”

¹⁸Mawɓe liman'en e moodiɓɓe tawreeta nani haala man, ɓe puɗɗi tefugo dabare mbarugo Yeesu, ammaa ɓe ɗon kula mo ngam mooɓre fuu hayɗini ekkitinol maako.

¹⁹Nde hiiri, Yeesu e pukara'en muuɗum ngurti berniwol.

²⁰Jaŋngo man fajiri, nde ɓe ɗon caalo, ɓe ngi'i ibbi go, ki yoori bee ɗaɗi maaki fuu.

²¹Piyer siftori, wi'i Yeesu: “Moodibbo, ndaa ibbi ki a naali go. Ki yoori.”

²²Nden Yeesu jaabi pukara'en muuɗum: “Nuɗɗine Allah.

²³Gooŋga mi ɗon wi'a on, to goɗɗo wi'i hooseere nde'e: Sootta diga ɗo, yolla nder mbeela, to o sekaay nder ɓernde maako sam, ammaa o nuɗɗini ko o wi'i laato, ɗum laatanto mo fakat.”

²⁴Ngam maajum mi ɗon wi'a on: Nde on toroto huunde fuu, nuɗɗine on keɓi nde e on keɓan nde.

²⁵Yaake on ndarake ngam waɗugo do'a, to woodi huunde hakkunde mooɗon bee goɗɗo, njaafe mo, ngam haa Baabiraawo mooɗon gonɗo haa asama boo yaafano on aybeeji mooɗon.

²⁶[Ammaa to on njaafaaki woɗɓe, nden kam Baabiraawo mooɗon gonɗo haa asama boo yaafantaako on aybeeji mooɗon.]

²⁷Ɓe lorti haa Urusaliima. Yaake Yeesu ɗon waanca nder haykaliiru, mawɓe liman'en e moodiɓɓe tawreeta e ndotti'en dawrooɓe ngari haa maako.

²⁸Ɓe ƴami mo: “Bee duŋayeere moy a waarata kuuje ɗe'e? Moy duŋani ma waɗugo bana nii?”

²⁹Yeesu jaabi ɓe: “Min boo mi ƴaman on huunde woore. To on njaabake yam, nden kam min boo mi jaaboto on bee duŋayeere moy kuuwranmi kuuje ɗe'e.

³⁰Moy duŋani Yuhanna waɗango yimɓe baptisma? Allah naa malla yimɓe? Njaabe.”

³¹Nden ɓe carwootiri, ɓe mbi'i: “To en njaabake: Allah, o ƴaman en: Koni on nuɗɗinaay mo?

³²Haa en njaabo ɗum yimɓe…” ndaa ɓe ɗon kula ummaatoore ngam yimɓe fuu ndaari Yuhanna o annabiijo fakat.

³³Nden ɓe njaabi Yeesu: “Min anndaa.” Yeesu wi'i: “Min boo mi wi'ataa on bee duŋayeere moy mbaɗanmi kuuje ɗe'e.”