Read Fulfulde Markus 13 Bible Online

Markus 13 - Fulfulde bible

Markus 13

¹Nde Yeesu wurti haykaliiru, gooto haa pukara'en maako wi'i mo: “Moodibbo, laar no kaa'e e nyiɓle ɗe'e mbooɗiri!”

²Yeesu jaabi mo: “A ɗon yi'a nyiɓle mawɗe ɗe'e na? Fakat, hayre luttataa dow hayre, ɓe ngibbinan koo ɗume fuu.”

³Yeesu ɗon jooɗi dow Hooseere Jaytunje haa huucitirde haykaliiru. Piyer e Yaakuba e Yuhanna e Andire feere maɓɓe ƴami mo:

⁴“Yeccu min ndey kuuje ɗe'e laatoto e alaama kaye waŋginta saa'iire timmoode kuuje ɗe'e fuu?”

⁵Nden Yeesu fuɗɗi wi'ugo ɓe: “Kakkile, ngam taa goɗɗo majjina on.

⁶Ɗuuɗɓe ngaran bee innde am, ɓe mbi'an: Min woni Almasiihu, ɓe majjinan yimɓe ɗuuɗɓe.

⁷To on nani habaru konuuji ɓadiiɗi e daayiiɗi, taa kultore, doole ɗum laato, ammaa naa ɗum timmoode tawon.

⁸Ummaatoore haɓan bee ummaatoore woɗnde, laamu ummanto laamu feere. Dimmbanɗe lesdi mbaɗan haa nokkuuje feere feere, non boo weelo. Ɗum laatoto bana fuɗɗam luuwe danyugo.

⁹Ammaa onon, kakkilane ko'e mooɗon, ngam ɓe naŋngan on, ɓe njahran on yeeso hiitooɓe. Ɓe piyan on nder cuuɗi dewal Yahuudu'en. On ndaroto yeeso mawɓe e laamiiɓe ngam daliila am, haa on mbaɗa seedamku mooɗon yeeso maɓɓe.

¹⁰Sey ummaatooje fuu nana waazu Linjiila tawon.

¹¹To ɓe naŋngi on, ɓe njahri on yeeso hiitooɓe, taa cuklane ko mbi'oton. Ammaa to wakkati man wari, mbolwe bolle ɗe on keɓata. Kanje ɗe iwataa haa mooɗon, ammaa haa Ruuhu Ceniiɗo.

¹²Yimɓe ndokkan deerɗiraaɓe maɓɓe ngam mbareego, baabiraaɓe mbaɗan ɓikkoy maɓɓe bana non, ɓikkoy ummanto saaro'en maɓɓe e koy mbaran ɓe.

¹³Koo moy fuu wanyan on daliila innde am. Ammaa mo munyi haa timmoode, o hisan.”

¹⁴Yeesu wi'i boo: “On ngi'an ko wi'ete nyidduɗum nattinoojum ɗon dari haa pellel ngel haanaay ɗum daro. Mo jaŋngi ɗum, sey faama booɗɗum! Nden kam sey wonɓe lesdi Yahudiya ndogga haa kooseeje.

¹⁵Mo ɗon dow soorowol, taa jippo ngam hoocugo koo ɗume nder maagol.

¹⁶Mo ɗon haa ngesa, taa hoota saare ngam hoo'ugo limce mum.

¹⁷Kayto! Bone laatanto reedu'en e musininanɓe nder nyalɗe man!

¹⁸Tore Allah ngam taa ɗum laato saa'i duumol.

¹⁹Ngam nder nyalɗe maajum ɓillaare naawnde waɗan, bana maare meeɗaay waɗeego diga fuɗɗoode duniyaaru haa wargo hannde, nde meetataa waɗugo boo.

²⁰To Allah ustaayno limgal nyalɗe man, walaa koo gooto hisanno. Ammaa o usti ɗe ngam daliila yimɓe maako ɓe o suɓi.

²¹Wakkati man, to goɗɗo wi'i on: Ndaa Almasiihu haa ɗo malla: Ndaa mo haa to, taa njaɓe.

²²Ngam fewooɓe wi'anɓe ɓe almasiihu'en malla ɓe annabi'en mbaŋgan, ɓe mbaɗan alaamaaji e kaayeefiiji ngam ɓe majjina koo suɓaaɓe boo, to ɗum heɓoto.

²³Onon, kakkile! Mi yecci on ɗum fuu diga aran.”

²⁴Nder nyalɗe ɓaawo ɓillaare nde'e, naaŋge nyiɓɓan, lewru accan yaynugo,

²⁵koode asama njanan, baawɗeeji asama boo ndimmboto.

²⁶Nden Ɓii-neɗɗo waŋgan gite yimɓe, o waran nder duule bee tedduŋgal e baawɗe mawɗe.

²⁷O nelan malaa'ika'en haa alkibilaaji nayi ngam mooɓtugo suɓaaɓe maako diga keerol duniyaaru ngo'ol haa ngola.

²⁸Paame ko ibbi anndinta on: To lice maaki kesɗiti, haakooji maaki boo mbiliti, on anndi duumol ɓadake.

²⁹Bana non onon boo, to on ngi'i kuuje ɗe'e ɗon laato, annde o ɓadake wargo.

³⁰Gooŋga mbi'anmi on: Kuuje ɗe'e fuu laatoto hiddeko yimɓe zamanuuru ndu'u fuu maayda.

³¹Asama e lesdi njinnan, ammaa bolle am njinnataa sam.

³²“Ammaa walaa mo anndi nyalaade maajum koo saa'a maajum, malaa'ika'en anndaa, koo Ɓiɗɗo boo anndaa, sey Baabiraawo tan anndi.

³³Kakkile! Ayne! Ngam on anndaa ndey saa'i maajum laatoto.

³⁴Ɗum laatoto bana to goɗɗo dilli jahaaŋgal, acci saare mum, halfitini huuwooɓe muuɗum gooto gooto fuu kuugal muuɗum, umri aynoowo saare o ayna.

³⁵Ngam maajum ayne, nde nii on anndaa ndey jawmu saare wartata, kiikiiɗe malla caka jemma malla boo baɓɓol, koo fajiri.

³⁶To o warti bee juhuki, taa o tawta on ɗon ɗaani.

³⁷Ko mi wi'i on, mi ɗon wi'a ɗum yimɓe fuu: Ayne!”