Read Fulfulde Markus 14 Bible Online

Markus 14 - Fulfulde bible

Markus 14

¹Lutti nyalɗe ɗiɗi haa juulde Paska e tamseeje ɗe ufnaaka waɗe. Mawɓe liman'en e moodiɓɓe tawreeta ɗaɓɓi no ɓe ƴoyra Yeesu, ɓe naŋnga mo, ɓe mbara mo.

²Ɓe mbi'i: “Taa en mbaɗa ɗum wakkati juulde, ngam taa ɗum ummina fitina caka ummaatoore.”

³Yeesu ɗon haa Baytaniya nder saare Simon kuturuujo. Saa'i o ɗon nyaama, debbo feere wari, o ɗon jogi faandu saɗndu heewndu uurdi mbi'eteendi nardi, ndi laaɓndi e caɗndi masin. O fusi hunnduko faandu man, o rufi uurdi go dow hoore Yeesu.

⁴Woɗɓe caka yimɓe ton ɓerni, ɓe mbi'mbi'tiri: “Koni o majjini nebbam ɗa'am meere?

⁵To o soorrino ɗam ko ɓuri suleyje cardi teemeɗɗe tati, o hokkuno ceede man haa talaka'en, ɓuranno nafugo.” Ɓe peli mo bee caatal.

⁶Ammaa Yeesu wi'i ɓe: “Acce mo! Koni on pitinta mo? O huuwani yam kuugal booɗŋgal.

⁷Talaka'en ɗon ngondi bee mooɗon foroy, on mbaawan waɗango ɓe ko wooɗi koo ndey on ngiɗi fuu. Ammaa min mi wondataa bee mooɗon foroy.

⁸Kaŋko o waɗi ko o waawi. Diga saa'i siwaa o rufi nebbam dow ɓanndu am ngam uweego.

⁹Gooŋga mi ɗon wi'a on: Koo toy nder duniyaaru haa nuɗɗinɓe yam ngaazinta Linjiila fuu, ɓe ngeccan boo ko debbo oo waɗi e ɓe ciftoran mo.”

¹⁰Nden Yahuuda Iskariyot, gooto nder pukara'en sappo e ɗiɗo, dilli haa mawɓe liman'en ngam o hokka Yeesu haa juuɗe maɓɓe.

¹¹Nde ɓe nani haala maako, ɓe ceyi. Ɓe iinani mo ceede. Nden Yahuuda ɗaɓɓiti wakkatiire ɓurnde fottugo ngam o hokka Yeesu haa juuɗe maɓɓe.

¹²Nyalaade arannde haa juulde tamseeje ɗe ufnaaka, nde ɓe kirsata jawgel Paska, pukara'en ƴami Yeesu: “Toy a yiɗi min njaha, min taaskitina kiirtaari Paska ngam maaɗa?”

¹³Nden Yeesu neli pukara'en muuɗum ɗiɗo, wi'i ɓe: “Naste nder berniwol, on pottan bee goɗɗo doondiiɗo mbulku ndiyam, tokke mo.

¹⁴Haa saare nde o nastata, mbi'e jawmu saare man: Moodibbo wi'i: Toy suudu haa mi nyaama kiirtaari Paska bee pukara'en am?

¹⁵O hollan on suudu mawndu, dowru, mo'itinaandu, taaskitinaandu, on taaskitina kuuje fuu ngam meeɗen ton.”

¹⁶Pukara'en go ndilli, nasti berniwol, ɓe tawi koo ɗume fuu bana o wi'i ɓe, ɓe taaskitini kiirtaari Paska.

¹⁷Nde kiikiiɗe waɗi, Yeesu wardi bee pukara'en muuɗum sappo e ɗiɗo.

¹⁸Saa'i ɓe njooɗi ɓe ɗon nyaama, Yeesu wi'i: “Gooŋga mbi'anmi on, gooto mooɗon mo ɗon nyaamda bee am, zammboto yam.”

¹⁹Ɗum naawi ɓerɗe pukara'en, koo moy maɓɓe fuɗɗi ƴamugo mo: “Naa ɗum min sika?”

²⁰Yeesu jaabi ɓe: “Ɗum gooto haa sappo e ɗiɗo mooɗon, mo ɗon suuwa loŋngere mum bee am nder le'al.

²¹Gooŋga Ɓii-neɗɗo maayan bana ko winnda dow maako. Ammaa bone laatanto goɗɗo mo zammboto Ɓii-neɗɗo. To o danyaakano, ɓurananno mo.”

²²Nde ɓe ɗon nyaama, Yeesu hoo'i tamseere, waɗi yettoore, yewi tamseere man, hokki ɓe, wi'i: “Koo'e, ɗum ɓanndu am.”

²³Ɓaawo maajum o hoo'i jardugel, o yetti Allah, o hokki ɓe, ɓe fuu ɓe njari nder maagel.

²⁴O wi'i ɓe: “Ɗum ƴiiƴam am ndufaaɗam ngam ɗuuɗɓe, bee maajam Allah tabitiniri alkawal muuɗum.

²⁵Gooŋga mi ɗon wi'a on: Mi meetataa yarugo inaboojam ɗam haa nyalaade mi yarata kesam nder laamu Allah.”

²⁶Nden ɓe ngimi gime maŋgtooje, ɓe ndilli haa Hooseere Jaytunje.

²⁷Yeesu wi'i pukara'en muuɗum: “On fuu on accatam on ndoggan, bana ko winnda nder Deftere: Mi mbaran gaynaako, baali caŋkititto.

²⁸Ammaa to mi ummitake, mi aartan on yahugo lesdi Galiili.”

²⁹Piyer wi'i mo: “Koo to yimɓe fuu acci ma, min kam mi accataa ma.”

³⁰Nden Yeesu wi'i mo: “Gooŋga mbi'anmaami: Jemmaare nde'e, hiddeko asgumri[21] u'a nde ɗiɗi, an a wi'an nde tati a anndaa yam.”

³¹Ammaa Piyer tabitini ko o wi'i bee sawtu: “Mi meeɗataa wi'go mi anndaa ma, koo to doole mi maayda bee maaɗa.” Pukara'en luttuɓe fuu njaabi bana non.

³²Nde ɓe njotti nokkuure wi'eteende Gecemane, Yeesu wi'i pukara'en muuɗum: “Njooɗe haa ɗo, haa mi waɗoya do'a.”

³³Nden o yahdi bee Piyer e Yaakuba e Yuhanna. Kulol e saklere ukkani mo.

³⁴O wi'i ɓe: “Torra ɓernde am yiɗi mbarugo yam. Tokke jooɗaago haa ɗo, ayne.”

³⁵O yehi yeeso seɗɗa, o do'i haa lesdi, o tori haa saa'iire torra nde'e saalo acca mo, to heɓoto.

³⁶O wi'i: “Yaa Baabiraawo am, an a waawi waɗugo koo ɗume fuu. Ittanam jardugel torra nge'el. Ammaa waɗ ko ngiɗɗa, naa ko ngiɗmi.”

³⁷Nden o lori, o tawti pukara'en tato go, ɓe ɗon ɗaani. O wi'i Piyer: “Simon, a ɗon ɗaani na? A waawaay aynugo koo saa'a ngoota na?

³⁸Ayne, tore Allah ngam taa on nasta jarribeeki. Ko ruuhu neɗɗo yiɗi, ɓanndu muuɗum waawataa waɗugo ɗum, ngam ndu tampundu.”

³⁹Fahin o yehi, o waɗi do'a bana o waɗno naane.

⁴⁰Nde o lorti, o tawti ɓe ɓe ɗon ɗaani fahin, ngam gite maɓɓe teddi. Ɓe anndaa ko ɓe njaaboto mo.

⁴¹Nde o wari haa maɓɓe tataɓre, o wi'i ɓe: “On ɗon ɗaani haa jonta na? On ɗon ciwto na? He'i kadi, saa'i waɗi! Jonta ɓe ndokkan Ɓii-neɗɗo haa juuɗe hakke'en.

⁴²Umme, ndillen! Ndaa zammbotooɗo yam ɓaditake.”

⁴³Diga Yeesu timminaay wolwugo tawon, Yahuuda, gooto nder pukara'en maako sappo e ɗiɗo go wari. Mooɓre ɗuuɗnde wardi bee maako bee kaafaaje e cabbi, mawɓe liman'en e moodiɓɓe tawreeta e ndotti'en dawrooɓe neli ɓe.

⁴⁴Yahuuda zammbotooɗo Yeesu hokkuno ɓe alaama, wi'i: “Mo mi hebbata, ɗum kaŋko. Naŋnge mo, ndillire mo, ayne mo booɗɗum.”

⁴⁵Nde o yotti, o ɓaditi Yeesu, o wi'i mo: “Moodibbo.” Nden o hebbi mo.

⁴⁶Nden woɗɓe boo ukki dow Yeesu, naŋngi mo.

⁴⁷Ammaa gooto haa dariiɓe ton losi kaafahi muuɗum, fe'i maccuɗo hooreejo liman'en, ta'i mo nofru.

⁴⁸Yeesu wi'i ɓe: “Koni on ngari bee kaafaaje e cabbi ngam naŋngugo yam bana mi pasoowo?

⁴⁹Nyalɗe fuu mi ɗonno wondi bee mooɗon nder haykaliiru, mi ɗon ekkitina on, on naŋngaay yam. Ammaa ɗum waɗi ngam gooŋɗingo ko winnda nder Deftere Seniinde.”

⁵⁰Nden pukara'en fuu ndoggi acci mo.

⁵¹Suka feere tokki Yeesu, o ɗon wakki suddaare tan dow ɓanndu maako. Ɓe naŋngi mo,

⁵²ammaa o teeti, o wudini suddaare, o doggi o temmbo, o daɗi.

⁵³Ɓe njahri Yeesu haa hooreejo liman'en. Mawɓe liman'en e ndotti'en e moodiɓɓe tawreeta fuu ɗon mooɓti ton.

⁵⁴Piyer tokki daayiiɗum, o nasti saare hooreejo liman'en. O jooɗodi bee aynooɓe, o ɗon aytino yiite.

⁵⁵Mawɓe liman'en e hiitooɓe nder dawriinde fuu ɗaɓɓi wullaandu dow Yeesu haa ɓe ndo'a mo kiita maayde, ammaa ɓe keɓaay.

⁵⁶Seedooɓe ɗuuɗɓe ceedi pewe dow maako, ammaa bolle maɓɓe luutindiri.

⁵⁷Nden woɗɓe maɓɓe ummi ceedi fewre nde'e dow maako, ɓe mbi'i:

⁵⁸“Min nani bee noppi amin o wi'i: Mi yibbinan haykaliiru ndu yimɓe mahi e mi mahitan ndu nder nyalɗe tati, naa bee juuɗe yimɓe.”

⁵⁹Ammaa kamɓe boo, seedamkuuji maɓɓe njahdaay.

⁶⁰Hooreejo liman'en ummi, dari caka yimɓe, ƴami Yeesu: “A jaabataako koo ɗume dow gullaali wulliiɓe ɓe'e na?”

⁶¹Ammaa Yeesu jeeɗi, jaabaaki sam. Fahin hooreejo liman'en ƴami mo: “An a Almasiihu, Ɓiɗɗo Allah tedduɗo na?”

⁶²Yeesu wi'i: “Ooho, min woni kaŋko, onon boo on ngi'an Ɓii-neɗɗo ɗon jooɗi haa nyaamo Allah Baawɗo, o waran nder duule asama.”

⁶³Hooreejo liman'en seeki limce mum, wi'i: “Walaa haaje en ɗaɓɓita seedooɓe feere.

⁶⁴On nani kalluka maako dow Allah. Ɗume on mbi'ata dow maajum?” Ɓe fuu ɓe njaabi o aybuɗo, ɓe kiiti mo kiita mbareego.

⁶⁵Woɗɓe maɓɓe tuuti tuuɗe dow Yeesu. Ɓe cuddi gite maako, ɓe lukki mo, nden ɓe mbi'i mo: “Annditu, moy waɗi ma ɗum?” Aynooɓe boo koo'i mo, maari mo.

⁶⁶Nde Piyer ɗonno haa les, haa daldal saare tawon, gooto haa horɓe hooreejo liman'en wari.

⁶⁷Nde o yi'i Piyer ɗon aytino yiite, o laari mo, o wi'i: “An boo a ɗonno wondi bee Yeesu Nasaratuujo.”

⁶⁸Ammaa Piyer yeddi, wi'i: “Mi anndaa, mi faamaay ko a wi'i.” Nden o dilli haa zawleeru. Saa'i maajum asgumri[22] u'i.

⁶⁹Korɗo go yi'i mo, wi'i dariiɓe ton fahin: “Oo ɗo, o gooto maɓɓe.”

⁷⁰Ammaa fahin Piyer yeddi. Ɓaawo maajum seɗɗa dariiɓe ton mbi'i Piyer: “Fakat a gooto maɓɓe, ngam an boo a goɗɗo Galiili.”

⁷¹Piyer fuɗɗi hunaago: “Allah hiito yam to mi fewi! Mi anndaa gorko mo on mbolwanta ɗo.”

⁷²Saa'i maajum asgumri u'i ɗiɗawre. Piyer siftori wolde nde Yeesu wi'no mo: “Hiddeko asgumri u'a nde ɗiɗi, an a wi'an nde tati a anndaa yam.” Nden o wayliti o fuɗɗi woyugo.