Read Fulfulde Markus 16 Bible Online

Markus 16 - Fulfulde bible

Markus 16

¹Nde nyannde siwtorde saali, Mariyama mo Magdala e Mariyama daada Yaakuba e Salome coodi uurle ngam ɓe njaha, ɓe ndufa dow ɓanndu Yeesu.

²Alat, nyannde go'oore nder asaweere, ɓe ndawi cub yahugo yenaande, ɓe njotti ton saa'i puɗki naaŋge.

³Ɓe mbi'mbi'tiri hakkunde maɓɓe: “Moy sottinanta en hayre haa nastirde yenaande?”

⁴Ammaa nde ɓe ɓaŋgti gite, ɓe ngi'i hayre mawnde go sottinaama.

⁵Ɓe nasti nder yenaande. Ɓe ngi'i suka ɗon jooɗi ton haa wakeere nyaamre, o ɗon ɓorni toggoore raneere. Ɓe kultori.

⁶Ammaa o wi'i ɓe: “Taa kultore! On ɗon ɗaɓɓita Yeesu Nasaratuujo mo ɓe ɓilino haa leggal gaafaaŋgal. O walaaɗon haa ɗo, o ummitake. Ndaa haa ɓe mballinno mo.

⁷Jonta ndille, mbi'e pukara'en maako e Piyer kubaruwol ngo'ol: O aartan on yahugo Galiili, ton ngi'oton mo bana o wi'no on.”

⁸Rewɓe ngurti yenaande man, ɓe ndoggi, ɓe ndiwni ɓe kultori masin. Ɓe mbi'aay haala man koo moy, ngam ɓe kultori.

⁹Ɓaawo Yeesu ummiti diga maayde, nyannde Alat fajiri cub, o aarti waŋgango Mariyama mo Magdala mo o riiwi ruuhuuji coɓɗi joweeɗiɗi haa maako.

¹⁰O yehi, o anndini ɗum hawtiɗiraaɓe Yeesu. Kamɓe ɓe ɗonno mboya, ɓerɗe maɓɓe ta'ino.

¹¹Ɓe nani Mariyama ɗon wi'a: “Yeesu o geeto, mi yi'i mo!” Ammaa ɓe nuɗɗinaay ko o wi'i.

¹²Ɓaawo maajum Yeesu waŋgani ɗiɗo maɓɓe bee jaati feere, nde ɓe ɗon njaha kawye.

¹³Ɓe lori, ɓe ngecci ɗum luttuɓe, ammaa kamɓe boo ɓe nuɗɗinaay ɗum. [

¹⁴Ɓaawoɗon Yeesu waŋgani pukara'en sappo e go'o saa'i ɓe ɗon nyaama. O feli ɓe ngam sooynde nuɗɗinki maɓɓe. O feli ɓe boo ngam caatal ɓerɗe maɓɓe, ngam ɓe nuɗɗinaay bolle yi'ɓe mo ɓaawo o ummiti.

¹⁵Nden o wi'i ɓe: “Njehe koo toy nder duniyaaru, ngaazine koo moy Linjiila.

¹⁶Koo moy nuɗɗini, jaɓi baptisma, hisan. Mo nuɗɗinaay, Allah hiitoto mo.

¹⁷Nuɗɗinɓe mbaŋginan alaamaaji ɗi'i: Ɓe ndiiwan ginnaaji bee innde am, ɓe mbolwan bee ɗemɗe kese.

¹⁸To ɓe naŋngi boɗɗe bee juuɗe malla to ɓe njari njaram mbaroojam, ɗum naawnataa ɓe sam. Ɓe njowan juuɗe maɓɓe dow nyawɓe, ɓe njamɗitan.”]

¹⁹Ɓaawo nde Jawmiraawo timmini wolwango pukara'en muuɗum, o eeŋgti haa asama, o jooɗi haa nyaamo Allah.

²⁰Pukara'en kam ndilli, ngaazini Linjiila koo toy fuu. Jawmiraawo boo huuwdi bee maɓɓe, gooŋɗini waazu maɓɓe bee alaamaaji go.