Read Fulfulde Markus 9 Bible Online

Markus 9 - Fulfulde bible

Markus 9

¹Fahin Yeesu wolwani ɓe, o wi'i: “Gooŋga mi ɗon wi'a on, woɗɓe caka wonɓe haa ɗo, maayataa sey to ɓe ngi'i laamu Allah wari bee baawɗe.”

²Ɓaawo nyalɗe joweego, Yeesu hoo'i Piyer e Yaakuba e Yuhanna, o yahri ɓe dow hooseere townde, kamɓe feere maɓɓe. Jaati maako wayliti haa gite maɓɓe,

³limce maako ɗelki, daneeje tal, walaa koo gooto haa duniyaaru fuu waawata ranwingo limce bana non.

⁴Nden Eliya e Muusa mbaŋgani ɓe, ɓe ɗon mbolida bee Yeesu.

⁵Piyer wi'i Yeesu: “Moodibbo, ɗum booɗɗum en ɗon ɗo. Accu min mbaɗa bukkaaji tati, wooru ngam maaɗa, wooru ngam Muusa, wooru boo ngam Eliya.”

⁶O anndaa ko o wi'ata, ngam kaŋko e pukara'en woɗɓe ɗiɗo go, ɓe kultori masin.

⁷Ruuldere jippi, suddi ɓe, ɓe nani sawtu ɗon wolwa nder maare: “Oo woni Ɓiɗɗo am giɗaaɗo, nanane mo.”

⁸Ɗon nii pukara'en ndaari haa kommbi maɓɓe, ammaa ɓe ngi'aay goɗɗo, sey Yeesu ɗon wondi bee maɓɓe.

⁹Nde ɓe ɗon njippo hooseere go, Yeesu umri ɓe taa ɓe ngecca yimɓe woɗɓe ko ɓe ngi'i, sey to Ɓii-neɗɗo ummitake diga maayde.

¹⁰Ɓe ɗowtani wolde nde, ammaa ɓe ƴamƴamtiri hakkunde maɓɓe: “Ɗume ummitaago diga maayde yiɗi wi'go?”

¹¹Nden ɓe ƴami Yeesu: “Ngam ɗume moodiɓɓe tawreeta ɗon mbi'a sey Eliya aarta wargo tawon?”

¹²O jaabi ɓe: “Gooŋga Eliya aartan wargo, o mo'itina kuuje fuu. Kadi ngam ɗume Deftere wi'ata doole Ɓii-neɗɗo yara bone ɗuuɗɗe, yimɓe boo meeriɗina mo?

¹³Ammaa mi ɗon wi'a on: Eliya wari timmi, yimɓe mbaɗi mo ko ɓe ngiɗi, bana ko winnda dow maako.”

¹⁴Nde ɓe njotti haa pukara'en luttuɓe, ɓe ngi'i mooɓre ɗuuɗnde ɗon taari ɓe. Moodiɓɓe tawreeta ɗon ngaabotira bee maɓɓe.

¹⁵Nde yimɓe ngi'i Yeesu, ɓe kayɗini masin. Ɓe ndoggi, ɓe ngari ɓe koofni mo.

¹⁶Yeesu ƴami pukara'en muuɗum: “Dow ɗume on ngaabotirta bee maɓɓe?”

¹⁷Gooto nder mooɓre jaabi mo: “Moodibbo, mi waddani ma ɓiŋngel am gorgel marŋgel ruuhu muukaaŋgu.

¹⁸Koo toy ruuhu ngu naŋngi ngel fuu, ngu do'an ngel haa lesdi. Hunnduko maagel waɗan nguufo, ngel hirƴindiran nyii'e, ɓanndu maagel saatan. Mi ƴami pukara'en maaɗa ɓe ndiiwa ruuhu ngu, ammaa ɓe mbaawaay.”

¹⁹Yeesu wi'i ɓe: “Hey yimɓe sooya-nuɗɗinki'en, haa ndey tokkotoomi wondugo bee mooɗon e munyango on? Ngadde ɓiŋngel man!”

²⁰Ɓe ngaddi ngel haa maako. Nde ɓiŋngel yi'i Yeesu, law ruuhu dimmbi ngel. Ngel do'i haa lesdi, ngel talli, hunnduko maagel waɗi nguufo.

²¹Yeesu ƴami baaba maagel: “Diga ndey ɗum fuɗɗi waɗugo ngel?” Baaba maagel jaabi: “Diga ngel pamarel.

²²Nde ɗuuɗɗum boo ruuhu ngu do'i ngel nder yiite koo nder ndiyam, ngam halkugo ngel. To a waawi, useni enɗu min, wallu min!”

²³Yeesu jaabi mo: “Koni a wi'i: To a waawi? Walaa ko salorta nuɗɗinɗo, koo ɗume fuu waɗoto.”

²⁴Law baaba ɓiŋngel hooli: “Mi nuɗɗini, ammaa ɗum caɗɗum haa am, wallam!”

²⁵Nde Yeesu yi'i mooɓre ɗon dogga wara haa maɓɓe, o telɓani ruuhu coɓŋgu go: “An ruuhu muukaaŋgu, pahu! Mi umri ma: Wurta ɓiŋngel nge'el, taa meetu nastugo nder maagel.”

²⁶Ruuhu hooli, ɓosli ngel, wurti haa maagel. Ngel laati bana maayɗo, haa yimɓe ɗuuɗɓe mbi'i: “Ngel maayi.”

²⁷Ammaa Yeesu naŋngi ngel juŋngo, ummini ngel, ngel dari.

²⁸Nde Yeesu nasti suudu, pukara'en maako ƴami mo bee sirri: “Ngam ɗume minin min mbaawaay riiwugo ngu?”

²⁹Yeesu jaabi ɓe: “Walaa baawɗe feere riiwata irin ruuhu ngu'u, sey do'a.”

³⁰Ɓe ummi ton, ɓe caali nder lesdi Galiili. Yeesu yiɗaa koo gooto annda haa o woni.

³¹Ngam o ɗon anndina pukara'en maako, o wi'i ɓe: “Ɓe ndokkan Ɓii-neɗɗo haa juuɗe yimɓe. Kamɓe ɓe mbaran mo, ammaa ɓaawo nyalɗe tati o ummititto.”

³²Pukara'en paamaay maana anndinol ngol, ammaa ɓe kuli ƴamugo mo boo.

³³Ɓe njotti Kafarnahum. Nde ɓe nasti saare, Yeesu ƴami pukara'en muuɗum: “Dow ɗume on ngaabotiri haa laawol?”

³⁴Ammaa ɓe njeeɗi, ngam haa laawol ɓe ngaabotiri dow moy ɓurata mawnugo caka maɓɓe.

³⁵Yeesu jooɗi, ewni pukara'en muuɗum sappo e ɗiɗo, wi'i ɓe: “To goɗɗo yiɗi o laato arano, sey o waɗa hoore maako o ɓaawoojo yimɓe fuu e o laato jaggiiɗo yimɓe fuu.”

³⁶Nden o hoo'i ɓiŋngel pamarel, o darni ngel caka maɓɓe. O huufi ngel, o wi'i pukara'en maako:

³⁷“Mo jaɓi ɓiŋngel pamarel bana nge'el daliila innde am, min o jaɓi. Mo jaɓi yam, naa min o jaɓi, ammaa nelɗo yam.”

³⁸Yuhanna wi'i Yeesu: “Moodibbo, min ngi'i goɗɗo ɗon riiwra ginnaaji bee innde ma. Min ngiɗno haɗugo mo, ngam o tokkaaki en.”

³⁹Ammaa Yeesu jaabi: “Taa kaɗe mo, ngam walaa mo waawata waɗugo kaayeefi bee innde am, law ɓaawoɗon o hallina yam.

⁴⁰Ngam koo moy mo honnaaki en, ɗon bee meeɗen.

⁴¹Ngam koo moy yarni on ndiyam seɗɗa daliila innde am ngam on yimɓe Almasiihu, mi ɗon wi'a on fakat o heɓan mbarjaari maako.”

⁴²To goɗɗo do'i gooto ɓurɗo famɗugo caka nuɗɗinɓe yam nder hakke, ndikkana mo ɓe ɓila hayre namarde mawnde haa daande maako, ɓe ngubo mo nder weendu.

⁴³To ɗum juŋngo ma nastinte nder hakke, ta'u ngo, ndikka a nasta ngeendam nduumiiɗam a guddo dow nastugo bee juuɗe ma ɗiɗi nder yiite jahannama nge nyifataa sam.

⁴⁴[Ton, gilɗi nyaamanɗi ɓanndu mbaatataa, yiite boo nge nyifataa sam.]

⁴⁵To ɗum kosŋgal ma nastinte nder hakke, ta'u ngal, ndikka a nasta ngeendam nduumiiɗam bee kosŋgal gootal dow wubeego bee kosɗe ma ɗiɗi nder yiite jahannama nge nyifataa sam.

⁴⁶[Ton, gilɗi nyaamanɗi ɓanndu mbaatataa, yiite boo nge nyifataa sam.]

⁴⁷E to ɗum yiitere ma nastinte nder hakke, ɗoof nde, ndikka a nasta laamu Allah bee yiitere woore dow wubeego nder yiite jahannama bee gite ma ɗiɗi.

⁴⁸Ton, gilɗi nyaamanɗi ɓanndu mbaatataa, yiite boo nge nyifataa sam.

⁴⁹Ngam yiite lamminan koo moy fuu bana mannda.

⁵⁰“Mannda wooɗi, ammaa to lammeeŋga maajam ittake, bana noy on lamminirta ɗam fahin? Sey on laato on marɓe mannda nder mooɗon. Njooɗode jam bee koo moy.”