Read Fulfulde Luka 1 Bible Online

Luka 1 - Fulfulde bible

Luka 1

¹Yaa Teyofilus tedduɗo: Yimɓe ɗuuɗɓe kaɓdi winndugo kubaruwol kuuje laatiiɗe caka meeɗen.

²Ɓe mbinndi ko min nani haa yi'ɓe kuuje ɗe'e bee gite muuɗum'en diga fuɗɗam, halfitinaaɓe kuugal anndingo kubaruwol man.

³Ngam maajum nde mi humpiti laaɓka kuuje ɗe'e fuu diga fuɗɗoode maaje, ɗum haandani yam haa mi winndane ɗum bee tokkindirki, yaa Teyofilus tedduɗo.

⁴Mi waɗi ɗum ngam haa a faama hoolɗinaare ekkitinolji ɗi keɓɗa.

⁵Nder zamanu Hirudus ɗonno laamani lesdi Yahudiya, woodino goɗɗo limanjo, mo innde muuɗum Zekariya, gonɗo nder yeɓre[1] liman'en Abiya. Innde debbo maako Elizabet, mo danygol Haruna, hooreejo liman'en.

⁶Ɓe ɗiɗo fuu ɓe adili'en yeeso Allah, ɓe ɗon ɗowtano umrooje Jawmiraawo e farillaaji muuɗum fuu bee booɗɗum.

⁷Ammaa ɓe ngalaano ɓiŋngel, ngam Elizabet laatino dimaro e non boo ɓe ɗiɗo fuu ɓe naywi.

⁸Nyannde feere Zekariya ɗon huuwa kuugal limanku muuɗum yeeso Allah, ngam ɗum wakkati kuugal yeɓre maako.

⁹Liman'en mboowi senndugo kuuɗe hakkunde muuɗum'en bee waɗugo kur'u. Nyalaade man, Zekariya suɓaama, o heɓi nastugo nder haykaliiru ngam wulugo uurle yeeso Jawmiraawo.

¹⁰Saa'i o ɗon wula uurle, mooɓre ummaatoore fuu ɗon waɗa do'a haa yaasi.

¹¹Ɗon nii, Zekariya yi'i malaa'ikaajo ɗon dari haa wakeere gulduɗum uurle nyaamre.

¹²Nde o yi'i mo, o hultori, o sakli.

¹³Ammaa malaa'ikaajo wi'i mo: “Taa hultor, Zekariya, ngam Allah nani do'aare maaɗa. Debbo maaɗa Elizabet danyante ɓiŋngel, a innda ngel Yuhanna.

¹⁴A seyoto masin, yimɓe ɗuuɗɓe ceyodoto bee maaɗa ngam danyeeki maagel.

¹⁵Ngam o laatoto mawɗo yeeso Jawmiraawo. O yarataa inaboojam malla nguykinoojam koo ɗame. O kebbinteeɗo bee Ruuhu Ceniiɗo diga nder reedu daada maako.

¹⁶O lornan Isra'iila'en ɗuuɗɓe haa Jawmiraawo Allah maɓɓe.

¹⁷O aartan Jawmiraawo wargo nder ruuhu e baawɗe ɗe annabi Eliya heɓno, ngam o lortina ɓerɗe baabiraaɓe haa ɓikkoy muuɗum'en, o wartira ɓerɗe tuurtooɓe haa hikma ka adili'en, o taaskitina ummaatoore ngam Jawmiraawo.”

¹⁸Ammaa Zekariya wi'i malaa'ikaajo: “Noy anndiranmi ɗum gooŋga? Ngam min mi naywi, debbo am boo duuɓi muuɗum ɗuuɗi.”

¹⁹Malaa'ikaajo jaabi mo: “Min mi Jibirilla, mi ɗon daro yeeso Allah ngam huuwango mo. Kaŋko neli yam mi wolwane, mi anndine kubaruwol belŋgol ngo'ol.

²⁰Ammaa a nuɗɗinaay bolle am tammiiɗe gooŋɗugo to wakkati man waɗi. Ngam maajum a laatoto muukaajo, a waawataa wolwugo haa to kuuje ɗe'e laatake.”

²¹Saa'i man yimɓe ɗon ndeena Zekariya. Ɓe kayɗini ngam o neeɓi nder haykaliiru.

²²Nde o wurti, o waawaay wolwango ɓe, ɓe paami o yi'i kaayeefi nder haykaliiru. O ɗonno waɗana ɓe alaamaaji bee juuɗe, ngam o waawaay wolwugo.

²³Nde wakkati kuugal Zekariya nder haykaliiru timmi, o hooti saare maako.

²⁴Nyalɗe seɗɗa ɓaawoɗon, debbo maako Elizabet reedi, o suuɗi baakin lebbi jowi. O wi'i:

²⁵“Ndaa ko Jawmiraawo waɗani yam: O ittani yam semteende ndimaraaku am caka yimɓe fuu.”

²⁶Nde Elizabet reedi, waɗi lebbi joweego, Allah neli malaa'ikaajo Jibirilla haa berniwol bi'eteeŋgol Nasaratu nder lesdi Galiili.

²⁷O neli mo haa paanyo debbo, kaɓɓanaaɗo gorko bi'eteeɗo Yusufu, mo danygol Daawuda. Innde paanyo debbo boo Mariyama.

²⁸Malaa'ikaajo wari haa maako, wi'i mo: “Seya, an keɓɗo mo'ere Allah! Jawmiraawo ɗon wondi bee maaɗa!”

²⁹Bolle ɗe'e cakli Mariyama masin, o numi ko ɗum yiɗi wi'go.

³⁰Malaa'ikaajo wi'i mo: “Taa hultor, Mariyama, ngam a heɓi mo'ere Allah.

³¹A tammi reedugo, a danyan ɓiɗɗo gorko, a inndan mo Yeesu.

³²O laatoto mawɗo, ɓe ewnoto mo Ɓiɗɗo Allah Ɓaŋiiɗo. Jawmiraawo Allah hokkan mo laamu kaaka maako Daawuda.

³³O laamanto ummaatoore Isra'iila haa foroy, laamu maako timmataa sam.”

³⁴Mariyama wi'i malaa'ikaajo: “Noy ɗum laatorto, nde min mi anndaa gorko sam?”

³⁵Malaa'ikaajo wi'i mo: “Ruuhu Ceniiɗo waran dow maaɗa, baawɗe Allah Ɓaŋiiɗo suddete bana ɗowdi. Ngam maajum ɓiɗɗo mo a tammi danyugo, laatoto Ceniiɗo e ɓe ewnoto mo Ɓiɗɗo Allah.

³⁶Elizabet, banndiraawo maaɗa ɗon bee reedu, o danyan ɓiŋngel gorgel, koo nde o naywi, ɓe mbi'no mo o dimaro boo, ammaa jonta o ɗon bee reedu lebbi joweego.

³⁷Ngam walaa ko saɗani Allah.”

³⁸Mariyama wi'i: “Min mi korɗo Jawmiraawo, ɗum laatano yam bana mbi'ɗa.” Nden malaa'ikaajo dilli, acci mo.

³⁹Nder balɗe man Mariyama ummi, dilli bee jaawal haa wuro woɗŋgo, nder kooseeje lesdi Yahudiya.

⁴⁰O nasti saare Zekariya, o hoofni Elizabet.

⁴¹Saa'i Elizabet nani koofŋgol Mariyama, ɓiŋngel fuɗɗi dimmbaago nder reedu maako. Nden Elizabet heewi Ruuhu Ceniiɗo,

⁴²wi'i bee sawtu: “A barkiɗinaaɗo caka rewɓe fuu, ɓiŋngel ngel a tammi danyugo boo barkiɗinaaŋgel!

⁴³Min mi moye haa daada[2] Jawmiraawo am wara haa am?

⁴⁴Ngam ndaa, saa'i mi nani koofŋgol ma, ɓiŋngel dimmbi nder reedu am ngam seyo.

⁴⁵Barka laatani ma ngam a nuɗɗini ko Jawmiraawo wi'i ma, ɗum laatoto.”

⁴⁶Nden Mariyama wi'i: “Nafsu am ɗon maŋgta Jawmiraawo,

⁴⁷ɓernde am ɗon heewi seyo ngam Allah am, kisnoowo yam!

⁴⁸Ngam o yerdi laarugo korɗo maako leesɗo. Fakat, diga jonta yimɓe gide fuu mbi'an mi barkiɗinaaɗo,

⁴⁹ngam Allah Baawɗo waɗani yam kuuje mawɗe! Innde maako woni Ceniiɗo,

⁵⁰enɗam maako ɗon dow hulɓe mo diga yidere haa yidere.

⁵¹O huuwi kuuɗe mawɗe bee juŋngo maako semmbiɗŋgo, o saŋkiti mawnitiiɓe nder numooji muuɗum'en.

⁵²O jippini semmbiɗɓe diga leese laamu muuɗum'en, o ɓaŋgti leesɓe.

⁵³O haarni dolɓe bee kuuje booɗɗe, riskuɓe boo, o riiwi ɓe juuɗe meere.

⁵⁴O walli Isra'iila, jagganiiɗo mo, o siftori enɗam maako,

⁵⁵bana o wi'no kaakiraaɓe meeɗen, waato Ibrahiima e danygol muuɗum haa foroy.”

⁵⁶Mariyama jooɗodi bee Elizabet ko dillani lebbi tati, nden o hooti saare maako.

⁵⁷Nde saa'i Elizabet danyata yotti, o danyi ɓiɗɗo gorko.

⁵⁸Heeddiɗɗiraaɓe maako e banndiraaɓe maako nani Jawmiraawo waɗani mo enɗam ɗuuɗɗam, ɓe ceyodi bee maako.

⁵⁹Nde nyalaade joweetataɓre waɗi, ɓe ngari ngam juulnugo[3] ɓiŋngel go, ɓe ngiɗno inndugo ngel Zekariya, bana innde baaba maagel.

⁶⁰Ammaa daada maagel wi'i: “Aa'a, naa non, ngel inndete Yuhanna.”

⁶¹Ɓe mbi'i mo: “Walaa koo gooto nder banndiraaɓe ma mari innde nde'e.”

⁶²Nden ɓe mbaɗani baaba maagel alaama bolle bee juuɗe, ngam haa ɓe ƴama mo innde ndeye o yiɗi inndugo ngel.

⁶³Zekariya anndini ɓe, ɓe ndokka mo alluha. Nden o winndi: “Innde maagel Yuhanna.” Yimɓe fuu kayɗini.

⁶⁴Saa'i man nden hunnduko Zekariya maɓɓiti, ɗemŋgal maako fiisti, o fuɗɗi wolwugo, o maŋgti Allah bee sawtu.

⁶⁵Heeddiɗɗiraaɓe maako fuu kultori masin. Haa lesdi kooseeje Yahudiya fuu ɓe mbolwi haala kuuje ɗe'e.

⁶⁶Nanɓe ɗum fuu tokki numugo: “Ɗume ɓiŋngel nge'el tammi laataago?” Ngam fakat, baawɗe Jawmiraawo ɗon ngondi bee maagel.

⁶⁷Zekariya, baaba ɓiŋngel go heewi Ruuhu Ceniiɗo, o waɗi annabaaku, o wi'i:

⁶⁸“Yettoore laatano Allah, Jawmiraawo Isra'iila, ngam o hakkilani ummaatoore maako, o rimɗini nde.

⁶⁹O darnani en kisnoowo cemmbiɗɗo, nder danygol Daawuda, jaggiiɗo maako.

⁷⁰Kanjum woni ko o anndinno diga ɓooyma bee kunnduɗe annabi'en maako seniiɓe,

⁷¹o wi'no o rimɗinan en diga juuɗe konne'en meeɗen, e baawɗe wanyɓe en fuu.

⁷²O waŋginani kaakiraaɓe meeɗen enɗam maako, o siftori alkawal maako ceniiŋgal.

⁷³Ngam Allah hunani kaakiraawo meeɗen Ibrahiima,

⁷⁴o hisnan en baawɗe konne'en meeɗen, haa en njaggano mo bilaa kulol,

⁷⁵ngam haa en laato yimɓe maako seniiɓe e adili'en nder balɗe ngeendam meeɗen fuu.

⁷⁶An boo, ɓiŋngel pamarel, ɓe ewnoto ma annabiijo Allah Ɓaŋiiɗo, ngam a aartan Jawmiraawo ngam haa a mo'inana mo laawol.

⁷⁷A anndinan yimɓe maako o hisnan ɓe, bee yaafango ɓe hakkeeji maɓɓe.

⁷⁸Allah meeɗen o keewɗo enɗam, daliila enɗam ɗa'am, o yaynan dow meeɗen bana naaŋge puɗanŋge,

⁷⁹ngam yaynango wonɓe nder nyiɓre e les ɗowdi maayde e ɗowugo kosɗe meeɗen dow laawol salaaman.”

⁸⁰Yuhanna mawni, o semmbiɗi boo nder ruuhu. O jooɗi nder ladde haa yotti wakkati o waŋgi haa ummaatoore Isra'iila.