Read Fulfulde Luka 12 Bible Online

Luka 12 - Fulfulde bible

Luka 12

¹Wakkati man yimɓe ujineeje mooɓotiri haa ɓe ɗon njaaɓnjaaɓtira. Yeesu fuɗɗi wolwango pukara'en muuɗum: “Kakkilane ufnirɗum Farisa'en, waato naafikaaku.

²Cuuɗiiɗum fuu waŋgan, sirriijum fuu faamoto.

³Ngam ko mbolwuɗon nder nyiɓre fuu, ɗum naneteeɗum nder annoora. Ko on cofndotiri nder cuuɗi, ɗum ngooyneteeɗum nder baŋguɗum.”

⁴“Mi ɗon wi'a on ɗum, onon soobiraaɓe am: Taa kule waawanɓe mbarugo ɓanndu, ammaa ɓe mbaawataa waɗugo koo ɗume ko ɓuri non.

⁵Mi hollan on mo kuloton: Kule mo waawi mbarugo, mo woodi baawɗe sakkingo nder yiite jahannamaaye boo. Nonnon, mi ɗon wi'a on, kaŋko haani huleego.

⁶Ɓe coorrataa colloy njowoy bee suleyje ɗiɗi na? Ammaa Allah yejjitittaa koo gootel maakoy.

⁷Koo gaasaaji ko'e mooɗon limaaɗi fuu. Taa kule sam, saman mooɗon ɓuri colloy ɗuuɗkoy.”

⁸“Mi ɗon wi'a on, koo moy seedi yeeso yimɓe o anndi yam, Ɓii-neɗɗo boo seedoto o anndi mo yeeso malaa'ika'en Allah.

⁹Ammaa mo yeddi yam yeeso yimɓe, o geddeteeɗo boo yeeso malaa'ika'en Allah.

¹⁰Koo moy wolwi kalluka dow Ɓii-neɗɗo, heɓan yaafuye. Ammaa mo wolwi kalluka dow Ruuhu Ceniiɗo, o yaafataake sam.

¹¹To ɓe njahri on hiiteego nder cuuɗi dewal Yahuudu'en malla yeeso laamiiɓe e marɓe baawɗe, taa ɓillore numugo no mbaŋginirton hujja mon malla ko mbi'oton.

¹²Ngam Ruuhu Ceniiɗo ekkitinan on ko mbi'oton nder saa'iire man.”

¹³Goɗɗo nder mooɓre wi'i Yeesu: “Moodibbo, wi' deerɗiraawo am senndana min ndonŋgu ngu baaba amin acci.”

¹⁴Yeesu wi'i mo: “Hey an! Moy waɗi yam kiitoowo dow mooɗon malla cenndoowo jawdi mon?”

¹⁵Nden o wi'i ɓe: “Ndeente e suunooji koo ɗiye, ngam ngeendam neɗɗo iwataa haa jawdi mum, koo no o riskiri fuu.”

¹⁶O wolwani ɓe balndol ngo'ol: “Woodi goɗɗo diskuɗo, o woodi gese, ɗe mbaɗani mo ƴaamnde ɗuuɗnde.

¹⁷O numi nder ɓernde maako: Ko mbaɗanmi? Ngam mi walaa babal haa mooɓtanmi ƴaamnde am.

¹⁸O wi'i: Yowwa, ndaa ko mbaɗanmi: Mi fusan beembe am, mi maha ɓurɗe mawnugo, mi mooɓta alkamaari e jawdi am fuu haa ton.

¹⁹Nden mi wi'ana yoŋki am: A woodi jawdi ɗuuɗndi sigaandi, he'anndi ngam duuɓi ɗuuɗɗi! Siwta, nyaam, yar, seya!

²⁰Ammaa Allah wi'i mo: Sooya-hakkiiloojo, jemmaare nde'e mi hoosan yoŋki ma, kuuje maaɗa mooɓtaaɗe ɗe'e fuu, moy marata ɗe?

²¹Bana nii ɗum laatanto mo mooɓtani hoore mum jawdi, mo laataaki diskuɗo yeeso Allah.”

²²Ɓaawoɗon Yeesu wi'i pukara'en muuɗum: “Ngam maajum mi ɗon wi'a on: Taa caklane nguure mooɗon, waato ko on nyaamata malla ko on ɓornoto.

²³Ngam yoŋki ɓuri nyaamdu saman, ɓanndu boo ɓuri limce saman?

²⁴Ndaare leekuuje: Ɗe aawataa, ɗe codataa, ɗe mooɓtataa koo ɗume nder cigorɗum malla beembal, ammaa Allah ɗon nyaamna ɗe. On ɓurataa colli saman piw na?

²⁵Moy caka mooɗon waawi ɓesdugo balɗe muuɗum koo seɗɗa bee saklere muuɗum?

²⁶Nde on mbaawataa waɗugo koo peetum, ngam ɗume cuklantooɗon luttuɗum?

²⁷Ndaare pinndi ladde no ndi mawnirta. Ndi huuwataa, ndi sannyataa, ammaa mi ɗon wi'a on: Koo Suleymaanu bee daraja muuɗum fuu meeɗaay ɓornaago limce booɗɗe bana ngoori man.

²⁸Allah ɓorni huɗooji ɗi tawe hannde nder ladde, jaŋngo boo ɗi cakkine nder yiite. To non kam, o ɓornataa on ko ɓuri non na, onon famɗa-nuɗɗinki'en?

²⁹Taa ɓillore ko nyaamoton malla ko njaroton. Taa cakle ko'e mooɗon.

³⁰Heefeerɓe duniyaaru cuklanto kuuje ɗe'e nde weeti fuu. Ammaa Baabiraawo mooɗon anndi on ngoodi haaje kuuje ɗe'e.

³¹Aarte suklanaago laamu maako, nden o hokkan on kuuje ɗe'e fuu bana ɓesdaari.”

³²“Taa kultore, onon tokkere famarde, ngam Baabiraawo yiɗi hokkugo on laamu muuɗum.

³³Coorre ko marɗon, caahe ɗum talaka'en, mbaɗane ko'e mooɗon boorooji sigaago ceede ɗi mbonnataako e jawdi ndi re'ataa haa asama: Haa ton gujjo ɓadataako, gilɗi boo mbonnataa ɗum.

³⁴Ngam haa jawdi mooɗon woni, ton ɓerɗe mooɗon boo ngonata.”

³⁵“Taaskitine ko'e mon, pittirlaaji mooɗon boo jamnaaɗi.

³⁶Laate bana yimɓe reenanɓe jaagorɗo muuɗum'en gartanɗo diga ɓaŋgal, ngam ɓe maɓɓitana mo to o yottake, o tappi dammugal.

³⁷Barka laatano suka'en ɓe jaagorɗo mum'en yaake wartata, tawa ɗon ayna. Gooŋga mbi'anmi on, o taadoto, o jo'inan ɓe haa taabal nyaamdu, o ɓaditan ɓe, o huuwanan ɓe.

³⁸Barka laatano suka'en ɓe'e, koo to o warti caka jemma malla saali seɗɗa, o tawi ɓe ɓe ɗon ayna.

³⁹Paame booɗɗum: To jawmu saare anndino saa'iire ndeye gujjo warata, o accataano gujjo nasta mo saare.

⁴⁰Onon boo, laate taaskiiɓe, ngam Ɓii-neɗɗo waran nder saa'iire nde on tammaaki sam.”

⁴¹Piyer wi'i mo: “Jawmiraawo, minin tan mbolwanɗa balndol ngo'ol na malla yimɓe fuu?”

⁴²Jawmiraawo jaabi: “Moy woni kaliifaajo koolaaɗo, kakkilɗo, mo jaagorɗo mum tammi darnugo dow huuwooɓe mum, ngam o hokka ɓe geɗal nyaamdu maɓɓe nder wakkati man?

⁴³Barka laatanto kuuwoowo oo, to jaagorɗo maako warti, tawti mo o ɗon suklani kuugal nga'al.

⁴⁴Gooŋga mbi'anmi on: Jaagorɗo darnan mo dow jawdi muuɗum fuu.

⁴⁵Ammaa to kuuwoowo man wi'i nder ɓernde muuɗum: Jaagorɗo am neeɓi wartugo, nden o fuɗɗi fiyugo huuwooɓe woɗɓe, worɓe e rewɓe, o ɗon nyaama, ɗon yara e wuyka,

⁴⁶jaagorɗo wartoyan nyalaade nde suka oo tammataako e nder saa'iire nde o anndaa. O riiwan mo, o hokkan mo ngeenaari naafiki'en.

⁴⁷Kuuwoowo annduɗo ko jaagorɗo mum yiɗi, ammaa taaskitinaay koo ɗume ko jaagorɗo maako yiɗi, o heɓan piyɗe ɗuuɗɗe.

⁴⁸Ammaa mo anndaa ko jaagorɗo mum yiɗi, waɗi ko he'i fiyeego, o heɓan piyɗe seɗɗa non. Mo ɓe ndokki ɗuuɗɗum, ɓe ƴaman mo ɗuuɗɗum boo. Mo ɓe kalfini ɗuuɗɗum, ɓe ƴaman mo ko ɓuri ɗuuɗugo.”

⁴⁹“Mi wari ngam sakkingo yiite dow lesdi. Mi yiɗino nge huɓɓe jonta!

⁵⁰Woodi baptisma ka njaɓanmi, mi ɓilli haa ɗum hebbitine.

⁵¹On tammi mi wari ngam waddugo salaaman dow lesdi na? Mi ɗon wi'a on, naa salaaman, ammaa cennduki.

⁵²Ngam yeeso ɗo, yimɓe njowo nder saare woore cenndoto: Tato narrataa bee ɗiɗo, ɗiɗo boo narrataa bee tato.

⁵³Baaba waadan bee ɓiyum, ɓiɗɗo gorko boo bee baaba mum. Daada waadan bee ɓiyum debbo, ɓiɗɗo debbo boo bee daada mum. Esiraawo debbo boo waadan bee esum debbo.”

⁵⁴Yeesu wi'i mooɓre fahin: “To on ngi'i ruuldere ummake haa hiirnaaŋge, law on ɗon mbi'a iyeende toɓan, ɗum waɗan boo.

⁵⁵To on ngi'i henndu iwi fombina boo, on ɗon mbi'a: Gulɗum waɗan, ɗum waɗan boo.

⁵⁶Naafiki'en! On anndi fassitirgo ko laatoto dow lesdi e ko laatoto haa dow, ngam ɗume on anndaa fassitirgo zamanuuru jontaaru ndu'u?”

⁵⁷“Ngam ɗume on keɓtantaa ko'e mon ko haani waɗugo?

⁵⁸To a ɗon yahda bee mo njokkirɗa haa pellel kiita, haɓdu narrugo bee maako diga laawol, ngam taa o yahre haa kiitoowo, nden kiitoowo hokke haa sooje'en e sooje'en boo nastine fursina[18].

⁵⁹Mi ɗon wi'e: A wurtataako ton sam, sonaa to a yoɓi ko ɓe kiiti ma fuu.”