Read Fulfulde Luka 14 Bible Online

Luka 14 - Fulfulde bible

Luka 14

¹Nyannde siwtorde feere, Yeesu yehi saare gooto nder mawɓe Farisa'en, ngam o nyaama ton. Wonɓe ton ayni mo.

²Ndaa goɗɗo mo ɓanndu mum uppi daliila nyawu ɗon ndari yeeso maako.

³Yeesu ƴami moodiɓɓe tawreeta e Farisa'en, wi'i: “Ɗum duŋaaɗum yamɗitingo nyannde siwtorde na?”

⁴Ɓe njeeɗi. Nden Yeesu jogi nyawɗo go, yamɗitini mo, acci mo o dilla.

⁵Nden o wi'i ɓe: “Moy caka mooɗon, to ɓiŋngel mum malla ngaari mum yollake nder ɓulndu, wurtintaa ɗum law koo to nyannde siwtorde na?”

⁶Ɓe mbaawaay jaabaago mo koo ɗume dow maajum.

⁷Yeesu yi'i no ewnaaɓe cuɓri joole tedduɗe, o wolwani ɓe, o wi'i:

⁸“To goɗɗo ewnake ma haa nyaamduuji ɓaŋgal, taa jooɗoya haa babal tedduŋgal. Teema woodi caka ewnaaɓe mo ɓuri ma daraja.

⁹Taa mo ewni on ɗiɗo fuu wara wi'e: Accan oo ɗo babal nga'al. A semtan jooɗoyaago haa babal ɓaawowal.

¹⁰Ammaa to a ewnaama, yah jooɗa haa babal ɓaawowal, haa to ewniiɗo ma wari, wi'i ma: Soobaajo am, war haa joonde ɓurnde wooɗugo nde'e. Ɗum laatante tedduŋgal yeeso ɓe a nyaamdata fuu.

¹¹Ngam mo mawnini hoore mum, o leestinteeɗo, mo leestini hoore mum boo, o ɓaŋgteteeɗo.”

¹²Nden o wolwani boo ewniiɗo mo go: “To a waɗani yimɓe nyaamduuji koo ndey, taa ewna soobiraaɓe ma malla deerɗiraaɓe ma malla banndiraaɓe ma, koo heeddiɗɗiraaɓe ma riskuɓe, ngam taa ɓe ewne kamɓe boo, ɓe mbarjo ma.

¹³Ammaa to a waɗi nyaamdu juulde, ewna talaka'en e jiijiiɓe e woosɓe e wumɓe.

¹⁴A heɓan barka ngam ɓe mbaawataa warjaago ma. Allah warjoto ma ɗum nyannde ummitineeki adili'en.”

¹⁵Nde gooto caka nyaamdanɓe bee Yeesu nani bolle ɗe'e, o wi'i: “Barka laatanto nyaamanɗo nyaamdu mum nder laamu Allah.”

¹⁶Yeesu jaabi mo: “Goɗɗo feere waɗi nyaamdu ɗuuɗndu, o ewni yimɓe ɗuuɗɓe.

¹⁷Wakkati nyaamugo, o neli suka maako o wi'a ewnaaɓe: Ngare, ngam koo ɗume fuu taaskake.

¹⁸Ɓe fuu maɓɓe ɓe puɗɗi yelditaago. Arano wi'i suka go: Mi soodi ngesa, sey mi yaha mi laara ka, mi tori ma, yaafam.

¹⁹Goɗɗo boo wi'i: Mi soodi ga'i sappo cindaaɗi ɗiɗi ɗiɗi, mi yiɗi laarndaago ɗi, mi tori ma, yaafam.

²⁰Goɗɗo feere boo wi'i: Mi ɓaŋgi neeɓaay, ngam maajum mi heɓataa wargo.

²¹Suka lorti haa jaagorɗo muuɗum, yecci mo ɗum fuu. Nden jawmu saare ɓerni, wi'i suka muuɗum: Yah law haa dalde wuro e haa laabi, ewna talaka'en e jiijiiɓe e wumɓe e woosɓe.

²²Suka yehi, warti, wi'i: Jaagorɗo, ko a umri waɗaama, ammaa babal ɗon lutti fahin.

²³Jaagorɗo wi'i suka go: Yah haa buuwi e laabi kommbi gese, doolu yimɓe ɓe a fottata bee muuɗum'en fuu ɓe nasta, ngam haa saare am heewa.

²⁴Mi ɗon wi'a on: Koo gooto haa aartuɓe ewneego mettataa nyaamdu am!”

²⁵Mooɓe ɗuuɗɗe ndillidi bee Yeesu. O yeesiti, o wi'i ɓe:

²⁶“To goɗɗo wari haa am e o ɓuraay yiɗugo yam dow baaba maako e daada maako e debbo maako e ɓikkoy maako e deerɗiraaɓe maako worɓe e rewɓe, koo yoŋki maako boo, o waawataa laataago pukaraajo am.

²⁷Koo moy mo roondaaki gaafaaŋgal mum ngam tokkaago yam, waawataa laataago pukaraajo am.

²⁸Moy haa mooɗon, to yiɗi mahugo suudu aynirdu, o jooɗataako, o hiimo ko o majjinta, o laara to o waawan timmingo.

²⁹Ngam taa o wallina caɓɓawal nden o waawaay timmingo, yi'ɓe mo njancan mo, mbi'an:

³⁰Gorko oo fuɗɗi mahugo, o waawaay timmingo.

³¹Malla laamiiɗo moye, to yiɗi yahugo waɗa konu bee laamiiɗo goɗɗo, o jooɗataako tawon, o hiimo, to o waawan yahugo bee yimɓe ujine sappo, ngam fottugo bee garananɗo mo bee yimɓe ujine noogas?

³²To o waawataa, diga laamiiɗo man ɗon daayi tawon, o nelan nelaaɓe ngam ƴamugo no ɓe culhotira.

³³Bana non haa mooɗon boo, mo accaay jawdi muuɗum fuu, waawataa laataago pukaraajo am.”

³⁴“Mannda wooɗi, ammaa to lammeeŋga maajam ittake, noy ɗam heɓtirta lammeeŋga man fahin?

³⁵Ɗam nafataa haa lesdi, ɗam nafataa ngam koonal, ɓe ndufan ɗam yaasi. Mo woodi noppi nanugo, nana!”