Read Fulfulde Luka 18 Bible Online

Luka 18 - Fulfulde bible

Luka 18

¹Yeesu wolwani ɓe balndol ngam faamtingo ɓe sey ɓe tokko toraago, taa ɓe tampa sam.

²O wi'i ɓe: “Woodino haa berniwol feere kiitoowo mo hulataa Allah sam, walaa ko yaali mo bee koo moy fuu.

³Woodi boo nder berniwol man debbo jurumɗo mo ɗon wara tum, wi'a mo: Waɗanam kiita hakkunde am e konneejo am.

⁴Kiitoowo man sali, haa duuri. Ammaa ɓaawoɗon o numi nder ɓernde maako: Mi hulataa Allah, walaa ko yaali yam bee koo moy boo,

⁵ammaa nde nii jurumɗo oo ɗon daamammi, mi waɗanan mo kiita, ngam taa o tokko wargo, o jiiɓa hakkiilo am.”

⁶Jawmiraawo ɓesdi wi'ugo: “Nane booɗɗum ko kiitoowo kalluɗo oo wi'ata.

⁷Kadi, Allah waɗanta suɓaaɓe muuɗum wookananɓe mo jemma e naaŋge kiita gooŋgɗuka bee law na?

⁸Mi ɗon wi'a on, o waɗanan ɓe kiita ngooŋɗuka bee law. Ammaa wakkati loraaki Ɓii-neɗɗo, o tawan marɗo nuɗɗinki dow lesdi na?”

⁹Yeesu wolwi balndol feere fahin ngam laaranɓe ko'e muuɗum'en ɓe adili'en, ɓe ɗon njawo woɗɓe:

¹⁰“Yimɓe ɗiɗo njehi haa haykaliiru ngam waɗugo do'a, gooto Farisaajo, gooto boo jomnoowo.

¹¹Farisaajo dari, waɗi do'a nder ɓernde mum bana ni'i: Yaa Allah, mi yetti ma ngam mi laataaki bana yimɓe feere, laatiiɓe wuyɓe, sooyɓe-adilaaku, jeenooɓe malla bana jomnoowo oo.

¹²Mi ɗon suumo asaweere fuu nde ɗiɗi, mi ɗon itta zakka[25] nder ko keɓanmi fuu.

¹³Jomnoowo dari daayiiɗum, o numaay koo ɓaŋgtugo gite haa asama, ammaa o fiyi wiɓɓere maako, o wi'i: Yaa Allah am, yurminam, min mi hakkeejo!

¹⁴Mi ɗon wi'a on, kaŋko o heɓi yerduye Allah nde o hooti saare maako, ammaa Farisaajo heɓaay. Ngam koo moy mawnini hoore mum, o leestinteeɗo e mo leestini hoore mum boo, o ɓaŋgteteeɗo.”

¹⁵Ɓe ngaddani Yeesu ɓikkoy pamaroy ngam o meema koy, ammaa nde pukara'en ngi'i ɗum, ɓe peli wadduɓe koy.

¹⁶Yeesu ɓadini ɓikkoy go kommbi mum, wi'i: “Acce ɓikkoy pamaroy ngara haa am. Taa kaɗe koy, ngam laamu Allah woodani irin maakoy.

¹⁷Gooŋga mbi'anmi on: Mo jaɓaay laamu Allah bana ɓiŋngel pamarel, fakat o nastataa ngu sam.”

¹⁸Yahuuduujo mawɗo feere ƴami Yeesu: “Moodibbo booɗɗo, ko mbaɗanmi haa mi heɓa ngeendam nduumiiɗam?”

¹⁹Yeesu jaabi mo: “Ngam ɗume a wi'ata yam mi booɗɗo? Walaa booɗɗo, sey Allah gooto tan woni booɗɗo!

²⁰A anndi umrooje: Taa waɗ njeenu, taa mbar-hoore, taa wujju, taa seeda fewre, teddin baaba ma e daada ma.”

²¹Gorko go wi'i: “Mi ɗowtani umrooje ɗe'e fuu diga mi derkeejo tawon.”

²²Nde Yeesu nani ɗum, o wi'i mo: “Luttani ma huunde woore: Soorru ko marɗa fuu, hokku ɗum talaka'en, nden kam a heɓoyan ndesaari haa asamanji. Nden war, tokkam.”

²³Nde o nani bolle ɗe'e, o suni masin, ngam o diskuɗo masin.

²⁴Nde Yeesu yi'i o cuniiɗo, o wi'i: “Ɗum saɗani riskuɓe nastugo laamu Allah.

²⁵Ngeelooba saalo nder wurdere baatal ɓuri hoyugo dow diskuɗo nasta laamu Allah.”

²⁶Nanɓe mo mbi'i: “To non kam, moy waawata hisugo?”

²⁷Yeesu jaabi: “Ko waɗataako haa yimɓe, ɗum waɗoto haa Allah.”

²⁸Nden Piyer wi'i: “Ndaa, min acci mardi amin fuu, min tokki ma!”

²⁹Yeesu wi'i ɓe: “Gooŋga mbi'anmi on, koo moy acci saare mum, debbo mum, deerɗum'en, saaro'en mum malla ɓikkoy mum ngam daliila laamu Allah,

³⁰heɓan cowi ɗuuɗɗi nder zamanuuru jontaaru ndu'u e nder waranndu boo o heɓan ngeendam nduumiiɗam.”

³¹Yeesu ewni pukara'en sappo e ɗiɗo haa muuɗum, o wi'i ɓe: “Ndaa, en ɗon njaha Urusaliima, ko annabi'en mbinnduno dow Ɓii-neɗɗo fuu laatoto ton.

³²Ngam ɓe ndokkan mo haa juuɗe heefeerɓe, ɓe njancan mo, ɓe torran mo, ɓe tuutan tuuɗe dow maako,

³³ɓe ɓoccan mo. Ɓaawoɗon ɓe mbaran mo, nyalaade tataɓre o ummititto.”

³⁴Ammaa ɓe paamaay koo ɗume nder ko o wi'i. Haala ka'a laati cuuɗiika haa maɓɓe, ɓe anndaa ko o yiɗi wi'go.

³⁵Nde Yeesu ɓadi Yeriko, bumɗo feere ɗon jooɗi kommbi laawol, o ɗon rooko.

³⁶Nde o nani mooɓre ɗon saalo, o ƴami ko waɗi.

³⁷Ɓe anndini mo: “Ɗum Yeesu Nasaratuujo saaloto.”

³⁸O hooli: “Yeesu, ɓii Daawuda, enɗam!”

³⁹Ardiiɓe yeeso peli mo, ngam haa o jeeɗo. Ammaa o ɓurti hoolugo: “Ɓii Daawuda, enɗam!”

⁴⁰Yeesu dari, umri: Ngadde mo haa kommbi am. Nde bumɗo ɓaditi, Yeesu ƴami mo:

⁴¹“Ɗume ngiɗɗa mi waɗane?” O jaabi: “Jawmiraawo, wumtinam.”

⁴²Yeesu wi'i mo: “Wumtu, nuɗɗinki ma hisni ma!”

⁴³Wakkati man nden o wumti, o tokki Yeesu, o ɗon teddina Allah. Yimɓe yi'ɓe ɗum fuu maŋgti Allah.