Read Fulfulde Luka 2 Bible Online

Luka 2 - Fulfulde bible

Luka 2

¹Nder saa'i man laamiiɗo Agustus, umri binndol yimɓe nder lesɗe maral maako fuu.

²Kaŋgol woni binndol aranol, ngol waɗi yaake Kiriniyus ɗonno ngomna lesdi Siriya.

³Yimɓe njehi ngam winndeego, koo moy fuu haa wuro iwde muuɗum.

⁴Yusufu ummi wuro Nasaratu nder lesdi Galiili, yehi nder lesdi Yahudiya, haa Baytilaama, wuro laamiiɗo Daawuda danyano, ngam o iwi haa asŋgol Daawuda.

⁵O yehi ton ngam winndeego, kaŋko e Mariyama, kaɓɓanaaɗo maako, reeduujo.

⁶Yaake ɓe ɗon ton, nyalaade haa Mariyama ɓesna yotti.

⁷O danyi ɓiŋngel gorgel, afel maako, o saawi ngel nder limce, o wallini ngel nder nyaamnirde dabbaaji, ngam ɓe keɓaay nokkuure nder saare haa hoɗɓe mbeerata.

⁸Woodino waynaaɓe haa ladde nder lesdi maajum, ɓe ɗon ayna tokke dammooji maɓɓe jemma.

⁹Malaa'ikaajo Jawmiraawo waŋgani ɓe, tedduŋgal Jawmiraawo yayni dow maɓɓe, ɓe kultori masin.

¹⁰Ammaa malaa'ikaajo wi'i ɓe: “Taa kultore! Ngam mi waddani on kubaruwol belŋgol, ceynanŋgol masin ngam ummaatoore fuu.

¹¹Jemmaare hanndeere nde'e, kisnoowo danyanaama on nder wuro Daawuda, kaŋko woni Almasiihu, Jawmiraawo.

¹²Ndaa, on keɓtiran mo bee alaama ka'a: On tawan ɓiŋngel caawaaŋgel bee limce, ballinaaŋgel nder nyaamnirde dabbaaji.”

¹³Law, mooɓre malaa'ika'en asama kawti bee malaa'ikaajo go, ɓe teddini Allah, ɓe mbi'i:

¹⁴“Tedduŋgal haa Allah towɗo dow asamanji, salaaman boo dow lesdi haa yimɓe yiɗaaɓe Allah!”

¹⁵Nde malaa'ika'en acci ɓe, lorti haa asama, waynaaɓe mbi'mbi'tiri hakkunde muuɗum'en: “Ndillen haa en njotto Baytilaama, en ndaara ko Jawmiraawo anndini en go.”

¹⁶Ɓe njaawi yahugo ton, ɓe tawi Mariyama bee Yusufu e ɓiŋngel keccel, ngel ɗon waali nder nyaamnirde dabbaaji.

¹⁷Nde ɓe ngi'i ngel, ɓe ngecci ko malaa'ikaajo wi'no ɓe dow maagel.

¹⁸Nanɓe ko waynaaɓe mbi'i fuu, kayɗini.

¹⁹Ammaa Mariyama jogi ɗum fuu nder ɓernde muuɗum, o tokki numtugo ɗum.

²⁰Nden waynaaɓe lori, ɓe ɗon teddina Allah, ɓe ɗon maŋgta mo ngam kuuje ɗe ɓe nani e ɓe ngi'i fuu, ngam ɗum fuu ɗum laati bana malaa'ikaajo anndinno ɓe.

²¹Nde nyalɗe joweetati caali, ɓe njuulni[4] ɓiŋngel, ɓe inndi ngel Yeesu. Innde nde malaa'ikaajo wi'no daada maagel diga o siwaa reedugo.

²²Nde wakkati laɓɓinki[5] Mariyama fodde tawreeta Muusa hiɓɓi, saaro'en njahri ɓiŋngel haa Urusaliima, ngam ɓe ngadda ngel yeeso Jawmiraawo nder haykaliiru.

²³Ngam tawreeta Jawmiraawo wi'i: “Ɓiɗɗo gorko afo fuu, Jawmiraawo jeyi.”

²⁴Ɓe ngari boo ngam ɓe lii'o kirseteeɗum bana Jawmiraawo umri: “Pooli masar ɗiɗi malla pooloy ɗiɗoy.”

²⁵Woodino goɗɗo feere ton, innde maako Simeyon, o adiliijo e kulɗo Allah, o ɗonno reena kisnoowo Isra'iila garanɗo. Ruuhu Ceniiɗo ɗon wondi bee maako,

²⁶anndini mo o maayataa, sey to o yi'i Almasiihu nelaaɗo Jawmiraawo.

²⁷Ruuhu yerɓi mo, o yehi nder haykaliiru. Saa'i maajum saaro'en Yeesu ngaddi ɓiŋngel muuɗum'en ngam ɓe mbaɗana ngel ko tawreeta umri.

²⁸Simeyon hoo'i ngel haa juuɗe muuɗum, o yetti Allah e o wi'i:

²⁹“Jonta yaa Jawmiraawo, a hebbitini iinawol ngol a waɗi. Accu maccuɗo maaɗa maaya nder salaaman.

³⁰Ngam mi yi'i kisndam maaɗa bee gite am,

³¹kisndam ɗam a taaskitinani ummaatooje fuu.

³²Kanjum woni annoora ka waŋginte haa ummaatooje goɗɗe, kaŋka laatoto boo tedduŋgal ummaatoore maaɗa Isra'iila.”

³³Baaba e daada Yeesu kayɗini nde ɓe nani Simeyon ɗon wolwa dow maako bana non.

³⁴Simeyon barkiɗini ɓe e o wi'i Mariyama, daada Yeesu: “Allah suɓi ɓiŋngel nge'el ngam laataago daliila do'uki e ummuki yimɓe ɗuuɗɓe nder Isra'iila, o laatoto alaama Allah ka yimɓe tammaay jaɓugo.

³⁵O waŋginan numooji yimɓe cuuɗiiɗi. An bee hoore maaɗa boo, naaworla tufete ɓernde bana kaafahi!”

³⁶Woodino annabiijo debbo, innde maako Anna, ɓii Fanuwel, mo lenyol Aser. O naywi masin. O jooɗino duuɓi joweeɗiɗi tan bee goriiko yaake o derkeejono.

³⁷O jooɗi o jurumɗo haa duuɓi maako mbaɗi cappanɗe joweetati e nayi. O ɗon haa haykaliiru tum, o ɗon jaggano Allah jemma e naaŋge fuu, o ɗon suumo, o ɗon waɗa do'a.

³⁸O wari wakkati man, o fuɗɗi yettugo Allah. O wolwi dow ɓiŋngel nge'el haa yimɓe reenanɓe ndimu Urusaliima fuu.

³⁹Nde saaro'en Yeesu timmini waɗugo ko tawreeta Jawmiraawo umri, ɓe kooti bee maako haa lesdi Galiili, haa Nasaratu berniwol maɓɓe.

⁴⁰Ɓiŋngel tokki mawnugo e semmbiɗiɗgo, ngel heewi faamu. Ngel heɓi yerduye Allah.

⁴¹Hitaande fuu saaro'en Yeesu ɗon njaha Urusaliima ngam waɗugo juulde Paska.

⁴²Nde Yeesu waɗi duuɓi sappo e ɗiɗi, ɓe njehi ton fodde al'aada.

⁴³Nde juulde timmi, ɓe kooti, ammaa Yeesu lutti haa Urusaliima, saaro'en maako kattitaaki ɗum.

⁴⁴Ɓe tammino o ɗon wondi bee yahdanɓe bee maɓɓe. Ɓe njehi baakin nyalaade woore, nden ɓe puɗɗi ɗaɓɓititgo mo caka banndiraaɓe maɓɓe e soobiraaɓe maɓɓe.

⁴⁵Ammaa ɓe keɓtaay mo, ngam maajum ɓe lori haa Urusaliima ngam ɗaɓɓitoygo mo.

⁴⁶Nyannde tataɓre maajum, ɓe tawi mo nder haykaliiru. O ɗon jooɗi caka moodiɓɓe Yahuudu'en, o ɗon nana ɓe e o ɗon waɗana ɓe ƴamɗe.

⁴⁷Nanooɓe mo fuu kayɗini daliila faamu maako e jaawaabuuji ɗi o jaabori.

⁴⁸Nde saaro'en maako ngi'i mo, ɓe kayɗini masin. Daada maako wi'i mo: “Ɓiŋngel am, ngam ɗume ngaɗɗa min bana nii? Min bee baaba maaɗa fuu, min cakli masin bee ɗaɓɓititgo ma!”

⁴⁹O jaabi ɓe, o wi'i: “Ngam ɗume ɗaɓɓititton yam? On anndaa sey mi wona nder suudu Baabiraawo am na?”

⁵⁰Ammaa ɓe paamaay ko o wi'i ɓe.

⁵¹Nden Yeesu hooti bee maɓɓe haa Nasaratu, o ɗowtani ɓe. Daada maako tokki jogaago kuuje ɗe'e fuu nder ɓernde muuɗum.

⁵²Yeesu ɗon mawna, faamu maako yehi yeeso yeeso, o heɓi yerduye Allah e nde yimɓe fuu.