Read Fulfulde Luka 21 Bible Online

Luka 21 - Fulfulde bible

Luka 21

¹Yeesu ɓaŋgti gite, o yi'i riskuɓe ɗon ndokka dokke maɓɓe nder baatirɗum ceede.

²O yi'i debbo jurumɗo talakaajo hokki suleyje pamare ɗiɗi.

³Nden o wi'i: “Gooŋga mbi'anmi on: Debbo jurumɗo talakaajo oo, hokki ko ɓuri yimɓe feere fuu.

⁴Ngam kamɓe ɓe ndokki seɗɗa diga ɗuuɗeeŋga jawdi maɓɓe, ammaa debbo oo, koo nde o laafuɗo, o hokki ko o mari ngam nguure maako fuu.”

⁵Nde woɗɓe ɗon mbolwa dow haykaliiru, no ndu fawnira bee kaa'e booɗɗe e kuuje dokkanaaɗe Allah. Yeesu wi'i:

⁶“Nyalɗe ngaran, ɓe ngibbinan ko ngi'oton ɗo, hayre luttataa dow hayre.”

⁷Ɓe ƴami mo: “Jawmiraawo, ndeye kuuje ɗe'e laatoto? Bee alaama kaye kollata wakkati kuuje ɗe'e laatoto?”

⁸Yeesu jaabi: “Kakkile ngam taa on majjina ko'e mooɗon. Ngam ɗuuɗɓe ngaran bee innde am, ɓe mbi'an: Min woni Almasiihu, wakkati boo ɓadake. Taa tokke ɓe.

⁹To on nani haala konuuji e tuurtolji, taa kultore, ngam doole kuuje ɗe'e aarta wargo, ammaa ɗum laatataako timmoode bee law.”

¹⁰Nden o wi'i ɓe: “Ummaatoore ummanto ummaatoore, laamu ummanto laamu.

¹¹Dimmbanɗe lesdi mawɗe laatoto, haa nokkuuje goɗɗe boo nyawuji kalluɗi e weelo, kuuje kulniiɗe e alaamaaji mawɗi laatoto haa asama.

¹²Ammaa hiddeko ɗum laato, ɓe naŋngan on, ɓe toonyan on, ɓe njahran on haa cuuɗi dewal maɓɓe, ɓe nastinan on fursina[26], ɓe njahran on yeeso laamiiɓe e yeeso mawɓe lesdi ngam daliila innde am.

¹³Kuuje ɗe'e fuu ngaranan on ngam ceedanon yam.

¹⁴Njoge ɗum haa ɓerɗe mooɗon ngam taa on taaskitina hujjaaji mon.

¹⁵Ngam mi hokkan on wolde e hikma, haa konne'en mooɗon mbaawataa waabaago on e dartanaago on.

¹⁶Koo saaro'en mon e deerɗiraaɓe mon e banndiraaɓe mon e soobiraaɓe mon ɓe zammboto on, ɓe mbaran woɗɓe haa mooɗon.

¹⁷Koo moy fuu wanyan on ngam innde am.

¹⁸Ammaa koo gaasaawol hoore mooɗon halkataa.

¹⁹Bee tiɗɗinaare mon on kisnan yoŋkiiji mooɗon.”

²⁰“To on ngi'i honooɓe taarake berniwol Urusaliima, nden kam annde gibbineeki maagol ɓadake.

²¹Wakkati man, wonɓe haa Yahudiya ndogga haa kooseeje, wonɓe nder Urusaliima ngurto e ɓen haa gese boo taa nasta berniwol.

²²Ngam ɗum laatoto nyalɗe baatol ngam hiɓɓingo ko winnda fuu.

²³Kayto! Bone laatanto rewɓe reedu'en e musininanɓe nyalɗe man! Ngam ɓillaare mawnde laatoto nder lesdi ndi'i e tikkere Allah boo dow ummaatoore nde'e.

²⁴Ɓe mbareteeɓe bee kaafaaje, ɓe yahreteeɓe naŋngaaɓe caka ummaatooje fuu. Ummaatooje jananne njaaɓan Urusaliima haa to wakkati maɓɓe timmi.”

²⁵“Alaamaaji laatoto haa naaŋge, haa lewru e haa koode. Dow lesdi boo, kulol e saklere laatoto haa ummaatooje daliila haraka mbeela e ƴuuge.

²⁶Yimɓe maayan ngam kulol dow ko tammi wargo dow lesdi. Ngam baawɗeeji asama boo ndimmboto.

²⁷Nden Ɓii-neɗɗo waŋgan gite yimɓe, o waran nder duule bee baawɗe e tedduŋgal maŋngal.

²⁸To kuuje ɗe puɗɗi laataago, ndarte booɗɗum, ɓaŋgte ko'e mon, ngam ndimu mooɗon ɓadake.”

²⁹Yeesu wolwani ɓe balndol: “Ndaare ibbi e leɗɗe goɗɗe fuu.

³⁰To on ngi'i ɗe ɗon mbilita, on anndi duumol ɓadake.

³¹Bana non, to on ngi'i kuuje ɗe'e ɗon laato, annde laamu Allah ɓadake.

³²Gooŋga mbi'anmi on: Kuuje ɗe'e fuu laatoto hiddeko yimɓe zamanuuru ndu'u fuu maayda.

³³Asama e lesdi njinnan, ammaa bolle am njinnataa sam.”

³⁴“Ndeene ko'e mooɗon ngam taa ɓerɗe mon cuklano ɗuuɗal nyaamduuji e njaramji e laruuraaji duniyaaru, ngam taa nyannde man juha on.

³⁵Ngam ɗum waran bana zubaawol dow yimɓe dow lesdi fuu.

³⁶Ngam maajum ayne, mbaɗe do'a wakkati fuu, ngam haa keɓon semmbe daɗugo kuuje garanɗe ɗe'e fuu e daraago boo yeeso Ɓii-neɗɗo.”

³⁷Nyalawma Yeesu ɗon ekkitina nder haykaliiru, jemma boo o ɗon waaloya dow hooseere wi'eteende Hooseere Jaytunje.

³⁸Fajiri yimɓe fuu ɗon njaha haa maako nder haykaliiru ngam nanugo mo.