Read Fulfulde Luka 5 Bible Online

Luka 5 - Fulfulde bible

Luka 5

¹Nyannde feere Yeesu ɗon dari dow fomoonde weendu Genesaret, yimɓe boo ɗon ɓiɗɗotira ngam nanugo wolde Allah.

²O yi'i koommbooje[7] ɗiɗi haa fomoonde, waawooɓe ngurti, ɗon lalla zubaaji muuɗum'en.

³Yeesu nasti nder gootal koommbooje man, ɗum koommbowal[8] Simon. O tori mo o daayna ngal seɗɗa bee fomoonde. Yeesu jooɗi nder maagal, o fuɗɗi ekkitingo yimɓe.

⁴Nde o timmini wolwugo, o wi'i Simon: “Yahru koommbowal haa ndiyam lugguɗam, nden an bee huuwdiɗɗiraaɓe maaɗa, cakkine zubaaji mooɗon, on ngaawo.”

⁵Simon jaabi mo: “Jaagorɗo, min torri jemmaare fuu min keɓaay koo ɗume, ammaa dow wolde maaɗa, mi sakkinan zubaaji.”

⁶Ɓe cakkini zubaaji, ɓe naŋngi liɗɗi ɗuuɗɗi, haa zubaaji maɓɓe puɗɗi seekugo.

⁷Ɓe ewni hawtiɗiraaɓe maɓɓe woɗɓe nder koommbowal feere ngam ɓe ngara, ɓe mballa ɓe. Ɓe ngari, ɓe kebbini koommbooje ɗiɗi fuu bee liɗɗi, haa koommbooje maɓɓe puɗɗi moɗaago nder ndiyam.

⁸Nde Simon Piyer yi'i ɗum, o tuggi koppi yeeso Yeesu, o wi'i: “Taa ɓaditam, Jawmiraawo, ngam mi marɗo hakke!”

⁹Simon e yimɓe wonduɓe bee maako fuu kayɗini ngam ɗuuɗal liɗɗi ɗi ɓe ngaawi.

¹⁰Non boo Yaakuba e Yuhanna ɓiɓɓe Zebede, hawtiɗiraaɓe Simon kayɗini. Ammaa Yeesu wi'i Simon: “Taa hultor, yeeso ɗo, a laatoto gaawoowo yimɓe!”

¹¹Ɓe njahri koommbooje maɓɓe haa fomoonde, ɓe acci kuuje fuu, ɓe tokki Yeesu.

¹²Nde Yeesu ɗon nder wuro feere, goɗɗo mo saɗawre fiilti ɓanndu mum wari. Nde o yi'i Yeesu, o sujidi, o tori mo, o wi'i: “Moodibbo, to a muuyi, a waawan yamɗitingo yam.”

¹³Yeesu forti juŋngo, meemi mo, wi'i: “Mi muuyi, a yamɗita.” Law saɗawre acci goɗɗo man.

¹⁴Yeesu umri mo: “Taa a yecca ɗum koo moy, ammaa yah, hollu hoore maaɗa haa limanjo, nden a lii'a dokkal bana Muusa umri, ngam haa ɓe tabitina a laɓɓinaama.”

¹⁵Koo non fuu haala Yeesu ɓesdi saŋkitaago caka yimɓe yeeso yeeso. Mooɓe ɗuuɗɗe ngari haa maako ngam nanugo mo e ngam o yamɗitini ɓe diga nyawuji maɓɓe boo.

¹⁶Ammaa Yeesu woowi wurtaago, yaha nokkuure ferewnde ngam waɗugo do'a.

¹⁷Nyannde feere Yeesu ɗonno ekkitina. Farisa'en e moodiɓɓe tawreeta ɗon njooɗi ton. Ɓe ngaroyi diga gure lesdi Galiili, lesdi Yahudiya e berniwol Urusaliima. Baawɗe Jawmiraawo ɗonno bee Yeesu ngam yamɗitingo nyawɓe.

¹⁸Yimɓe ngaddi goɗɗo waata-terɗeejo dow be'itte, ɓe ɗaɓɓi nastingo mo suudu e ɓe mballina mo yeeso Yeesu.

¹⁹Ammaa ɓe anndaa toy ɓe nastinirta mo, ngam yimɓe ɗuuɗi. Nden ɓe mba'i bee maako dow suudu, ɓe mbaɗi wurdere haa kippol maaru, ɓe njippini mo bee be'itte go caka mooɓre haa yeeso Yeesu.

²⁰Nde Yeesu yi'i nuɗɗinki maɓɓe, o wi'i nyawɗo go: “Soobaajo am, hakkeeji maaɗa njaafaama!”

²¹Moodiɓɓe tawreeta e Farisa'en puɗɗi numugo: “Ɗum neɗɗo moye oo, bolwanɗo kalluka dow Allah? Moy waawata yaafaago hakkeeji sonaa Allah feere mum?”

²²Yeesu anndi numooji maɓɓe, wi'i ɓe: “Koni maroton irin numooji ɗi'i nder mooɗon?

²³Ko ɓuri hoyugo? Wi'go: Hakkeeji maaɗa njaafaama naa malla wi'go: Umma, yah?

²⁴Ammaa ngam haa mi faamtina on Ɓii-neɗɗo woodi baawɗe nder duniyaaru yaafaago hakkeeji.” Nden o wi'i waata-terɗeejo go: “Mi ɗon wi'e: Umma, hoocu be'itte ma, hootu saare maaɗa!”

²⁵Nyawɗo go ummi law yeeso yimɓe fuu, hoosi be'itte ɗe o waalino dow muuɗum'en, hooti saare muuɗum, o ɗon teddina Allah.

²⁶Yimɓe kayɗini, ɓe teddini Allah, ɓe keewi kulol, ɓe mbi'i: “Hannde en ngi'i kuuje kayɗiniiɗe!”

²⁷Ɓaawo maajum Yeesu wurti, yi'i jomnoowo, innde maako Lewi, o ɗon jooɗi haa baariki maako. Yeesu wi'i mo: “Tokkam!”

²⁸Lewi ummi, acci kuuje fuu, tokki mo.

²⁹Nden Lewi waɗi nyaamduuji ɗuuɗɗi haa saare muuɗum ngam Yeesu. Jomnooɓe e woɗɓe feere ɗuuɗɓe nyaamdi bee maɓɓe.

³⁰Ɗum fottanaay Farisa'en e moodiɓɓe tawreeta, ngam maajum ɓe ngurŋgurti, ɓe mbi'i pukara'en[9] Yeesu: “Ngam ɗume nyaamdoton bee jomnooɓe e hakke'en?”

³¹Yeesu wi'i ɓe: “Yamɓe ngalaa haaje kurgoowo, sey nyawɓe.

³²Mi waraay ewnaago adili'en, ammaa hakke'en, ngam ɓe tuuba.”

³³Farisa'en mbi'i Yeesu: “Pukara'en Yuhanna ɗon cuumo ndego, ɓe ɗon mbaɗa do'a, non boo pukara'en amin, ammaa ɓe maaɗa ɗon nyaama, ɗon njara.”

³⁴Yeesu jaabi ɓe: “On ɗon tammo on mbaawan doolugo ewnaaɓe haa ɓaŋgal ɓe cuumo nde ɓaŋɗo ɗon wondi bee maɓɓe na? Naa non sam.

³⁵Ammaa wakkati waran, ɓaŋɗo ittete caka maɓɓe, nden kadi nyalɗe man ɗen ɓe cuumoto.”

³⁶Yeesu wolwani ɓe balndol ngo'ol: “Walaa mo seekata leppol haa limce kese ngam o mo'ina limce kiiɗɗe. To o waɗi non, o wonni limce kese e leppol man boo hawtataa bee kiiɗɗe.

³⁷Walaa mo loowata inaboojam kesam nder kanyakanyaaji[10] kiiɗɗi. To o waɗi non, inaboojam kesam seekan ɗi, ɗam rufan e kanyakanyaaji boo mbonnoto.

³⁸Ammaa sey ɓe loowa inaboojam kesam nder kanyakanyaaji kesi.

³⁹Walaa mo marata haaje inaboojam kesam to o aartiri kiiɗɗam, ngam maajum ɓe ɗon mbi'a: Inaboojam kiiɗɗam ɓuri wooɗugo.”