Read Fulfulde Luka 6 Bible Online

Luka 6 - Fulfulde bible

Luka 6

¹Nyannde siwtorde woɗnde, Yeesu ɗonno saalo nder ngesa alkamaari bee pukara'en muuɗum. Pukara'en itti cammeeje alkamaari, ɓe pofli ɗe bee juuɗe maɓɓe, ɓe ƴakki.

²Farisa'en woɗɓe mbi'i ɓe: “Ngam ɗume on ɗon ngaɗa ko tawreeta duŋaaki nyannde siwtorde?”

³Yeesu jaabi ɓe: “On njaŋngaay ko Daawuda bee yimɓe muuɗum mbaɗno nyannde feere, nde dolo naawi ɓe na?

⁴O nasti suudu Allah, o hoosi tamseeje jo'inaaɗe yeeso Allah, o nyaami, o hokki yimɓe maako boo, ɓe nyaami, koo nde tawreeta meeɗen duŋanaaki woɗɓe feere nyaamugo, sey liman'en tan.”

⁵Yeesu ɓesdi wi'ugo: “Ɓii-neɗɗo woni Jawmu nyalaade siwtorde.”

⁶Nyannde siwtorde woɗnde boo, Yeesu nasti suudu dewal Yahuudu'en, o fuɗɗi ekkitingo. Goɗɗo mo juŋngo mum nyaamo waati ɗon ton.

⁷Moodiɓɓe tawreeta e Farisa'en ɗonno ayna ngam haa ɓe ngi'a to Yeesu yamɗitinan goɗɗo nyannde siwtorde, ngam haa ɓe keɓa hujja wullaago mo.

⁸Ammaa Yeesu anndi numooji maɓɓe. O wi'i waata-juŋngoojo go: “Umma, dara caka yimɓe haa ɗo.” Goɗɗo oo ummi, dari.

⁹Nden Yeesu wi'i ɓe: “Mi ɗon ƴama on: Ɗume tawreeta meeɗen duŋi waɗugo nder nyalaade siwtorde? Mbooɗeeŋga naa malla halleende? Hisnugo yoŋki neɗɗo naa malla halkugo ki?”

¹⁰O laari ɓe fuu, nden o wi'i goɗɗo go: “Fortu juŋngo ma!” O forti ngo, ngo yamɗiti.

¹¹Moodiɓɓe Tawreeta e Farisa'en keewi tikkere masin, ɓe ndawridi dow ko ɓe mbaɗata Yeesu.

¹²Nyannde man Yeesu wa'i dow hooseere ngam haa o waɗa do'a, o tori Allah jemmaare man fuu.

¹³Nde weeti, o ewni pukara'en maako, o suɓi sappo e ɗiɗo caka maɓɓe, o ewni ɓe Nelaaɓe:

¹⁴Simon mo o inndi ɗum boo Piyer e deerɗum Andire, Yaakuba e Yuhanna, Filip e Bartolome,

¹⁵Matta e Tomas, Yaakuba ɓii Halfa, Simon mo goɗɗo yeɓre zelot'en,

¹⁶Yahuuda ɓii Yaakuba e Yahuuda Iskariyot, zammbotooɗo Yeesu.

¹⁷Yeesu jippidi hooseere go bee maɓɓe, o dari haa babal peeciiŋgal, pukara'en maako ɗuuɗɓe ɗonno ton, non boo yimɓe ɓe lesdi Yahudiya fuu e yimɓe Urusaliima e yimɓe fomoonde mbeela kommbi Tirus e Sidon.

¹⁸Ɓe ngari ngam nanugo mo e ngam o yamɗitina ɓe diga nyawuji maɓɓe. Torraaɓe ruuhuuji coɓɗi boo ngari, ɓe njamɗiti.

¹⁹Yimɓe fuu ɗonno tefa meemugo mo, ngam baawɗe ɗon ngurto haa maako, njamɗitina ɓe fuu.

²⁰Nden Yeesu laari pukara'en muuɗum, o wi'i: “Barka laatano on, onon talaka'en, ngam onon njeyi laamu Allah.

²¹Barka laatano on, onon dolɓe jonta, ngam on tammi haarugo. Barka laatano on, onon woyanɓe jonta, ngam on tammi jalugo.

²²Barka laatanto on, to yimɓe nganyi on, ngurtini on caka maɓɓe, kuɗi on, mbolwi kalluka dow mooɗon daliila Ɓii-neɗɗo.

²³Mbelmbelte nyannde maajum, ndiwe ngam seyo, ngam mbarjaari mawndi ɗon reena on haa asama. Ngam bana non kaakiraaɓe maɓɓe mbaɗno annabi'en naane.

²⁴Ammaa bone laatano on, onon riskuɓe, ngam on keɓi hayru mooɗon timmi.

²⁵Bone laatano on, onon haarɓe jonta, ngam on tammi maatugo dolo. Bone laatano on, onon jalanɓe jonta, ngam on ngonan nder suno e bojji.

²⁶Bone laatano on, to yimɓe fuu mbi'ani on booɗɗum, ngam bana non kaakiraaɓe maɓɓe mbi'ani fewooɓe wi'ɓe ɓe annabi'en.”

²⁷“Mi ɗon wi'a on, onon nananɓe yam: Ngiɗe konne'en mooɗon, mboonane wanyanɓe on.

²⁸Mbarkiɗine naalanɓe on. Ndo'ane torranɓe on.

²⁹To goɗɗo maari ma haa galaŋgal nga'al, waylitan mo ngala boo. To goɗɗo hoosi ma ngapaleewol, taa haɗ mo hoosugo toggoore maaɗa.

³⁰Hokku toriiɗo ma koo ɗume fuu. To goɗɗo hoosi ko marɗa, taa ƴamtu ɗum.

³¹Mbaɗane yimɓe ko ngiɗɗon ɓe mbaɗana on.

³²To on ngiɗi yiɗɓe on tan, yettoore ndeye ndeenoton? Koo hakke'en boo ngiɗi yiɗɓe ɗum'en.

³³To on ɗon mbaɗa mbooɗeeŋga haa waɗananɓe on mbooɗeeŋga, yettoore ndeye ndeenoton? Koo hakke'en boo ɗon mbaɗa bana non.

³⁴To on ɗon ndokka nyamaande haa ɓe on tammoto njoɓan on tan, yettoore ndeye ndeenoton? Koo hakke'en ɗon ndokka hakke'en nyamaande ngam ɓe njoɓa ɓe bana no ɗum foti.

³⁵Ammaa ngiɗe konne'en mooɗon, mbaɗane ɓe mbooɗeeŋga e ndokke ɓe nyamaande bilaa tammaago koo ɗume. Mbarjaari mooɗon laatoto mawndi, on laatoto boo ɓiɓɓe Allah Ɓaŋiiɗo. Ngam o booɗɗo heedi yettarɓe e halluɓe.

³⁶Laate enɗooɓe bana Baabiraawo mooɗon o enɗuɗo.”

³⁷“Taa laate hiitooɓe woɗɓe, Allah boo hiitataako on. Taa ndo'e woɗɓe kiita, Allah boo do'ataa on kiita. Njaafe woɗɓe, Allah boo yaafoto on.

³⁸Ndokke woɗɓe, Allah boo hokkan on, o rufan nder jiiba mooɗon makka etaaɗum booɗɗum, tiɗɗiiɗum, keewɗum haa rufa. Ngam Allah etanan on bee etirgel ngel on etirani woɗɓe bee muuɗum.”

³⁹Yeesu wolwani ɓe balndol fahin: “Bumɗo waawan ɗowugo bumɗo na? Ɓe ɗiɗo fuu ɓe ndo'ataako nder ngaska na?

⁴⁰Jaŋngoowo ɓurataa jaŋnginoowo muuɗum maŋngu, ammaa jaŋnginaaɗo booɗɗum fuu laatoto bana jaŋnginoowo muuɗum.

⁴¹Koni a ɗon yi'a kuɗel haa yiitere deerɗa, ammaa a hakkilantaa leggal gonŋgal nder yiitere ma?

⁴²Noy mbi'rata deerɗa: Accu mi ittane kuɗel haa yiitere ma, an maa, leggal ɗon nder yiitere maaɗa! An naafikiijo, aartu ittugo leggal gonŋgal nder yiitere maaɗa, nden kam a yi'an laaɓɗum, haa a itta kuɗel nder yiitere deerɗa.”

⁴³“Walaa lekki booɗki rimata ɓiɓɓe kalluɗe, walaa lekki kalluki boo rimata ɓiɓɓe booɗɗe.

⁴⁴Lekki fuu ɗon annditire diga ɓiɓɓe muuɗum. Ɓe teɓataa ibbe haa lekki gi'e. Ɓe teɓataa inabooje haa jaajiihi.

⁴⁵Neɗɗo booɗɗo ɗon wurtina mbooɗeeŋga diga siga ɓernde mum mbooɗka. Neɗɗo kalluɗo boo ɗon wurtina halleende diga siga ɓernde mum kalluka. Ngam ko ɓernde neɗɗo heewri kanjum hunnduko wolwata.”

⁴⁶“Ngam ɗume ewnotooɗon yam Jawmiraawo, Jawmiraawo, ammaa on mbaɗataa ko mbi'anmi on?

⁴⁷Koo moy garanɗo haa am, nananɗo bolle am, ɗowtantooɗo ɗe, mi hollanan on bee moy o nanndiri.

⁴⁸O nanndi bee neɗɗo mahanɗo suudu, mo wasi ngaska, luggini ka haa jokki tapaare, o saɓɓi caɓɓawal dow maare. Ilam wari, ndiyam maaje lukki ndu, ammaa ndu dimmbaaki sam, ngam ndu mahaandu booɗɗum.

⁴⁹Ammaa nananɗo bolle am, ɗowtantaako ɗe, o nanndi bee goɗɗo mahɗo suudu dow mbulwuldi bilaa saɓɓugo caɓɓawal. Nde ilam lukki ndu, law ndu fuu maaru ndu yibbi yibbere naawnde.”