Read Fulfulde Luka 8 Bible Online

Luka 8 - Fulfulde bible

Luka 8

¹Ɓaawo maajum Yeesu yiiloyi berniiji e gure fuu, o waazini habaru laamu Allah. Pukara'en sappo e ɗiɗo ɗon bee maako non boo rewɓe woɗɓe yamɗitinaaɓe e ruuhuuji kalluɗi e nyawuji fuu ɗon ngondi bee maako. Kamɓe ngoni: Mariyama bi'eteeɗo Mariyama mo wuro Magdala mo ginnaaji joweeɗiɗi ngurtuno haa muuɗum

³e Yowanna, debbo Cuja, kaliifaajo dow saare laamiiɗo Hirudus e Suzan e rewɓe woɗɓe ɗuuɗɓe, wallooɓe worɓe go bee jawdi muuɗum'en.

⁴Yimɓe ɗuuɗɓe diga gure feere feere ngari, mooɓti haa Yeesu. Nden o wolwani ɓe balndol ngo'ol:

⁵“Demoowo yehi ngesa ngam saakoygo. Nde o ɗon saaka, aawdi ngoɗndi soli sera laawol. Yimɓe njaaɓi ndi, colli boo cuɓti ndi fuu.

⁶Aawdi ngoɗndi boo soli haa pellel kaa'e. Ndi fuɗi, aawre man yoori law, ngam peewol ŋakkani nde.

⁷Fahin aawdi ngoɗndi soli caka gi'e, ɗum fuu ɗum fuɗi, ammaa gi'e ɓiɗɗi aawre man.

⁸Ammaa ngoɗndi boo soli haa lesdi mboondi. Aawre fuɗi, mawni, waɗi cammeeje: Gawel fuu rimi teemerre teemerre.” Nde Yeesu timmini wolwugo, o wi'i bee sawtu: “Marɗo noppi ngam nanugo fuu, nana!”

⁹Pukara'en Yeesu ƴami mo ko balndol ngo'ol yiɗi wi'go.

¹⁰O jaabi: “Haa mooɗon ɗum hokkaama anndugo sirriiji laamu Allah, ammaa haa yimɓe feere sey bee balndi. Ngam haa ɓe ndaara, ammaa ɓe ngi'ataa, ɓe nana, ammaa ɓe paamataa.”

¹¹“Ndaa ko balndol ngo'ol yiɗi wi'go: Aawdi ɗum wolde Allah.

¹²Woɗɓe feere nanndi bee sera laawol haa aawdi soli. Ɗum nananɓe, nden Iblisa wara wifta bolle man nder ɓerɗe maɓɓe, ngam taa ɓe nuɗɗina, ɓe kisa.

¹³Woɗɓe boo nanndi bee pellel kaa'e, ɗum nananɓe wolde, ɓe njaɓa nde bee seyo. Ammaa nde walaa ɗaɗi nder maɓɓe, ɓe nuɗɗina ngam wakkati seɗɗa. To jarribeeki wari, ɓe njoofa.

¹⁴Aawdi colndi caka gi'e boo, nanndi bee nananɓe wolde. Ammaa ɓe acca laruuraaji, yiɗugo risku e belɗum duniyaaru ɓiɗɗa wolde go, nde waɗataa nafuuda.

¹⁵Aawdi colndi nder lesdi mboondi, ɗum nananɓe wolde, ɓe njogo nde bee ɓerɗe laaɓɗe, booɗɗe, ɓe mbaɗa nafuuda daliila tiinaare maɓɓe.”

¹⁶Walaa jamnanɗo pittirla ngam jo'ingo nga les bokoti malla les leeso. Ammaa o jo'inan nga dow jo'inirɗum pittirla, ngam haa nga yaynana nastanɓe fuu.

¹⁷Ngam walaa cuuɗiiɗum ɗum waŋgintaake, walaa sirriijum boo ɗum anndataake nder laaɓɗum.

¹⁸“Kakkilane no nanroton. Ngam marɗo huunde, ɓe ɓesdanan mo, ammaa mo maraay koo ɗume, ɓe koocan koo peetum ɗum o tammi marugo.”

¹⁹Daada Yeesu e deerɗiraaɓe muuɗum ngari, tawi mo, ammaa ɓe keɓaay yottaago mo ngam ɗuuɗal yimɓe.

²⁰Ɓe mbi'i mo: “Daada maaɗa e deerɗiraaɓe maaɗa ɗon yaasi, ɓe ngiɗi laarugo ma.”

²¹Ammaa o jaabi: “Daada am e deerɗiraaɓe am ngoni nananɓe wolde Allah, ɗowtano nde.”

²²Nyannde feere Yeesu nasti koommbowal bee pukara'en muuɗum, o wi'i ɓe: “En eero gaɗa weendu.” Ɓe ndilli.

²³Nde ɓe ɗon eero bee koommbowal[11], Yeesu ɗaani. Law henndu ummi dow ndiyam, koommbowal ɗonno heewa ndiyam, ɓe ɗon yeeso joote.

²⁴Pukara'en ɓaditi mo, ɓe pindini mo bee wi'go: “Jaagorɗo, jaagorɗo, en ɗon kalka!” Yeesu fini, o telɓani henndu e ƴuuge ndiyam, ɗum de'iti. De'ere mawnde waɗi.

²⁵Yeesu wi'i pukara'en: “Toy nuɗɗinki mooɗon kadi?” Ammaa ɓe kultori, ɓe kayɗini, ɓe mbi'i: “Ɗum moyjo, umranɗo koo henndu e ƴuuge ndiyam, ɗum ɗowtano mo?”

²⁶Ɓe njotti haa lesdi Geraseni'en gaɗa weendu Galiili.

²⁷Nde Yeesu wurti koommbowal, goɗɗo wuro man wari, fotti bee maako. Goɗɗo oo mari ruuhuuji coɓɗi ɗuuɗɗi nder maako. Duuri o ɓornataako limce, o jooɗataako haa saare, sey haa genaale.

²⁸Nde o yi'i Yeesu, o wooki, o do'i kommbi Yeesu, o wolwi bee sawtu: “Ɗume ngiɗɗa haa am, Yeesu, Ɓiɗɗo Allah Ɓaŋiiɗo? Mi tori ma, taa torram!”

²⁹Ngam Yeesu ɗonno umra ruuhuwol coɓŋgol wurto haa maako. Ngol ɗonno naŋnga mo nde ɗuuɗɗum, ɓe ɗonno kaɓɓa kosɗe e juuɗe maako bee callalluuji e ge'elle ngam aynugo mo, ammaa o ɗonno ta'a ɗum. Ngol ɗonno yahra mo nder ladde.

³⁰Yeesu ƴami mo: “Noy innde ma?” O jaabi: “Innde am Mooɓre”, ngam ruuhuuji ɗuuɗɗi nasti haa maako.

³¹Ɗi tori Yeesu taa o riiwa ɗi, taa o yahra ɗi haa ngaska lugguka.

³²Woodi tokkere gaduuji haa ton, ɗon dura dow towndiire. Ruuhuuji go tori Yeesu, o acca ɗi nasta gaduuji man. O duŋani ɗi.

³³Nden ruuhuuji coɓɗi ngurti haa gorko go, ɗi nasti gaduuji. Gaduuji man fuu caamni, do'i diga dow fomoonde townde nder weendu, kalki ton.

³⁴Nde durooɓe gaduuji ngi'i ko waɗi, ɓe ndoggi, ɓe anndini haala man nder wuro e haa kawyeeji.

³⁵Yimɓe ngurti haa ɓe ndaara ko waɗi. Ɓe ngari haa Yeesu, ɓe tawi gorko mo ruuhuuji coɓɗi ngurtuno e mum go, ɗon jooɗi kommbi maako, o ɗon ɓorni, o ɗon bee hakkiilo. Ɓe kultori.

³⁶Yi'ɓe ko waɗi ngecci ɓe no ginnaaɗo yamɗitiri.

³⁷Geraseni'en nder lesdi man fuu tori Yeesu o wurto lesdi maɓɓe, ngam ɓe kultori masin. Yeesu nasti koommbowal, o dilli.

³⁸Goɗɗo mo ruuhuuji coɓɗi ngurti haa mum go, tori Yeesu yerdo o wonda bee maako. Yeesu lorni mo, wi'i mo:

³⁹“Hootu saare ma, yeccu ko Allah waɗani ma fuu!” O dilli, o yecci yimɓe wuro fuu ko Yeesu waɗani mo.

⁴⁰Nde Yeesu wartoyi, yimɓe ɗuuɗɓe njaɓɓi mo, ngam ɓe fuu ɓe ɗonno ndeena mo.

⁴¹Nden goɗɗo bi'eteeɗo Jayrus, ardiiɗo suudu dewal Yahuudu'en wari haa Yeesu, do'i yeeso maako, tori mo o yaha saare muuɗum,

⁴²ngam o woodi ɓiŋngel deyel, bajjel, mo duuɓi sappo e ɗiɗi, ɓadake maayugo. Nde Yeesu ɗon yaha ton, yimɓe ɓiɗɗi mo.

⁴³Woodi boo debbo feere ton. Duuɓi sappo e ɗiɗi o nyawɗo nyawu ilol ƴiiƴam. O majjini jawdi maako fuu haa hurgooɓe, ammaa walaa mo waawi yamɗitingo mo.

⁴⁴O ɓaditi Yeesu haa ɓaawo, o meemi gawargal limce maako. Law nii ilol ƴiiƴam maako go dari.

⁴⁵Yeesu ƴami: “Moy meemi yam?” Koo moy fuu wi'i: “Naa min.” Piyer wi'i: “Jaagorɗo, ɗum taariiɓe ma ɓiɗɗata ma.”

⁴⁶Ammaa Yeesu wi'i: “Woodi mo meemi yam, ngam mi maati baawɗe ngurti haa am.”

⁴⁷Nde debbo yi'i o waawataa suuɗaago, o wari, o ɗon diwna, o do'i yeeso maako, o limti caka yimɓe fuu daliila ka o meemri Yeesu e boo no o yamɗitiri wakkati man.

⁴⁸Nden Yeesu wi'i: “Ɓiŋngel am, nuɗɗinki maaɗa yamɗitini ma, yah jam!”

⁴⁹Diga Yeesu timminaay wolwugo tawon, goɗɗo mo saare Jayrus wari, wi'i mo: “Ɓiŋngel ma maayi, taa ɓillu jaagorɗo.”

⁵⁰Ammaa nde Yeesu nani ɗum, o wi'i Jayrus: “Taa hul, nuɗɗin tan, o yeeɗitan.”

⁵¹Nde o yotti haa saare, o duŋanaaki koo moy nastida bee maako, sey Piyer, Yuhanna e Yaakuba e baaba bee daada ɓiŋngel.

⁵²Yimɓe fuu ɗonno mboya, ɗonno ngooyna ngam ɓiŋngel go. Yeesu wi'i ɓe: “Taa mboye, ngel maayaay, ammaa ngel ɗon ɗaani non.”

⁵³Ɓe njanci mo ngam ɓe anndi ɓiŋngel maayi.

⁵⁴Ammaa Yeesu naŋngi juŋngo maagel, o wi'i bee sawtu: “Ɓiŋngel, fin!”

⁵⁵Yoŋki maagel wartani ngel, ngel ummi law nder wakkati man nden e Yeesu umri ɓe ndokka ngel ko ngel nyaama.

⁵⁶Saaro'en ɓiŋngel kayɗini, ammaa Yeesu wi'i, taa ɓe mbi'a koo moy ko laati.