Read Fulfulde Tooktaaki Tawreeta 10 Bible Online

Tooktaaki Tawreeta 10 - Fulfulde bible

Tooktaaki Tawreeta 10

¹“Saa'i man Jawmiraawo wi'i yam: Sehu alluhaaje kaa'e ɗiɗi bana aartuɗe go. Waɗ boo sundukru leggal ngam a nastina ɗe nder maaru, nden wa'a haa am dow hooseere.

²Mi winndan dow alluhaaje man bolle gonnooɗe dow alluhaaje aartuɗe ɗe pusɗa go. Nden a wallina ɗe nder sundukru.

³Mi waɗi sundukru ndu leɗɗe gaware, mi sehi alluhaaje kaa'e ɗiɗi bana aartuɗe go. Nden mi wa'i hooseere bee alluhaaje ɗiɗi man haa juŋngo am.

⁴Jawmiraawo winndi dow maaje bolle ɗe o winnduno, umrooje maako sappo ɗe o umri on saa'i o waŋgani on dow hooseere caka yiite, nyannde nde on mooɓino les hooseere go. Nden Jawmiraawo hokki yam alluhaaje man,

⁵min boo mi lorti, mi jippi hooseere. Mi wallini alluhaaje ɗe'e nder sundukru ndu mbaɗmi, bana Jawmiraawo umruno yam.”

⁶Isra'iila'en ummi diga Ɓulli-yimɓe-Ya'akan, njehi Mosera. Ton Haruna maayi, ɓe uwi mo ton. Ɓiyiiko Eli'azaaru laati limanjo mbattudi maako[10].

⁷Diga ton ɓe njehi Gudegoda, diga Gudegoda ɓe njehi Yotobata, lesdi marndi maaje ndiyam.

⁸Saa'i Isra'iila'en ɗon haa hooseere go, Jawmiraawo suɓi lenyol Lewi'en ngam ɓe ndoondo sundukru alkawal Jawmiraawo, ɓe ndaro yeeso maako ɓe kuuwana mo kuugal limanku, ɓe mbarkiɗina yimɓe bee innde maako. Ɓe ɗon mbaɗa ɗum haa wargo hannde.

⁹Ngam maajum lenyol Lewi heɓaay geɗal lesdi bana le'i goɗɗi keɓri ɗum. Ngol heɓi kuugal limanku ngam Jawmiraawo, Allah mooɗon bana o wi'runo ngol.

¹⁰“Min mi faɓɓi dow hooseere go nyalawmaaje cappanɗe nayi e jemmaaje cappanɗe nayi bana naane. Jawmiraawo jaɓi tornde am fahin, o acci anniya nattingo on.

¹¹Nden Jawmiraawo wi'i yam: Umma, lorta ɗow yimɓe ummaatoore haa ɓe njaha ɓe kooca lesdi ndi kunaniimi kaakiraaɓe maɓɓe mi hokkan ɓe ndi.”

¹²“Jonta kam, onon Isra'iila'en, ɗume Jawmiraawo, Allah mooɗon ɗaɓɓata haa mooɗon? Ndaa ko o reenata: On kula mo, on tokko laabi maako, on ngiɗa mo, on njaggana mo bee ɓerɗe mon e yoŋkiiji mooɗon fuu,

¹³on ɗowtano umrooje maako e farillaaji maako ɗum umranmi on hannde. To on mbaɗi ɗum, on keɓan hayru.

¹⁴Ndaa, Jawmiraawo, Allah mooɗon mari asamanji, koo ɓurɗi towugo boo. Lesdi e ko woni dow maari fuu, kaŋko jeyi.

¹⁵Ammaa sey kaakiraaɓe mooɗon tan Jawmiraawo yiɗi. O suɓi danygol maɓɓe, waato onon, nder ummaatooje fuu bana ko laati hannde.

¹⁶Ngam maajum ɗowtane Jawmiraawo bee ɓernde woore[11], acce saatingo ko'e mooɗon fahin.

¹⁷Ngam Jawmiraawo, Allah mooɗon o Allah ɓurduɗo ɗowanteeɓe fuu, o Jawmiraawo jawmiraaɓe. O Allah mawɗo, baawɗo, kuleteeɗo. O senndindirtaa yimɓe, o jaɓataa ngeenaari zammba.

¹⁸O ɗon waɗana atiime'en e rewɓe yurumɓe kiita ngooŋɗuka. O yiɗi jananɓe wonduɓe bee mooɗon, o hokkan ɓe nyaamdu e limce.

¹⁹Ngiɗe jananɓe, ngam onon boo on laatinooɓe hoɗɓe haa lesdi Misra.

²⁰Kule Jawmiraawo, Allah mooɗon, njaggane mo feere maako. Ɗakkotire bee maako, kunore bee innde maako tan.

²¹Maŋgte mo ngam o Allah mooɗon. On ngi'i bee gite mon kuuɗe maako mawɗe kulniiɗe ɗe o huuwani on.

²²Wakkati kaakiraaɓe mooɗon njehi haa Misra, limgal maɓɓe waɗi cappanɗe njoweeɗiɗo. Jonta boo Jawmiraawo, Allah mooɗon ɗuɗɗini on bana koode asama.”