Read Fulfulde Tooktaaki Tawreeta 13 Bible Online

Tooktaaki Tawreeta 13 - Fulfulde bible

Tooktaaki Tawreeta 13

¹Kakkilane ko mi umri on fuu, ɗowtane ɗum. Taa ɓesde koo ɗume, taa uste koo ɗume haa maajum boo.

²To goɗɗo bi'ananɗo hoore mum annabiijo malla koyɗoowo koyɗi ummi caka mooɗon, wi'i o tammi hollugo on alaama malla kaayeefi,

³to alaama malla kaayeefi man laatake bana o wi'no on, to o wi'i on: Tokken ɗowanteeɓe jananɓe, en ndewa ɓe,

⁴taa nane bolle annabiijo malla koyɗoowo oo, ngam Jawmiraawo, Allah mooɗon foondan on ngam laarugo to on ngiɗi Jawmiraawo, Allah mooɗon bee ɓerɗe mon e yoŋkiiji mooɗon fuu.

⁵Tokke Jawmiraawo, Allah mooɗon, kule mo kaŋko tan! Kakkilane umrooje maako, nane ko o wi'ata on, njaggane mo, ɗakkotire bee maako!

⁶Annabiijo malla koyɗoowo oo, waazini on tuurtol dow Jawmiraawo, Allah mooɗon mo wurtini on lesdi Misra e rimɗini on diga jeyaaŋgu. Mbare mo, ngam o kalluɗo, o yiɗi selnugo on diga laawol ngol Jawmiraawo umri on tokkaago. Bana nii ittirton halleende caka mooɗon.

⁷To deerɗiraawo ma, ɓii daada ma malla ɓiya gorko malla ɓiya debbo malla debbo ma giɗaaɗo malla soobaajo ma mo ngiɗɗaa bana hoore ma, wi'ete bee sirri: Ndillen haa en ndewa ɗowanteeɓe woɗɓe ɓe a anndaa, kaakiraaɓe ma boo anndaa ɓe,

⁸ɓe ɗowanteeɓe ummaatooje taariiɗe ma, ɓadiiɗe malla daayiiɗe haa duniyaaru fuu,

⁹taa yerda, taa nanan mo sam! Taa enɗu mo, taa yurmin mo, taa faddu mo boo.

¹⁰Sey mbara mo! An aartu fiɗugo mo bee kaa'e, nden ummaatoore fuu fiɗa mo.

¹¹Fiɗ mo bee kaa'e haa o maaya, ngam o ɗaɓɓi daaynugo ma bee Jawmiraawo, Allah ma mo wurtini ma lesdi Misra e rimɗini ma diga njeyaaŋgu Misra.

¹²Bana nii Isra'iila'en fuu nanan habaru man, ɓe kulan, ngam taa halleende bana nde'e meeta laataago caka mooɗon.

¹³Malla teema on nanan nder berniwol gootol caka berniiji ɗi Jawmiraawo, Allah hokkata on ngam njooɗon nder maajum,

¹⁴woɗɓe meere'en nder ummaatoore mon esti yimɓe wuro maɓɓe rewugo ɗowanteeɓe ɓe on anndaa.

¹⁵Tefe, linye haala man booɗɗum, ƴame seedooɓe. To on tawi haala ka'a ka gooŋga, to huunde nyiddunde nde'e laatake caka mooɗon fakat,

¹⁶doole on mbara yimɓe berniwol man fuu bee kaafahi, on nattina ɓe, kamɓe e ko woni nder maagol e dabbaaji maɓɓe fuu.

¹⁷Mooɓte keɓal konu gonŋgal ton fuu, mbaage ngal haa babal caka berniwol. Nden ngule berniwol e ko keɓal konu nder maagol fuu bee yiite, ɗum laato nguleteeŋga ngam Jawmiraawo, Allah mooɗon. Berniwol man laato winnde haa abada, taa goɗɗo nyiɓta ngol fahin.

¹⁸Taa goɗɗum e kuuje karamɗe lutta haa juuɗe mon, ngam haa tikkere Jawmiraawo saatunde feewta, o enɗa on, o hinno on, o ɗuɗɗinan on bana o hunani kaakiraaɓe mooɗon.

¹⁹Ammaa sey on nana koŋngol Jawmiraawo, Allah mooɗon, on ɗowtano umrooje maako fuu ɗe umranmi on hannde, on mbaɗa ko fottanta Jawmiraawo, Allah mooɗon.