Read Fulfulde Tooktaaki Tawreeta 16 Bible Online

Tooktaaki Tawreeta 16 - Fulfulde bible

Tooktaaki Tawreeta 16

¹“Kakkilane lewru wi'eteendu Abiiba, on mbaɗana Jawmiraawo, Allah mooɗon juulde Paska. Ngam nder lewru Abiiba o wurtini on nder jemma diga lesdi Misra.

²Njehe haa nokkuure nde o suɓata ngam innde maako wona ton. Kirse ton gootel dabbaaji mon mawɗi malla dammooji mon, ɗum laato nyaamdu Paska ngam on teddina Jawmiraawo, Allah mooɗon.

³Taa nyaamde ɗum bee tamseeje ufnaaɗe. Nyalɗe joweeɗiɗi nyaame tamseeje ɗe ufnaaka ngam on ngurti Misra bee jaawal. Tamseeje ɗe'e ciftinoran on ɓillaare mon, ngam taa on ngejjita nyalaade gurtaaki mon lesdi Misra, balɗe ngeendam mooɗon fuu.

⁴Taa ufnirɗum tawe nder lesdi mon nyalɗe joweeɗiɗi ɗe'e. Kusel dabbaaji ɗi kirsoton nyannde arannde bee kiikiiɗe, taa lutta haa jaŋngo fajiri.

⁵Taa kirse ndabbaawa Paska nder berniiji ɗi Jawmiraawo, Allah mooɗon hokkata on.

⁶Taa kirse nga, sey haa nokkuure nde o suɓata ngam innde maako wona ton. Kirse nga saa'i naaŋge ɗon muta, waato saa'i gurtaaki mon Misra.

⁷Ndefe kusel maaga, nyaame ngel ton haa nokkuure nde Jawmiraawo, Allah mooɗon suɓata. Jaŋngo maajum on ummo, on loro haa ci'e[19] mon.

⁸Nyalɗe joweego nyaamoton tamseeje ɗe ufnaaka. Ammaa nyannde joweeɗiɗawre mbaɗe mooɓtorde juulde ngam on cujidana Jawmiraawo, Allah mooɗon, taa kuuwe kuugal koo ngale.”

⁹“To on puɗɗi wa'ugo alkamaari, lime asaweeje joweeɗiɗi.

¹⁰Nden mbaɗane Jawmiraawo, Allah mooɗon juulde ƴaamle aartuɗe. Ngaddane mo dokke caahiiɗe fodde no Jawmiraawo, Allah mooɗon barkiɗiniri on.

¹¹Ceye yeeso maako, onon bee ɓikkoy mooɗon worɓe e rewɓe e jeyaaɓe mon e Lewi'en wonɓe nder berniiji mon e hoɗɓe e atiime'en e rewɓe yurumɓe caka mooɗon. Mbaɗe ɗum haa nokkuure nde Jawmiraawo, Allah mooɗon suɓata ngam innde muuɗum wona ton.

¹²Ciftore, naane on laatino maccuɓe haa lesdi Misra. Kakkilane farillaaji ɗi'i, ɗowtane ɗi.”

¹³“To on timmini fiyugo alkamaari e ɓiɗɗugo inabooje, mbaɗe juulde bukkaaji nyalɗe joweeɗiɗi.

¹⁴Ceye wakkati juulde nde'e, onon bee ɓikkoy mooɗon e jeyaaɓe mon e Lewi'en e hoɗɓe e atiime'en e rewɓe yurumɓe wonɓe nder berniiji mon.

¹⁵Nyalɗe joweeɗiɗi mbaɗanton Jawmiraawo, Allah mooɗon juulde man, haa nokkuure nde o suɓata ɗum. Jawmiraawo, Allah mooɗon barkiɗinan gese mon e kuugal juuɗe mooɗon. Fakat on keewan seyo.

¹⁶Hitaande fuu, yimɓe nder mooɗon ngara yeeso Jawmiraawo, Allah mooɗon nde tati, haa nokkuure nde o suɓata ngam: Juulde tamseeje ɗe ufnaaka e juulde ƴaamle aartuɗe e juulde bukkaaji. Taa ɓe ngara juŋngo meere yeeso Jawmiraawo.

¹⁷Koo moy wadda dokkal bana o waawi, fodde ko o heɓi bee barka Jawmiraawo, Allah mooɗon.”

¹⁸“Ndarne hiitooɓe e kaliifa'en fodde le'i mon, nder gure ɗe Jawmiraawo, Allah mooɗon hokkata on fuu. Kamɓe ɓe mbaɗana yimɓe kiita ngooŋɗuka.

¹⁹Taa ɓe cela laawol gooŋga haa kiita. Taa ɓe cenndindira yimɓe. Taa ɓe njaɓa caahu rusiya, ngam rusiya haɗan yi'ugo gooŋga, waylan haala gooŋɗuɓe.

²⁰Ɗaɓɓe gooŋgaaku, sey gooŋgaaku tan. Nden kam on ngeeɗan, on maran lesdi ndi Jawmiraawo, Allah mooɗon hokkata on.

²¹To on nyiɓani Jawmiraawo, Allah mooɗon hirsirde, taa ndarne suuraaji Asera malla lekki feere baŋnge maare.

²²Taa ndarne daŋraŋge labbi boo. Jawmiraawo, Allah mooɗon ɗon wanya kuuje ɗe'e fuu.”