Read Fulfulde Tooktaaki Tawreeta 17 Bible Online

Tooktaaki Tawreeta 17 - Fulfulde bible

Tooktaaki Tawreeta 17

¹“Taa lii'ane Jawmiraawo, Allah mooɗon ngaari kalhaldi malla ndammoowa, to aybewol koo ngole ɗon haa maajum, ngam ɗum nyidduɗum haa Jawmiraawo, Allah mooɗon.

²Teema on nanan habaru haa berniwol koo ngole caka berniiji ɗi Jawmiraawo hokkata on. Goɗɗo gorko malla debbo ton waɗi hakke dow Jawmiraawo, Allah mooɗon, luuti alkawal maako,

³sujidani ɗowanteeɓe woɗɓe malla naaŋge malla lewru malla koode, luuti umroore Jawmiraawo.

⁴To on nani haala man, linye ka booɗɗum. To huunde nyiddunde nde'e laatake nder Isra'iila fakat,

⁵sey on ngurtina baɗɗo kalluɗum man yaasi wuro, on piɗa mo bee kaa'e haa o maaya.

⁶Goɗɗo mbarataake dow seedamku gooto tan. Kiita mbareego fuu tabita dow seedamku seedooɓe ɗiɗo malla tato.

⁷Seedooɓe aarta fiɗugo mo bee kaa'e ngam mbarugo mo, ɓaawoɗon ummaatoore fuu fiɗa mo. Bana non ittirton halleende caka mooɗon.

⁸Teema haala kiita makka bana mbar-hoore malla haɓre malla naawnere haa goɗɗo malla jokkirgol dow marle, salori hiitooɓe wuro, nden kam njehe haa nokkuure nde Jawmiraawo, Allah mooɗon suɓata.

⁹Njahre haala mooɗon yeeso liman'en Lewi'en e kiitoowo nyalɗe man, kamɓe ɓe ta'ana on kiita.

¹⁰Onon boo on mbaɗa fodde wolde maɓɓe nde ɓe mbolwanta on fuu haa nokkuure nde Jawmiraawo suɓata.

¹¹Njaɓe kiita maɓɓe fodde umroore tawreeta, tokke ko ɓe ekkitini on haa nokkuure nde'e fuu, taa cele ɗum, koo haa nyaamo malla haa nano.

¹²Koo moy ƴaggiiɗo mo ɗowtantaako kiitoowo malla limanjo jaggantooɗo Jawmiraawo, Allah mooɗon ton, o mbareteeɗo. Bana non ittirton halleende nder Isra'iila.

¹³Yimɓe ummaatoore fuu nana habaru man, ɓe kula, ngam taa goɗɗo feere mawnito waɗa halleende nde'e fahin.”

¹⁴“To on nasti nder lesdi ndi Jawmiraawo, Allah mooɗon hokkata on, to on mari ndi, on ɗon njooɗi ton, teema on mbi'an: Sey en mbaɗa laamiiɗo bana ummaatooje taariiɗe en fuu,

¹⁵nden kam, sey on laamina goɗɗo mo Jawmiraawo, Allah mooɗon suɓata caka deerɗiraaɓe mooɗon. Taa laamine jananno mo laataaki deerɗiraawo mon dow mooɗon.

¹⁶Taa laamiiɗo mara pucci ɗuuɗɗi. Taa o lorna ummaatoore haa Misra boo ngam heɓoygo pucci ɗuuɗɗi. Ngam Jawmiraawo wi'i on: Taa lorte ton sam.

¹⁷Taa laamiiɗo mara rewɓe ɗuuɗɓe, ngam taa ɓernde maako huucitana ɓe, acca Jawmiraawo. Taa o ɗuɗɗinana hoore maako cardi e kaŋŋeeri boo.

¹⁸To o laatake laamiiɗo, o winndana hoore maako deftere tawreeta ka'a fodde deftere wonnde haa liman'en Lewi'en.

¹⁹O jogo nde baŋnge maako, o jaŋnga nde balɗe ngeendam maako fuu, ngam o ekkito hulugo Jawmiraawo, Allah maako, o hakkilana bolle tawreeta ka'a fuu. O ɗowtano farillaaji ɗi'i fuu.

²⁰Ɗum aynan mo, taa ɓernde maako mawnito dow deerɗiraaɓe maako Isra'iila'en, taa o sela umrooje ɗe'e koo haa nyaamo koo haa nano. Nden kaŋko e danygol maako laamanto Isra'iila duuɓi ɗuuɗɗi.”