Read Fulfulde Tooktaaki Tawreeta 19 Bible Online

Tooktaaki Tawreeta 19 - Fulfulde bible

Tooktaaki Tawreeta 19

¹“To Jawmiraawo, Allah mooɗon hokki on lesdi, nattini ummaatooje gonɗe ton, to on ndiiwi ɓe, on koo'i berniiji maɓɓe, on njooɗake nder cuuɗi maɓɓe,

²nden kam cuɓe berniiji tati caka maaji.

³Lesdi ndi Jawmiraawo, Allah mooɗon marnata on, cennde ndi geɓe tati. Poonde njuutirka laabi, cuɓe berniwol gootol nder yeɓre lesdi koo ndeye. Mo mbari goɗɗo bilaa anniya, dogga, yaha ton, heɓa hisrude.

⁴To goɗɗo mbari keeddiɗɗum bilaa anniya, to o meeɗaay wanyugo mo boo, nden kam o dogga, o hisa nder gootol berniiji ɗi'i.

⁵To worɓe ɗiɗo njehi fe'ugo leɗɗe. Gooto maɓɓe ɗon fe'a, njamndi fe'irde seŋti diga leggal mum, naŋngi oya, mbari ɗum. Nden kam pe'uɗo dogga, yaha haa gootol berniiji man, hisa ton.

⁶Ngam to on cuɓi berniwol gootol tan, laawol daayoto. Nden baatoowo heɓan jokkaago mo. Nder tikkere maako o mbaran goɗɗo mo kiita mum he'aay mbareego, ngam o meeɗaay wanyugo mo.

⁷Ngam maajum umrumi on: Sey on cuɓa berniiji tati.

⁸To Jawmiraawo, Allah mooɗon yaajini lesdi mon bana o hunani kaakiraaɓe mon, to o hokki on lesdi man fuu,

⁹sey on kakkilana umrooje ɗe umranmi on hannde fuu, on ɗowtano ɗe ngam yiɗugo Jawmiraawo, Allah mooɗon, on tokko laabi maako foroy. Nden on ɓesda berniiji kisruɗi tati fahin dow ɗiya go.

¹⁰Mbaɗe ɗum, ngam taa on mbara yimɓe ɓe ngalaa aybe nder lesdi ndi Jawmiraawo, Allah mooɗon hokkata on, maron ɗum. To naa non ƴiiƴam maayɓe ɓe'e loroto dow ko'e mooɗon.

¹¹Ammaa to goɗɗo wanyi keeddiɗɗum, waaltanake mo, ukkanake mo, mbari mo, doggi haa gootol berniiji kisruɗi ɗi'i,

¹²nden kam mawɓe berniwol maako nela yimɓe naŋngoygo mo ton. Ɓe ndokka mo haa juŋngo baatoowo ngam o mbara mo.

¹³Taa enɗe mo. Cottine mbarɗo mo walaa aybe oo diga ummaatoore Isra'iila ngam keɓon hayru.”

¹⁴“Taa sottin keerol keeddiɗɗa ngol kaakiraaɓe mon mbaɗi ɓooyma nder lesdi ndi Jawmiraawo, Allah mooɗon hokkata on, maron.

¹⁵Ceedoowo gooto he'ataa ngam tabitinki aybewol malla hakkewol koo ngole ngol goɗɗo waɗi. Sey wullaandu fuu daro dow seedamku seedooɓe ɗiɗo malla tato.

¹⁶To ceedoowo wullaandu kalluɗo gooto ɗaɓɓi aybingo goɗɗo bee wi'ugo o tuurtuɗo,

¹⁷nden kam waabotirooɓe ɗiɗo ɓe'e fuu ndaro yeeso Jawmiraawo, liman'en e hiitooɓe huuwanɓe wakkati man mbaɗana ɓe kiita.

¹⁸Hiitooɓe linya haala man booɗɗum. To ceedoowo seedake fewre dow deerɗiraawo mum,

¹⁹ɓe lorna ko o anniyino waɗango deerɗiraawo maako dow hoore maako. Bana non ittirton halleende caka mooɗon.

²⁰Yimɓe nanan habaru maajum, ɓe kulan, ngam taa goɗɗo feere waɗa halleende nde'e caka mooɗon fahin.

²¹Taa enɗe aybuɗo. Kiita laato yoŋki bee yoŋki, yiitere bee yiitere, nyiindere bee nyiindere, juŋngo bee juŋngo, kosŋgal bee kosŋgal boo.”