Read Fulfulde Tooktaaki Tawreeta 20 Bible Online

Tooktaaki Tawreeta 20 - Fulfulde bible

Tooktaaki Tawreeta 20

¹Koo ndey on ngurtoto ngam haɓre bee konne'en mon, to on ngi'i pucci e mootaaji pucci e jama'aare konu ɓurannde on ɗuuɗugo, taa kule! Jawmiraawo, Allah mooɗon gurtinɗo on lesdi Misra, ɗon wondi bee mooɗon.

²Hiddeko on puɗɗa haɓre, limanjo daro yeeso honooɓe mon, wi'a ɓe:

³Nane, onon worɓe Isra'iila! On nastan haɓre bee konne'en mon hannde. Taa ɓerɗe mooɗon ta'a, taa kule, taa ndiwne yeeso maɓɓe.

⁴Ngam Jawmiraawo, Allah mooɗon ɗon wondi bee mooɗon. Kaŋko o haɓan bee konne'en mon, ngam hisnugo on.

⁵Nden kaliifa'en mbolwana yimɓe, mbi'a: Moy timmini nyiɓugo suudu, waɗanaay ndu do'a, nastaay ndu tawon? Sey o hoota, ngam taa o maaya nder haɓre, nden goɗɗo feere mara ndu.

⁶Moy jubi ngesa inabooje, heɓaay ittugo ɓiɓɓe maaje tawon? Sey o hoota, ngam taa o maaya nder haɓre, nden goɗɗo feere seyoro ɗe.

⁷Moy haɓɓi teegal, yottinaay debbo haa saare mum tawon? Sey o hoota, ngam taa o maaya nder haɓre, nden goɗɗo feere te'a mo.

⁸“Nden kaliifa'en tokko wolwango honooɓe: Woodi goɗɗo kulɗo mo ɓernde mum ta'i, ɓolwi na? Sey o hoota, ngam taa o ɓolwina ɓerɗe deerɗiraaɓe maako.

⁹To kaliifa'en timmini wolwango ummaatoore, ɓe cuɓa hoore'en konu, ɓe ardo honooɓe.

¹⁰To on ɓaditake berniwol ngam haɓre bee maagol, nufane yimɓe maagol salaaman tawon.

¹¹To ɓe njaɓi sulhu, ɓe maɓɓiti dammuɗe berniwol, nden kam on laatina ummaatoore maagol fuu maccuɓe mon, ɓe njaggano on.

¹²Ammaa to ɓe culhotiraay bee mooɗon, to ɓe ngiɗi haɓugo bee mooɗon, nden kam kippe berniwol maɓɓe.

¹³To Jawmiraawo, Allah hokki on ɓe, sey on mbara worɓe maɓɓe fuu bee kaafahi.

¹⁴Ammaa to on ngiɗi, kooce rewɓe e ɓikkoy e dabbaaji e kuuje gonɗe nder berniwol fuu. On nyaama keɓal konu konne'en mon, ngam Jawmiraawo, Allah mooɗon hokki on ɗum.

¹⁵Bana non mbaaroton berniiji daayiiɗi masin, ɗi laataaki berniiji ummaatooje ɗe'e.

¹⁶Ammaa to on nyaami berniiji nder lesdi ndi Jawmiraawo, Allah mooɗon marnata on, taa on acca koo ɗume bee yoŋki.

¹⁷Nattine yimɓe fuu, waato: Heti'en e Amoori'en e Kanaani'en e Perezzi'en e Hewi'en e Yebusi'en, bana Jawmiraawo, Allah mooɗon umri on.

¹⁸Mbare ɓe, ngam taa ɓe ekkitina on huuwugo kuuɗe maɓɓe nyidduɗe ɗe ɓe kuuwanta labbi maɓɓe fuu, ngam taa on mbaɗa hakke dow Jawmiraawo, Allah mooɗon.

¹⁹To on ɗaɓɓi hippaago berniwol, taa pe'e leɗɗe maagol marɗe ɓiɓɓe nyaameteeɗe, koo to on taarake ngol nyalɗe ɗuuɗɗe. Nyaame ɓiɓɓe man, ammaa taa nattine leɗɗe, ngam ɗe laataaki yimɓe haa on kona ɗe.

²⁰Sonaa leɗɗe ɗe ɓiɓɓe maaje nyaamataake, kanje kam pe'e ɗe, nattine ɗe, on mbaɗa kuuje kipporɗe bee maaje, haa to on nyaami berniwol kaɓanŋgol bee mooɗon.”