Read Fulfulde Tooktaaki Tawreeta 22 Bible Online

Tooktaaki Tawreeta 22 - Fulfulde bible

Tooktaaki Tawreeta 22

¹To a yi'i nagge deerɗiraawo ma malla ndammoowa maako eeri, sey a suklano ɗum, a lornana mo ɗum.

²Ammaa to marɗo ɗum daayi bee maaɗa malla a anndaa mo, nden kam a hoora ɗum haa saare ma. To o wari ɗaɓɓitugo ɗum, hokkitit mo ɗum.

³Sey a waɗa bana non boo, to a tawi wamnde malla limce malla koo ɗume ko majjiri deerɗiraawo ma, taa waɗ bana a yi'aay ɗum.

⁴To wamnde goɗɗo lenyol ma malla nagge maako do'ake haa laawol, sey a suklano ɗum, a walla mo ummingo ɗum[20].

⁵Taa rewɓe ɓorno limce worɓe, taa worɓe boo ɓorno limce rewɓe. Baɗɗo ɗum o nyidduɗo haa Jawmiraawo, Allah mooɗon.

⁶To a tawi saɓɓo colli dow lekki malla dow lesdi, daada ɗon woofi dow geeraaɗe malla ɗon wondi bee ɓikkoy muuɗum, taa hoocu daada.

⁷Hoo'u ɓikkoy, a acca daada fiira, ngam haa a heɓa hayru, balɗe ma njuutan.

⁸To a nyiɓi soorowol kesol, sey a waɗa faddorde haa sera mbippu maagol. Ngam taa goɗɗo do'o diga ton, nden ɓe njowane aybe ƴiiƴam maako.

⁹Taa aaw aawdi ngoɗndi caka inabooje haa ngesa ma. To a waɗi ɗum, ko aawɗa maajum e inabooje fuu laatoto cenaaɗum ngam Allah.

¹⁰Taa hawtu ngaari bee wamnde ngam ndemri.

¹¹Taa ɓorna limce kuuwraaɗe bee kuuje ɗiɗi, waato gaasa baali e hottollo.

¹²Nyootu bukki dow seɓattooji nayi haa suddaare nde a suddorto.

¹³Teema goɗɗo te'an debbo, waaldan bee maako, nden o wanya mo.

¹⁴O aybinan mo, o hallinan innde maako, o wi'an: Mi te'i paanyo debbo oo, mi nasti haa maako. Tawmi, o meeɗino gorko.

¹⁵To bana nii, saaro'en paanyo debbo koo'a wuurre saɓɓaare hollannde alaama budurwaaku, ɓe kolla ɗum ndotti'en haa dammugal berniwol haa nokkuure kiita.

¹⁶Baaba debbo wi'a ɓe: Mi te'ni ɓiŋngel am haa gorko oo. Jonta o wanyi mo.

¹⁷O aybini mo, o wi'i: Mi tawaay alaamaaji budurwaaku haa ɓiŋngel ma. Ammaa ndaa ɗo woni alaamaaji budurwaaku ɓiŋngel am. Nden ɓe mbe'ita wuurre saɓɓaare go yeeso ndotti'en berniwol.

¹⁸Ndotti'en berniwol koo'a gorko go, ɓocca mo.

¹⁹Ɓe njoɓna mo biikiire ceede cardi teemerre, ngam o hallini innde paanyo Isra'iilaajo. Ɓe ndokka baaba paanyo debbo ceede man. Ammaa debbo jooɗodo bee gorum. Gorko seerataa mo, haa fodde balɗe maako.

²⁰Ammaa to wullaandu man gooŋɗi, ɓe tawaay alaamaaji budurwaaku paanyo debbo man,

²¹nden ɓe ngurtina mo haa yolnde saare baaba maako. Worɓe berniwol maako piɗa mo bee kaa'e haa o maaya, ngam o waɗi nyidduɗum nder Isra'iila bee waɗugo njeenu haa saare baaba maako. Bana non ittirton halleende irin nde'e nder Isra'iila.

²²To ɓe tawi goɗɗo mo waaldi bee debbo te'aaɗo, ɓe ɗiɗo fuu ɓe mbareteeɓe. Bana non ittirton halleende irin nde'e nder Isra'iila.

²³To goɗɗo fotti bee paanyo muuyaaɗo goɗɗo nder berniwol, waaldi bee muuɗum,

²⁴on ngurtina ɓe ɗiɗo fuu yaasi haa dammugal berniwol, on piɗa ɓe bee kaa'e haa ɓe maaya. Paanyo debbo maaya ngam o wookaay haa yimɓe nana. Gorko boo maaya ngam o waaldi bee muuyaaɗo gorko feere. Bana non ittirton halleende irin nde'e caka mooɗon.

²⁵Ammaa to goɗɗo fotti bee paanyo debbo muuyaaɗo haa yaasi berniwol, naŋngi mo, waaldi bee maako, nden kam gorko baalduɗo bee maako feere mum maayata.

²⁶Walaa ko mbaɗoton paanyo debbo, ngam o waɗaay aybewol ngol he'i kiita mbareego. Ɗum laati bana to goɗɗo ummanake keeddiɗɗum, mbari ɗum.

²⁷Ngam gorko oo naŋngi paanyo haa yaasi. Paanyo debbo muuyaaɗo go wooki, ammaa kisnoowo mo walaa.

²⁸Teema ɓe tawan goɗɗo pottuɗo bee paanyo debbo, budurwaajo, muuyaaka boo. O naŋngi mo, o waaldi bee maako.

²⁹Nden kam sey o yoɓa baaba paanyo debbo man sadaaki, ceede cardi cappanɗe jowi. Paanyo boo laato debbo maako, ngam o dooli mo waaldugo bee maako. O seerataa mo haa fodde balɗe maako fuu.