Read Fulfulde Tooktaaki Tawreeta 27 Bible Online

Tooktaaki Tawreeta 27 - Fulfulde bible

Tooktaaki Tawreeta 27

¹Muusa, hawtaade bee ndotti'en Isra'iila, wi'i ummaatoore: “Ɗowtane umrooje ɗe umranmi on hannde fuu.

²Nyalaade on eeroto maayo Urdun ngam on nasta lesdi ndi Jawmiraawo, Allah mooɗon hokkata on, nden ndarne kaa'e mawɗe, ndanwine ɗe.

³Mbinnde bolle tawreeta ka'a fuu dow maaje, to on eeri, on nasti lesdi keewndi kosam e njumri ndi Jawmiraawo, Allah mooɗon hokkata on, bana o wolwani kaakiraaɓe mooɗon.

⁴To on njottake gaɗa Urdun, nden kam ndarne kaa'e ɗe'e dow hooseere Ebal[24] fodde ko umranmi on hannde, on ndanwina ɗe.

⁵Ton, nyiɓane Jawmiraawo, Allah mooɗon hirsirde bee kaa'e. Taa cehirgel njamndi meema kaa'e ɗe'e.

⁶Nyiɓane Jawmiraawo, Allah mooɗon hirsirde bee kaa'e ɗe cehaaka. Nden lii'ane mo guleteeɗi dow maare.

⁷Kirse boo kirseteeɗi ngam kawtal mon, nyaame ɗi ton, ceye yeeso Jawmiraawo, Allah mooɗon.

⁸Mbinnde bolle tawreeta Allah fuu dow kaa'e go, bee laaɓɗum[25].”

⁹Nden Muusa, hawtaade bee liman'en Lewi'en, wi'i Isra'iila'en fuu: “Njeeɗe, keɗite hannde onon Isra'iila'en on laatake ummaatoore ngam Jawmiraawo, Allah mooɗon.

¹⁰Nanane Jawmiraawo, Allah mooɗon, ɗowtane umrooje maako e kiitaaji maako ɗi umranmi on hannde.”

¹¹Muusa umri ummaatoore nyalaade man, o wi'i:

¹²“To on eerake maayo Urdun, Simeyon e Lewi e Yahuuda e Issakar e Yusufu e Benyamin ndaro dow hooseere Gerisiima ngam barkiɗingo ummaatoore.

¹³Ruben e Gada e Aser e Zabulon e Dan e Neftali ndaro dow hooseere Ebal ngam naalugo.

¹⁴Nden Lewi'en ɓaŋgta sawtu mbolwana Isra'iila'en fuu, mbi'a:

¹⁵Naaloore dow cehanɗo lawru malla baɗanɗo suura njamndi ɓolinaandi. Ngam kuuje ɗe yimɓe mbaɗi bee juuɗe muuɗum'en ngam ɓe ndewa ɗe bee sirri laati nyidduɗum yeeso Jawmiraawo. Ummaatoore fuu jaabo: Aamiina!

¹⁶Naaloore dow koo moy meeriɗinanɗo baaba mum malla daada mum! Ummaatoore fuu jaabo: Aamiina!

¹⁷Naaloore dow koo moy cottinanɗo keerol maral keeddiɗɗum! Ummaatoore fuu jaabo: Aamiina!

¹⁸Naaloore dow koo moy majjinanɗo bumɗo! Ummaatoore fuu jaabo: Aamiina!

¹⁹Naaloore dow koo moy cottinanɗo gooŋga jananɓe e atiime'en e rewɓe yurumɓe haa kiita! Ummaatoore fuu jaabo: Aamiina!

²⁰Naaloore dow koo moy baaldanɗo bee debbo baaba mum, ngam o toskini baaba maako! Ummaatoore fuu jaabo: Aamiina!

²¹Naaloore dow koo moy baaldanɗo bee ndabbaawa koo ngaye! Ummaatoore fuu jaabo: Aamiina!

²²Naaloore dow koo moy baaldanɗo bee ɓii baaba mum debbo malla ɓii daada mum debbo! Ummaatoore fuu jaabo: Aamiina!

²³Naaloore dow koo moy baaldanɗo bee daada debbo mum! Ummaatoore fuu jaabo: Aamiina!

²⁴Naaloore dow koo moy mbaranɗo keeddiɗɗiraawo mum nder sirri! Ummaatoore fuu jaabo: Aamiina!

²⁵Naaloore dow koo moy jaɓanɗo ngeenaari ngam mbara goɗɗo mo walaa aybe! Ummaatoore fuu jaabo: Aamiina!

²⁶Naaloore dow koo moy mo ɗowtanaaki bolle tawreeta Allah fuu! Ummaatoore fuu jaabo: Aamiina!”