Read Fulfulde Tooktaaki Tawreeta 28 Bible Online

Tooktaaki Tawreeta 28 - Fulfulde bible

Tooktaaki Tawreeta 28

¹Muusa tokki wi'ugo: “To on kakkilani bolle Jawmiraawo, Allah mooɗon, to on ɗowtanake umrooje maako ɗe umranmi on hannde fuu, nden kam Jawmiraawo, Allah mooɗon yowan on dow ummaatooje duniyaaru fuu.

²To on ɗowtanake bolle Jawmiraawo, Allah mooɗon, barkaaji ɗi'i fuu laatanto on:

³O barkiɗinan on nder berniiji mon e nder ladde mon.

⁴O barkiɗinan on bee ɓikkoy ɗuuɗkoy, o ɗuɗɗinan ƴaamle gese mon e na'i mon e dammooji mon.

⁵O barkiɗinan alkamaari mon e nyaamdu ndu mbaɗoton bee maari.

⁶O barkiɗinan on saa'i on ɗon nasta saare e saa'i on ɗon ngurto nde boo.

⁷Jawmiraawo hokkan on konne'en mon haɓanɓe bee mooɗon, on njaaloto ɓe. Ɓe ukkanto on dow laawol gootol, ammaa ɓe ndoggiran laabi joweeɗiɗi yeeso mooɗon.

⁸Jawmiraawo barkiɗinan kuuɗe mon fuu. O hebbinan beembe mon. O barkiɗinan on nder lesdi ndi o hokkata on jonta.

⁹To on ɗowtanake umrooje Jawmiraawo, Allah mooɗon, to on tokkake laabi maako fuu, nden kam o tabitinan on haa on laato ummaatoore maako senaande, bana o hunani on.

¹⁰Ummaatooje duniyaaru fuu ngi'an no innde Jawmiraawo ewnaama dow mooɗon, ɓe fuu ɓe kulan on.

¹¹Jawmiraawo hokkan on ɓikkoy ɗuuɗkoy e dabbaaji ɗuuɗɗi e ƴaamle gese bee fantugo nder lesdi ndi o hunani kaakiraaɓe mon o hokkan on ɗum.

¹²Jawmiraawo maɓɓitan sigordu mum woondu nder asama ngam toɓnugo iyeele haa gese nder lesdi mooɗon nder saa'iije maaje. O barkiɗinan kuuɗe mon fuu haa on ndokka ummaatooje ɗuuɗɗe nyamaale, ammaa onon on ngalaa haaje ɗaɓɓugo nyamaande.

¹³To on kakkilani umrooje Jawmiraawo, Allah mooɗon ɗe umranmi on hannde, to on ɗowtanake ɗe, Jawmiraawo laatinan on hoore ummaatooje, naa wicco maaje. On ɓesdoto yeeso yeeso, on leestataa sam.

¹⁴Taa cele laawol umrooje ɗe umranmi on hannde, koo haa nyaamo, koo haa nano ngam rewugo ɗowanteeɓe woɗɓe e jagganaago ɓe.”

¹⁵“Ammaa to on paalaay wolde Jawmiraawo Allah mooɗon, ngam hakkilango e ɗowtango umrooje maako fuu e farillaaji maako fuu ɗi umranmi on hannde, nden kam naalooje ɗe'e fuu ngaran dow mooɗon.

¹⁶Jawmiraawo naalan on nder berniiji mon e haa ladde mon.

¹⁷O naalan alkamaari mon e nyaamdu ndu mbaɗoton bee maari.

¹⁸O naalan on, o ustan limgal ɓikkoy mon. O ustan ƴaamle gese mon e na'i mon e dammooji mon.

¹⁹O naalan on saa'i on ɗon nasta saare e saa'i on ɗon ngurto nde boo.

²⁰Jawmiraawo waddan naaloore e saklere e ɓillaare dow kuuɗe ɗe on kuuwata fuu, haa on natta fuu, on kalka law, daliila halleende mooɗon nde on mbaɗi, ngam on ngudini mo.

²¹Jawmiraawo ukkan nyawu kalluŋgu ndaaɓoowu dow mooɗon, haa to walaa koo gooto mon lutti nder lesdi ndi nastoton marugo ɗum.

²²Jawmiraawo ukkanan on nyawuji ciiɓanɗi on e jonte e ɓuule e nguli, o yoornan e nyolnan alkamaari mon boo. Masiibooji ɗi'i fuu tokkoto on, haa to on maayi.

²³Mi haɗan asama toɓnugo iyeende. Lesdi mon yooran, saatan bana njamndi mboɗeeri.

²⁴Jawmiraawo toɓnataa iyeele dow lesdi mooɗon, ammaa o neldan on duluuru dow duluuru, bee collaaje ɗuuɗɗe, haa to on kalki.

²⁵Jawmiraawo accan konne'en mon njaalo on. On ngurtorto laawol gootol haɓoygo bee maɓɓe, ammaa on ndoggiran laabi joweeɗiɗi yeeso maɓɓe. Laamuuji nder duniyaaru fuu kultoran to ɗi ngi'i ko heɓi on.

²⁶To on maayi, colli e dabbaaji ladde nyaaman ɓalli mon, walaa mo riiwata ɗi.

²⁷Jawmiraawo ukkanan on ɓuule kalluɗe bana ɗe o ukkani Misra'en naane. O ukkanan on ɓuule goɗɗe boo e saɗawre e waayre, ɗe nyawndataako.

²⁸Jawmiraawo ukkanan on yinneego e wumugo e wemmbaago hakkiilooji mon.

²⁹Nyalawma on ngiiloto, on ɗaɓɓitan laawol bana wumɓe, ammaa on keɓtataa ngol. On keɓataa hayru nder kuuɗe mon fuu. Nyalɗe fuu konne'en ɓillan on, njaɓtan on, walaa kisnanɗo on.

³⁰A muuyan paanyo, ammaa goɗɗo feere waaldan bee maako. A nyiɓan suudu, ammaa a jooɗataako ton. A juboto ngesa inabooje, ammaa a heɓataa ittugo ɓiɓɓe maaje.

³¹Goɗɗo hirsan nagge ma, an a ɗon yi'a, ammaa a heɓataa nyaamugo kusel man. A ɗon laara, goɗɗo jaɓtan wamnde ma, a heɓtataa nde. Konne'en njaɓtan dammooji ma, walaa ballanɗo ma.

³²Ummaatoore woɗnde jaɓtan ɓiɓɓe mon worɓe e rewɓe. On ngi'an ɗum, on ngenwan gartuki maɓɓe nyalaade fuu, ammaa on ngalaa baawɗe.

³³Ummaatoore nde on anndaa nyaaman ƴaamle gese mon e nafuuda kuuɗe mon fuu. Walaa ko on keɓata, on laatoto ɓilliiɓe e torraaɓe nde weeti fuu.

³⁴Kulniiɗum ko gite mon ngi'ata, laatinan on yinnaaɓe.

³⁵Jawmiraawo nyawnan koppi e dawɗe mon bee ɓuule naawɗe ɗe kurgataake. On keewan ɓuule diga jaaɓrugal haa hoore.

³⁶Jawmiraawo dahan on, onon e laamiiɗo mo on laamini dow mooɗon haa lesdi njananndi ndi on meeɗaay anndugo, koo onon koo kaakiraaɓe mon. Ton on njagganto ɗowanteeɓe ɓe leɗɗe e kaa'e.

³⁷Jawmiraawo yahran on nder ummaatooje goɗɗe. Yimɓe ton kultoran to ɓe ngi'i ko heɓi on. Ɓe njancan on, ɓe njalan on.

³⁸On aawan aawdi ɗuuɗndi nder gese mon, ammaa on codan seɗɗa non, ngam baɓɓatti nyaaman gese mon.

³⁹On njuboto gese inabooje, on ndemtoto ɗe booɗɗum. Ammaa on nyaamataa ɓiɓɓe maaje, on njarataa inaboojam maaje boo, ngam gilɗi nyaaman ɗe.

⁴⁰Jaytunje mawnan koo toy nder lesdi mon. Ammaa on keɓataa wujugo ɓalli mon nebbam, ngam ɓiɓɓe maaje caaman diga ɗe ɓenndaay.

⁴¹On ndanyan ɓiɓɓe worɓe e rewɓe. Ammaa ɓe majjiran on ngam konne'en dahan[26] ɓe.

⁴²Leɗɗe mon e ko fuɗata dow gese mon fuu, baɓɓatti nyaaman ɗum.

⁴³Jananɓe jooɗotooɓe nder lesdi mon ɓesdoto yeeso yeeso, ammaa onon on tokkoto leestugo.

⁴⁴Kamɓe ɓe ndokkan on nyamaale, ammaa onon on mbaawataa hokkugo ɓe nyamaale. Kamɓe ɓe laatoto hoore, ammaa onon on laatoto wicco.

⁴⁵Naalooje ɗe'e fuu ngaran dow mooɗon. Ɗe tokkoto on, ɗe ukkanto on haa to on kalkidi ngam on nananaay Jawmiraawo, Allah mooɗon, on ɗowtanaaki umrooje maako e farillaaji maako ɗum o hokki on.

⁴⁶Naalooje man laatoto alaama kiita Allah dow mooɗon e danygol mon haa foroy.

⁴⁷Jawmiraawo hokki on koo ɗume fuu haa fanti, ammaa on njagganaaki mo bee seyo e welwelo ɓerɗe mon.

⁴⁸On njagganto konne'en mon ɓe Jawmiraawo nelata dow mooɗon. Weelo e ɗomka torran on, on cooyan limce e kuuje goɗɗe fuu. O yowan kaɓɓirgal njamndi dow daaɗe mon haa to on kalki.

⁴⁹Jawmiraawo umminan ummaatoore diga daayiiɗum, haa keerol duniyaaru, ummaatoore nde on anndataa wolde maare. O jippinan nde dow mooɗon bana dutal jipporto dow kusel.

⁵⁰Ɗum ummaatoore elewnde, yimɓe maare enɗataa koo ndotti'en e derke'en.

⁵¹Ɓe nyaaman dabbaaji mon e ƴaamle gese mon haa to on kalki. Ngam ɓe luttantaa on alkamaari e inaboojam e nebbam e ɓiɓɓe na'i e dammooji, haa to ɓe mbili on.

⁵²Ɓe kippoto berniiji mon fuu haa to mahi lesdi mon towɗi, cemmbiɗɗi ɗi on kooloto ngibbi. Ɓe kippoto berniiji lesdi ndi Jawmiraawo, Allah mooɗon hokkata on fuu.

⁵³To konne'en taarake berniiji mon, on ngonan nder ɓillaare, weelo saatan dow mooɗon haa on nyaama ɓikkoy mon koy Jawmiraawo hokkata on.

⁵⁴Koo ne'iiɗo, munyɗo caka mooɗon laaran deerɗum, koo debbo mum giɗaaɗo e ɓikkoy mum luttukoy bee gite kalluɗe,

⁵⁵o nyaaman kusel ɓikkoy maako, o hokkataa ngel koo gooto maɓɓe, ngam walaa ko tammi luttango mo haa o jooɗi nder ɓillaare nde konne'en taarake berniiji mooɗon fuu.

⁵⁶Non boo debbo ne'iiɗo, jeynitiiɗo mo jaɓataa yahugo bee kosɗe ngam o diskuɗo masin, o laaran goriiko giɗaaɗo e ɓikkoy maako worɓe e rewɓe bee gite kalluɗe,

⁵⁷o nyaaman kusel ɓiŋngel maako ngel o danyi e baawol bee sirri, ngam walaa ko tammi luttango mo haa o jooɗi nder ɓillaare nde konne'en taarake on nder berniiji mooɗon fuu.

⁵⁸To on kakkilanaay umrooje tawreeta Allah, binndaaɗe nder deftere nde'e fuu, to on ɗowtanaaki ɗe, to on kulaay Jawmiraawo, Allah mooɗon marɗo innde teddunde e hulniinde,

⁵⁹nden kam Jawmiraawo ukkanan on, onon e danygol mon masiibooji caatuɗi masin ɗi kurgataake e nyawuji kalluɗi ɗi nyawndataake sam.

⁶⁰O ukkanan on nyawuji Misra ɗi kuloton fuu, ɗi takko on.

⁶¹Non boo nyawuji goɗɗi koo ɗiye ɗi mbinndaaka nder deftere tawreeta nde'e. Jawmiraawo ukkanan on ɗi haa to on kalki.

⁶²Koo nde on laatino ɗuuɗɓe bana koode asama, seɗɗa mooɗon luttata ngam on cali nanango Jawmiraawo, Allah mooɗon.

⁶³Bana Jawmiraawo seyori woonango on e ɗuɗɗingo on, bana non o seyorto halkugo on e nattingo on. On ɗoofeteeɓe diga lesdi ndi nastoton haa maron ɗum.

⁶⁴Jawmiraawo saŋkitan on caka ummaatooje fuu, diga keerol duniyaaru ngo'ol haa ngola. Ton on njagganto ɗowanteeɓe woɗɓe, huuwraaɓe bee leɗɗe e kaa'e, ɓe on anndaa, kaakiraaɓe mon boo anndaa.

⁶⁵On keɓataa de'ere caka ummaatooje ɗe'e, walaa nokkuure nde kosɗe mon ciwtoto. Jawmiraawo neldan diwŋgol e kulol nder ɓerɗe mon, o ittan tammunde mon fuu.

⁶⁶Foroy on ɓadiiɓe daande maayde, jemma e naaŋge on kultoran, on cekan ngeendam mon.

⁶⁷To on ngi'i ko saaloto, ɓerɗe mon keewan kultoreeŋgol. To weeti, on keppanan kiikiiɗe. To hiiri boo, on keppanan fajiri daliila kulol ngol hebbinta ɓerɗe mon e kuuje ɗe ngi'oton.

⁶⁸Jawmiraawo lornan on bee koommbooje haa Misra, koo ngam o biinooɗo on meetataa loraago ton. On ɗaɓɓan soorrugo ko'e mon haa konne'en mon, ngam on laato maccuɓe maɓɓe e horɓe maɓɓe, ammaa walaa mo soodata on.”

⁶⁹Ndaa bolle alkawal ngal Jawmiraawo umri Muusa o haɓɓa bee Isra'iila'en nder lesdi Mo'ab. Ngal ɓesdi dow alkawal ngal Jawmiraawo haɓɓuno bee maɓɓe haa Horeb.