Read Fulfulde Tooktaaki Tawreeta 3 Bible Online

Tooktaaki Tawreeta 3 - Fulfulde bible

Tooktaaki Tawreeta 3

¹“Ɓaawo man en celi en njehi gal laawol Baasan. Ook laamiiɗo Baasan wurti bee ummaatoore muuɗum fuu ngam haɓugo bee meeɗen haa Edirey.

²Ammaa Jawmiraawo wi'i yam: Taa hul mo! Ngam mi hokki ma mo, kaŋko e ummaatoore maako e lesdi maako fuu. Waɗ mo bana mbaɗɗa Sihon, laamiiɗo Amoori'en haa Hesbon.

³Jawmiraawo, Allah meeɗen hokki en boo jaalorgal dow Ook, laamiiɗo Baasan e ummaatoore muuɗum fuu. En mbardi ɓe, walaa koo gooto daɗi.

⁴En nyaami berniiji maako fuu, saa'i man walaa berniwol ngol en nyaamaay. En nyaami berniiji lesdi Argoba cappanɗe joweego nder laamu Ook haa lesdi Baasan fuu.

⁵Berniiji ɗi'i fuu ɗi ɗon taari bee mahi towɗi e cemmbiɗɗi, dammuɗe maaji ɗon bee pareeje ɗiɗi bee jamɗe palduɗe. Woodino boo gure ɗuuɗɗe ɗe ngalaa mahi.

⁶En kalki berniiji man fuu, en nattini jooɗiiɓe ton, worɓe e rewɓe e ɓikkoy fuu, bana mbaɗɗen berniiji Sihon, laamiiɗo Hesbon.

⁷En kooci dabbaaji e kuuje gonɗe nder berniiji man.

⁸Saa'i man en nyaami lesdi laamiiɓe Amoori'en ɗiɗo gaɗa maayo Urdun, diga maayo Arnon haa yotti hooseere Hermoon.

⁹Sidoni'en ɗon ewno hooseere man Siryon, Amoori'en boo ɗon ewno nde Seniira.

¹⁰En nyaami maral Ook, laamiiɗo Baasan fuu, berniiji nder lesdi leesndi e Gile'at e Baasan, haa yotti berniiji Salka e Edirey.”

¹¹Sey Ook, laamiiɗo Baasan feere muuɗum luttuno bee yoŋki nder Refa'en. Ndaa kes uwirde maako, ɗum kes hayre ɓaleere saatunde[4], ɗum ɗon dari haa Rabba, berniwol Ammooni'en! Njuutirka man, meetir nayi bee reeta, njaajirka man boo, meetir ɗiɗi.

¹²Lesdi ndi en nyaami saa'i man, diga berniwol Aro'er baŋnge maayo Arnon e reeta lesdi kooseeje Gile'at e berniiji gonɗi ton, mi hokki ndi le'i Ruben e Gada.

¹³Luttuɗum Gile'at e Baasan fuu, waato maral laamu Ook, mi hokki ɗum reeta lenyol Manassa. Lesdi Argoba e Baasan fuu ɓe ewni ɗum lesdi Refa'en.

¹⁴Ya'ir ɓii Manassa, hoo'i tayre lesdi Argoba fuu, haa yotti keerol Gesuri'en e Makati'en. O inndi gure ton bee innde maako. Ɗe inndaama Gure-Ya'ir haa wargo hannde.

¹⁵“Danygol Makir nder lenyol Manassa, mi hokki ngol Gile'at.

¹⁶Le'i Ruben e Gada boo, mi hokki ɗi lesdi ngonndi hakkunde lesdi Gile'at e Arnon. Maayo Arnon woni keerol maaji fombinaawol e maayo Yabbok boo woni keerol maaji bee Ammooni'en.

¹⁷Gal hiirnaaŋge, maayo Urdun woni keerol maaji, diga weendu Kinnarot haa yotti Maayo Araba, waato Weendu Mannda, haa les hooseere Pisiga haa fuunaaŋge.

¹⁸Saa'i man mi umri on, mi wi'i: Jawmiraawo, Allah mooɗon hokki on lesdi ndi'i ngam koocon, maron ndi. Worɓe mooɗon semmbiɗɓe fuu taaskano konu, on ardoto deerɗiraaɓe mooɗon Isra'iila'en fuu.

¹⁹Sey rewɓe mooɗon e ɓikkoy mooɗon e dabbaaji mooɗon tan lutta ɓaawo nder gure ɗe ndokkumi on. Mi anndi on mari tokke ɗuuɗɗe.

²⁰Mballe banndiraaɓe mon Isra'iila'en, sey to Jawmiraawo marni ɓe lesdi haa gaɗa Urdun, siwtini ɓe ton, bana o waarani on. Nden koo moy mooɗon loroto haa maral muuɗum ngal ngeɗmi on.

²¹Saa'i man mi umri Yosuwa, mi wi'i mo: A yi'i bee gite ma ko Jawmiraawo, Allah mooɗon waɗi laamiiɓe ɗiɗo ɓe'e. Bana non Jawmiraawo waarata laamuuji ɗi a saalata fuu.

²²Taa kule ɗi, ngam Jawmiraawo, Allah mooɗon haɓan ngam mooɗon.”

²³“Nden toriimi Jawmiraawo, mi wi'i:

²⁴Yaa Jawmiraawo Allah, a fuɗɗi hollugo yam min jaggiiɗo ma maŋngu ma e juŋngo semmbiɗŋgo. Ɗowanteeɗo moy haa asama malla nder duniyaaru waawan waɗugo irin kuuɗe mawɗe ɗe kuuwɗa?

²⁵Accu mi eero maayo Urdun, mi yi'a lesdi mboondi gaɗa maayo e lesdi kooseeje booɗɗe e kooseeje Libanon.

²⁶Ammaa Jawmiraawo tikkani yam daliila mooɗon, o jaɓaay tornde am. O wi'i yam: He'i ngam ma! Taa meetu wolwango yam haala ka'a!

²⁷Wa'a dow yeereere hooseere Pisiga, laar gal woyla e fombina e fuunaaŋge e hiirnaaŋge. Laar booɗɗum, ngam a meeɗataa eeraago maayo Urdun ngo'o.

²⁸Umru Yosuwa kuuje fuu. Tiɗɗin ɓernde maako, semmbiɗin mo, ngam kaŋko ardoto ummaatoore eeraago maayo. O senndanan yimɓe lesdi ndi ngi'ata, ɓe mara ndi.

²⁹Ngam man en paɓɓi nder waadiwol haa nokkuure tiitotirnde bee Bayti-Pe'or.”