Read Fulfulde Tooktaaki Tawreeta 30 Bible Online

Tooktaaki Tawreeta 30 - Fulfulde bible

Tooktaaki Tawreeta 30

¹“To bolle ɗe'e fuu laatanake on, waato barkaaji e naalooje ɗum njo'inmi yeeso mooɗon, to on kakkilani ɗum booɗɗum caka ummaatooje fuu ɗe Jawmiraawo, Allah mooɗon saŋkititta on, nden kam on ciftoran ɗe

²on lortoto haa Jawmiraawo, Allah mooɗon, onon e ɓikkoy mooɗon on ɗowtanto wolde maako fodde ko mi umrani on hannde fuu, to on mbaɗan ɗum bee ɓerɗe mon e yoŋkiiji mon fuu,

³nden Jawmiraawo, Allah mooɗon enɗan on, waylan yaŋgada mon, mooɓtan on diga ummaatooje ɗe o saŋkiti on.

⁴Koo to on caŋkitake haa keeri duniyaaru, Jawmiraawo Allah mooɗon mooɓtan on, hoosan on.

⁵O hooran on, o marnan on lesdi ndi kaakiraaɓe mon marno. O woonanan on, o ɗuɗɗinan on ko ɓuri kaakiraaɓe mon.

⁶Jawmiraawo, Allah mooɗon hokkan on, onon e danygol mon ɓerɗe ɗowtiiɗe[28], on ngiɗan mo bee ɓerɗe mon e yoŋkiiji mon fuu, nden on ngeeɗan.

⁷Jawmiraawo, Allah mooɗon ukkan naalooje go dow konne'en mon, wanyɓe on, toonyiiɓe on.

⁸Ammaa onon on lortoto haa maako, on nanana mo, on ɗowtano umrooje fuu ɗe umrumi on hannde.

⁹Jawmiraawo, Allah mooɗon ɗuɗɗinan hayru mon masin nder kuuɗe mon koo ɗeye. O ɗuɗɗinan ɓikkoy mon e dabbaaji mon e ƴaamle gese mon. O seyorto woonango on fahin, bana o seyori woonango kaakiraaɓe mon,

¹⁰to on ɗowtanake Jawmiraawo, Allah mooɗon, to on tokkake umrooje maako e farillaaji maako binndaaɗum nder deftere tawreeta nde'e fuu, to on ngaylitake haa maako bee ɓerɗe mon e yoŋkiiji mon fuu.

¹¹Ngam umroore nde umrumi on hannde salortaako on, nde daayaaki on.

¹²Nde wonaay haa asama, sakko on mbi'a: Moy eeŋgata haa asama ngam o waddanoya en nde, haa en nana, en ɗowtano nde?

¹³Nde wonaay gaɗa mbeela boo, sakko on mbi'a: Moy eeroto gaɗa mbeela ɗaɓɓitanoya en nde, haa en nana, en ɗowtano nde?

¹⁴Ngam nde ɗon ɓadi on masin, nder kunnduɗe mon e ɓerɗe mon nde woni ngam on ɗowtano nde!

¹⁵Ndaa, mi ɗon holla on hannde ngeendam e hayru, non boo maayde e sarru haa yeeso mooɗon.

¹⁶Ammaa min mi umri on hannde, ngiɗe Jawmiraawo, Allah mooɗon ngam on tokko laabi maako, on ɗowtano umrooje maako e farillaaji maako e kiitaaji maako, nden kam on ngeeɗan, on ɗuuɗan. Jawmiraawo, Allah mooɗon barkiɗinan on nder lesdi ndi nastoton haa maron ɗum.

¹⁷Ammaa to on ngaylitani mo ɓaawo, to on ɗowtanaaki mo, on tokkake esto, on cujidani ɗowanteeɓe woɗɓe, on njagganake ɓe,

¹⁸nden kam mi ɗon anndina on hannde nde'e on kalkan fakat, on nduurataa nder lesdi gaɗa Urdun ndi nastoton ngam maron ɗum.

¹⁹Mi holli on ngeendam e maayde, barka e naaloore, haa on cuɓa. Mi ɗon ewno jonta asama e lesdi ceedo ko cuɓoton. Cuɓe ngeendam ngam haa on ngeeɗa, onon e danygol mooɗon!

²⁰Ngiɗe Jawmiraawo, Allah mooɗon, ɗowtane mo! Ɗakkotire bee maako, haa balɗe mon njuuta nder lesdi ndi Jawmiraawo hunani kaakiraaɓe mon Ibrahiima e Isiyaaku e Yaakubu, o hokkan ɓe ɗum.”