Read Fulfulde Tooktaaki Tawreeta 33 Bible Online

Tooktaaki Tawreeta 33 - Fulfulde bible

Tooktaaki Tawreeta 33

¹Ndaa barka ka Muusa, goɗɗo Allah barkiɗiniri Isra'iila'en hiddeko o maaya:

²O wi'i: “Jawmiraawo wari diga hooseere Sina bana naaŋge, fuɗi haa Se'ir ngam maɓɓe, o yaynani ɓe diga hooseere Paran. Malaa'ika'en ujine sappo ngardi bee maako. Tawreeta ngam maɓɓe ɗon bana jamre yiite haa juŋngo maako nyaamo.

³Jawmiraawo yiɗi le'i Isra'iila, o ɗon ayna senaaɓe maako, turotooɓe yeeso maako ngam nanugo wolde maako fuu.

⁴Tawreeta ka Muusa umri en, ɗum ndesaari marndi saman ngam yimɓe danygol Yaakubu.

⁵Jawmiraawo laamake dow Isra'iila, saa'i ardiiɓe ummaatoore e yimɓe le'i Isra'iila ɗon mooɓi.”

⁶Muusa ɓesdi wi'ugo: “Lenyol Ruben yeeɗa! Taa maaya, ngol ɗuuɗa.”

⁷Ndaa ko o wi'i dow lenyol Yahuuda: “Yaa Jawmiraawo, nan tornde Yahuuda! Hawtu ngol bee le'i goɗɗi. Sey yimɓe maagol paddo ko'e maɓɓe. Wallu ɓe haɓugo bee konne'en maɓɓe.”

⁸Dow lenyol Lewi o wi'i: “Yaa Jawmiraawo, a ɗon waŋgina muuyo ma bee yimɓe lenyol Lewi bee Tumiima e Uriima. Ɓe yimɓe ma hoolaaɓe. A foondi ɓe haa Massa, a waabotiri bee maɓɓe haa ndiyamji Meriba.

⁹Ɓe ɓuri yiɗugo ma dow saaro'en maɓɓe e banndiraaɓe maɓɓe e ɓikkoy maɓɓe. Ɓe ɗowtani umrooje ma, ɓe njogi alkawal ma.

¹⁰Ɓe ekkitinan danygol Yaakubu kiitaaji ma, haa Isra'iila fuu tokko tawreeta ma. Ɓe lii'anto ma guleteeɗi dow hirsirde ma, ɓe ngulan uurle yeeso maaɗa.

¹¹Yaa Jawmiraawo, ɗuɗɗin semmbe maɓɓe, yerda kuuɗe maɓɓe. Sampitit konne'en maɓɓe fuu, ngam taa ɓe meeta ummaago!”

¹²Dow lenyol Benyamin o wi'i: “Yimɓe lenyol ngo'ol, ɓe ngiɗaa Jawmiraawo. Allah Ɓaŋiiɗo ɗon ayna ngol foroy, nyalɗe fuu ngol ɗon jooɗi nder salaaman yeeso maako.”

¹³Dow yimɓe lenyol Yusufu o wi'i: “Jawmiraawo barkiɗin lesdi maɓɓe bee kuuje booɗɗe diga dow bee saawawre e bee ndiyamji diga luggeeŋga lesdi!

¹⁴O barkiɗina ndi bee kuuje booɗɗe, bee ko naaŋge ɓenndinta e ko ɓe teɓa lewru fuu!

¹⁵Kooseeje e towndiije maɓɓe ɓooymaaje keewa kuuje ɓurɗe wooɗugo!

¹⁶Lesdi maɓɓe heewa kuuje booɗɗe fuu, ngam daliila mo'ere Jawmiraawo mo ɗonno wolwa nder wumre gi'e! Barkaaji ɗi'i fuu ngara dow lenyol Yusufu, ngam kaŋko o cenaaɗo caka deerɗiiko'en.

¹⁷Tedduŋgal laatano Yusufu mo mari semmbe bana ngaari afri, luwe mum boo bana mbana. Bee maaje o hawan ummaatooje haa yotto keeri duniyaaru. Luwe maako, ɗum yimɓe Efrayim ujineeje e yimɓe Manassa ɗuuɗɓe.”

¹⁸Dow le'i Zabulon e Issakar o wi'i: “Yimɓe Zabulon ceyore kuuɗe filu mon! Yimɓe Issakar boo ceyo nder laymaaji muuɗum'en.

¹⁹Ɓe ewnoto ummaatooje, ɗe ngara haa hooseere maɓɓe senaande ngam ɓe lii'o kirseteeɗi pottanɗi ton. Ngam ɓe keɓan jawdi haa mbeela, ndesaaje nyukkiiɗe boo nder njaareendi.”

²⁰Dow lenyol Gada o wi'i: “Yettoore laatano Allah mo yaajini lesdi Gada. Gada waali taaski bana mbarooga, ngam naŋngugo keɓal mum, o seeka diga kosɗe haa hoore.

²¹Gada suɓani hoore mum geɗal lesdi ɓurŋgal wooɗugo. O taaskani hoore maako geɗal nokkuure hooreejo, ɓaawoɗon o hawti bee ardiiɓe ummaatoore[30]. O waɗi fodde adilaaku Jawmiraawo, o hiitani Isra'iila bee kiitaaji maako.”

²²Dow lenyol Dan o wi'i: “Dan woni ɓii mbarooga, ngurtiiŋga lesdi Baasan bee diwugo.”

²³Dow lenyol Neftali o wi'i: “Yimɓe Neftali kaari mo'ere e barkaaji Jawmiraawo. Lesdi maɓɓe yaajan diga weendu haa fombina.”

²⁴Dow lenyol Aser boo o wi'i: “Aser heɓi barka ko ɓuri le'i goɗɗi. O laato giɗaaɗo deerɗiiko'en. Lesdi maako riska bee nebbam jaytunje.

²⁵Jamɗe palduɗe dammuɗe maako, ɗe cemmbiɗɗe. Semmbe maako duura bana balɗe maako.”

²⁶Onon Isra'iila'en, walaa ɗowanteeɗo bana Allah mooɗon! Kaŋko o ɗon wa'o moota pucci maako nder asamanji bee tedduŋgal, o ɗon ta'a duule ngam wargo walla on.

²⁷Allah woni hisrude mon diga ɓooyma, juuɗe maako duumiiɗe ɗon taɓɓo on. O riiwi konne'en mon yeeso mooɗon, o umri on, on nattina ɓe fuu.

²⁸Isra'iila'en, danygol Yaakubu, ɗon njooɗi feere muuɗum'en nder salaaman. Lesdi maɓɓe heewi alkamaari e inaboojam. Asama ɗon waɗa saawawre dow maari.

²⁹Barka laatanto on, onon Isra'iila'en! Walaa ummaatoore bana nde mooɗon nde Jawmiraawo hisni! Jawmiraawo bee hoore mum woni wawarde[31] mon e kaafahi mon. O ɗon ayna on, o ɗon hokka on jaalorgal. Konne'en mon ɗaɓɓan enɗam mon bee naafikaare, ammaa onon on ndamman ɓe!