Read Fulfulde Tooktaaki Tawreeta 4 Bible Online

Tooktaaki Tawreeta 4 - Fulfulde bible

Tooktaaki Tawreeta 4

¹Muusa wi'i: Jonta, onon Isra'iila'en, nane farillaaji e kiitaaji ɗi ekkitinanmi on, ɗowtane ɗum. Nden on ngeeɗan, on nastan lesdi ndi Jawmiraawo, Allah kaakiraaɓe mooɗon hokkan on ngam maron ɗum.

²Taa ɓesde koo ɗume haa ko umranmi on, taa uste ɗum boo. Ɗowtane umrooje Jawmiraawo, Allah mooɗon ɗe umranmi on.

³On ngi'i bee gite mon ko Jawmiraawo waɗi Ba'al[5]-Pe'or. Jawmiraawo, Allah mooɗon halki koo moy tokkiiɗo Ba'al-Pe'or caka mooɗon.

⁴Ammaa onon ɗakkotirɓe bee Jawmiraawo, Allah mooɗon, on fuu on yeeɗɓe hannde.

⁵“Ndaa, mi ekkitini on farillaaji e kiitaaji, fodde ko Jawmiraawo, Allah am umri yam. Ɗowtane ɗi nder lesdi ndi ɓadiiɗon nastugo ngam maron ɗum.

⁶To on kakkilani ɗi, to on ɗowtanake ɗi, yimɓe ummaatooje goɗɗe tammiiɓe nanugo farillaaji ɗi'i ndaaran on on hikma'en e marɓe faamu, ɓe mbi'an: Fakat, ummaatoore mawnde nde'e mari hikma e faamu!

⁷Ummaatoore ndeye, koo nde mawnde, woodi ɗowanteeɓe ɓadiiɓe nde bana Jawmiraawo, Allah meeɗen? Kaŋko o ɗon ɓadi en koo ndey en toroto mo.

⁸Ummaatoore ndeye, koo nde mawnde, woodi farillaaji e kiitaaji gooŋɗuɗi bana tawreeta ka'a fuu ka anndinanmi on hannde?

⁹Ammaa ndeente! Kakkilane ko'e mon booɗɗum, taa ngejjite ko ngi'ɗon bee gite mon, njoge ɗum balɗe mooɗon fuu. Ngecce ɓikkoy mon e taaniraaɓe mon

¹⁰haala nyalaade nde ndariiɗon yeeso Jawmiraawo, Allah mooɗon haa Horeb, nde Jawmiraawo wi'i yam: Mooɓtu yimɓe ummaatoore haa ɓe nana ko mbolwanmi ngam haa ɓe ekkito hulugo yam balɗe maɓɓe fuu haa duniyaaru, ɓe ekkitina ɗum ɓikkoy maɓɓe.

¹¹Nyalaade nde'e, on ɓaditi, on ndari les hooseere suddiraande duule tekkuɗe e cuurɗe ɓaleeje, jammitiinde yiite haa yotti asamanji go.

¹²Ngecce koy no Jawmiraawo wolwirani on nder yiite, on nani bolle maako, ammaa on ngi'aay jaati maako, sey sawtu tan.

¹³O anndini on alkawal ngal o haɓɓi bee mooɗon, o umri on ɗowtanaago umrooje maako sappo ɗe o winndi dow alluhaaje kaa'e ɗiɗi.

¹⁴Saa'i man Jawmiraawo umri yam mi ekkitina on farillaaji e kiitaaji, ngam on ɗowtano ɗum nder lesdi ndi ɓadiiɗon nastugo ngam maron ɗum.”

¹⁵“Kakkilane ko'e mooɗon booɗɗum ngam on ngi'aay koo ɗume nyalaade nde Jawmiraawo wolwani on haa hooseere Horeb nder yiite,

¹⁶ngam taa on mbaɗa hakke bee waɗango ko'e mon suura lawru nannduka bee jaati koo moy, koo gorko koo debbo,

¹⁷koo suura ndabbaawa koo ngaye haa duniyaaru, koo sonndu koo nduye fiiranndu haa asama,

¹⁸koo ladoowa koo ngaye, koo suura liiŋgu koo nguye nder ndiyam les lesdi.

¹⁹To on tijjake asama, on ngi'i naaŋge e lewru e koode, taa ɗum esta on sujidango ɗi, njaggano ɗi. Jawmiraawo, Allah mooɗon yeɗani ɗi ummaatooje goɗɗe fuu, ɗe cujidana ɗi.

²⁰Ammaa onon, Jawmiraawo hooci on, wurtini on nder ɓolinirde njamndi nde lesdi Misra, ngam on laato ummaatoore maako e maral maako, bana no on mba'i hannde.

²¹Jawmiraawo tikkani yam daliila mooɗon, o hunani yam mi heɓataa eeraago maayo Urdun, mi nastataa lesdi mboondi ndi Jawmiraawo, Allah mooɗon hokkata on on mara ɗum.

²²Ngam min mi maayan haa lesdi ndi'i, mi eerataako maayo Urdun. Ammaa onon on eeroto, on maran lesdi mboondi man.

²³Ndeente, taa ngejjite alkawal ngal Jawmiraawo, Allah mon haɓɓi bee mooɗon! Taa mbaɗane ko'e mon lawru fodde suura koo kaye ngam Jawmiraawo, Allah mooɗon haɗi ɗum.

²⁴Ngam Jawmiraawo, Allah mooɗon ɗon bana yiite wulanŋge, o yiɗaa on tokko ɗowanteeɗo feere sam[6].

²⁵Koo to on nduuri nder lesdi, to on keɓi ɓikkoy e taaniraaɓe boo, taa mbaɗe hakke bee waɗango ko'e mon suuraaji labbi bee jaati koo ɗume. Ɗum kalluɗum haa Jawmiraawo, Allah mooɗon, ɗum tikkinan mo.

²⁶Mi ɗon ewno hannde asama e lesdi, ɗum laato seedooɓe am dow mooɗon: To on mbaɗi ɗum, on kalkan law dow lesdi. On nduurataa nder lesdi gaɗa Urdun ndi nastoton ngam maron ɗum. On nduurataa nder maari. On kalkan fuu.

²⁷Jawmiraawo saŋkitan on caka ummaatooje. Luttanɓe mon haa lesdi Jawmiraawo, Allah mooɗon yahrata on ton ɗuuɗataa.

²⁸Ton on njagganto ɗowanteeɓe huuwraaɓe bee leɗɗe e kaa'e, ɓe yimɓe cehi bee juuɗe muuɗum'en, ɓe mbaawataa yi'ugo e nanugo e nyaamugo e luuɓnaago.

²⁹Ton on ngaylititto heedi Jawmiraawo, Allah mooɗon. To on ngaylitake heedi maako bee ɓernde woore, o waŋginanan on hoore maako.

³⁰To on nasti ɓillaare nder nyalɗe garanɗe, to kuuje ɗe'e fuu keɓi on, nden kam on lortoto haa Jawmiraawo, on ɗowtanto mo.

³¹Ngam Jawmiraawo, Allah mooɗon o marɗo enɗam. O accataa on, o halkataa on, o yejjitittaa alkawal ngal o haɓɓi bee kaakiraaɓe mon.

³²Ngam man ƴame ko saalino ɓooyma, saa'i on ndanyaaka tawon, diga nyalaade Allah tagi neɗɗo dow lesdi. Mbiɗite duniyaaru fuu. Mawɗum bana ɗu'um meeɗi laataago na? Goɗɗo meeɗi nanugo irin man na?

³³Ummaatoore ndeye lutti bee yoŋki ɓaawo nde nani ɗowanteeɗo bolwuɗo nder yiite, bana onon on nani, on lutti boo?

³⁴Malla ɗowanteeɗo moye foondi jaɓtugo ummaatoore mum diga juŋngo ummaatoore feere, bee masiibooji e alaamaaji e kaayeefiiji, bee konu e juŋngo semmbiɗŋgo e kuuje mawɗe kulniiɗe? Onon on ngi'i no Jawmiraawo, Allah mooɗon waarani on ɗum fuu haa Misra.

³⁵Onon, Jawmiraawo holli on ɗum fuu haa on paama kaŋko tan woni Allah, walaa ɗowanteeɗo goɗɗo.

³⁶Diga asama o wolwani on, on nani sawtu maako ngam o elta on. Dow lesdi boo, o waŋginani on yiite maako maŋnge, on nani bolle maako nder maage boo.

³⁷Ngam o yiɗi kaakiraaɓe mon. O suɓi danygol maɓɓe, kaŋko bee hoore maako wurtini on Misra, bee baawɗe maako mawɗe.

³⁸Ummaatooje ɓurduɗe on ɗuuɗeeŋga e semmbe, o riiwi ɗe yeeso mooɗon ngam o marna on lesdi maaje bana ko laati hannde.

³⁹Anndite hannde! Taa ngejjite ɗu'um: Jawmiraawo woni Allah haa asama e dow lesdi. Walaa Allah feere sam.

⁴⁰Ɗowtane farillaaji maako e umrooje maako ɗum umranmi on hannde fuu. Nden kam on keɓan hayru, onon e danygol mon, balɗe mon njuutan nder lesdi ndi Jawmiraawo, Allah mooɗon hokkata on haa foroy.”

⁴¹Nden Muusa suɓi gure tati haa fuunaaŋge, gaɗa maayo Urdun.

⁴²To goɗɗo mbari keeddiɗɗum bilaa anniya, to o meeɗaay wanyugo mo boo, nden kam o dogga, o hisa nder wooto gure man, taa yimɓe mbara mo.

⁴³Ɗum Beser nder ladde, dow ƴoolde ngam lenyol Ruben e Ramot nder lesdi Gile'at ngam lenyol Gada e Golan nder lesdi Baasan ngam lenyol Manassa.

⁴⁴Ndaa tawreeta Allah ka Muusa hokki Isra'iila'en.

⁴⁵O hokki ɓe seedamkuuji e farillaaji e kiitaaji ɗi'i fuu ɓaawo gurtaaki maɓɓe lesdi Misra,

⁴⁶nde ɓe njotti nder waadiwol haa gaɗa maayo Urdun, haa tiitotirde berniwol Bayti-Pe'or. Ɓe ɗonno nder lesdi Sihon, laamiiɗo Amoori'en, jooɗinooɗo haa Hesbon. Muusa e Isra'iila'en njaalino mo, saa'i ɓe ngurti lesdi Misra.

⁴⁷Ɓe nyaami lesdi maako, non boo lesdi Ook, laamiiɗo Baasan. Kamɓe ngonno laamiiɓe Amoori'en ɗiɗo, jooɗinooɓe haa gaɗa Urdun.

⁴⁸Ɓe nyaami lesdi man diga berniwol Aro'er haa sera waadiwol Arnon, haa yotti hooseere Siyona, waato Hermoon,

⁴⁹non boo ladde haa gaɗa Urdun haa yotti Maayo Araba les diirtorɗe hooseere Pisiga.