Read Fulfulde Tooktaaki Tawreeta 6 Bible Online

Tooktaaki Tawreeta 6 - Fulfulde bible

Tooktaaki Tawreeta 6

¹“Ndaa umrooje e farillaaji e kiitaaji fuu ɗum Jawmiraawo, Allah mooɗon umri yam ekkitingo on. Ɗowtane ɗum nder lesdi ndi on ɓadake nastugo ngam maron ɗum.

²Kule Jawmiraawo, Allah mooɗon balɗe mon fuu, onon e danygol mon, kakkilane farillaaji maako fuu e umrooje maako fuu ɗum umranmi on, ngam haa balɗe mon njuuta ton.

³Nane ɗum, onon Isra'iila'en, kakkilane ɗum. Nden kam on keɓan hayru, on ɗuuɗan masin nder lesdi keewndi kosam e njumri, bana Jawmiraawo, Allah kaakiraaɓe mooɗon wi'i on.

⁴Nan, ummaatoore Isra'iila, Jawmiraawo Allah meeɗen woni Jawmiraawo feere muuɗum.

⁵Yiɗ Jawmiraawo, Allah maaɗa bee ɓernde ma fuu, bee yoŋki ma fuu e bee semmbe ma fuu.

⁶Bolle ɗe'e ɗe umranmaami hannde, jaɓ ɗe nder ɓernde ma.

⁷Ekkitin ɗe ɓikkoy ma, wolwu ɗe koo a ɗon jooɗi haa saare ma, koo a ɗon yaha dow laawol, koo a ɗon waalo, koo a ɗon ummo.

⁸Haɓɓu ɗe bana alaama haa juŋngo ma, ɗe laato bana maandorde haa tiinde ma.

⁹Winndu ɗe dow leɗɗe darduɗe haa dammuɗe cuuɗi mon e dow pareeje berniwol mooɗon.”

¹⁰Saa'i Jawmiraawo, Allah mooɗon nastinta on haa lesdi ndi o hunani kaakiraaɓe mon Ibrahiima e Isiyaaku e Yaakubu o hokkan on ɗum, on tawan ton berniiji mawɗi booɗɗi ɗi on nyiɓaay

¹¹e cuuɗi maaji keewi kuuje booɗɗe ɗe on nastinaay ton e ɓulli ɗi on ngasaay e gese inabooje e jaytunje ɗe on njubaaki, on nyaaman haa on kaara,

¹²nden kam, ndeente! Taa on ngejjita Jawmiraawo mo wurtini on njeyaaŋgu nder lesdi Misra.

¹³Kule Jawmiraawo, Allah mooɗon! Njaggane mo, kunore bee innde maako tan!

¹⁴Taa tokke labbi goɗɗi, ɗi ummaatooje taarotooɗe on ndewata.

¹⁵Ngam Jawmiraawo, Allah mooɗon gonɗo caka mooɗon, o Allah mo yiɗaa on tokko ɗowanteeɗo feere sam[8]. Kakkile ngam taa on tikkina mo, nden o nattina on fuu diga lesdi.

¹⁶Taa poonde Jawmiraawo, Allah mooɗon, bana on poondirino mo haa Massa.

¹⁷Kakkilane umrooje Jawmiraawo, Allah mooɗon e seedamkuuji maako e farillaaji maako ɗum o umri on.

¹⁸Mbaɗe ko wooɗi, ko fottani Jawmiraawo. Nden kam on keɓan hayru, on maran lesdi mboondi ndi o hunani kaakiraaɓe mooɗon o hokkan on ɗum,

¹⁹on ndiiwan konne'en mon yeeso mooɗon fuu, bana Jawmiraawo wi'i on.

²⁰“Nder nyalɗe garanɗe, ɓikkoy mooɗon ƴaman on: Ngam ɗume Jawmiraawo, Allah meeɗen umri on seedamkuuji e farillaaji e kiitaaji ɗi'i fuu?

²¹Nden njaabe koy: Min laatino maccuɓe Firawna haa lesdi Misra, ammaa Jawmiraawo wurtini min lesdi Misra bee juŋngo mum semmbiɗŋgo.

²²Min ngi'i no Jawmiraawo waari alaamaaji e kaayeefiiji mawɗi naawɗi haa Misra, dow Firawna e saare mum fuu.

²³O wurtini min Misra haa o wadda min haa ɗo, o hokka min lesdi ndi'i, bana o hunani kaakiraaɓe meeɗen.

²⁴Jawmiraawo, Allah meeɗen umri en en ɗowtano farillaaji ɗi'i fuu, ngam en kula Jawmiraawo, Allah meeɗen. Nden kam o hokkan en hayru nyalɗe men fuu, o aynan ngeendam meeɗen, bana no ngonɗen hannde.

²⁵En laatoto adili'en yeeso Jawmiraawo, Allah meeɗen, to en kakkilani umrooje maako, to en ɗowtanake ɗe bana no o umri en.”