Read Fulfulde Tooktaaki Tawreeta 8 Bible Online

Tooktaaki Tawreeta 8 - Fulfulde bible

Tooktaaki Tawreeta 8

¹“Kakkilane umrooje fuu ɗe umranmi on hannde, ɗowtane ɗe, ngam haa on ngeeɗa, on ɗuuɗa, on nasta haa lesdi ndi Jawmiraawo hunani kaakiraaɓe mooɗon, on mara ndi.

²Ciftore laawol ngol Jawmiraawo, Allah mooɗon ɗowri on dow muuɗum duuɓi cappanɗe nayi nder ladde fuu, o leesni on ngam foondugo e laarugo ko woni nder ɓerɗe mooɗon, ngam laarugo on ɗowtanto umrooje maako na malla on ɗowtantaako ɗe?

³O leesni on, o nastini on nder weelo, nden o nyaamni on mannu[9] ndu onon e baabiraaɓe mooɗon on meeɗaayno anndugo. Ngam bee maajum o anndiniri on: Neɗɗo yeeɗirtaa bee nyaamdu tan, ammaa bee wolde nde Allah wolwi fuu.

⁴Duuɓi cappanɗe nayi go fuu, limce mon kiiɗaay, kosɗe mon uppaay.

⁵Paame booɗɗum no Jawmiraawo, Allah mooɗon yiɗi eltugo on bana baaba eltirta ɓiyum.

⁶Ngam maajum ɗowtane umrooje Jawmiraawo, Allah mooɗon: Tokke laabi maako, kule mo.

⁷Ngam Jawmiraawo, Allah mooɗon ɗon yahra on haa lesdi mboondi, marndi maaje e ceeɓooje e ndiyamji luggeeŋga ɓulanɗi nder waadiiji e dow kooseeje.

⁸Ndi heewi alkamaari e sa'iiruuri e inabooje e ibbe e rummaanooje e jaytunje e njumri.

⁹Lesdi marndi risku, weelo walaa ton, on cooyataa koo ɗume haa maari. Kaa'e lesdi man keewi njamndi ɓaleeri, on ngasan njamndi mboɗeeri nder kooseeje maari.

¹⁰On nyaaman, on kaaran, on ngettan Jawmiraawo, Allah mooɗon ngam lesdi mboondi ndi o hokki on.”

¹¹“Kakkile, ngam taa on ngejjita Jawmiraawo, Allah mooɗon! Taa acce ɗowtanaago umrooje maako e kiitaaji maako e farillaaji maako ɗum umranmi on hannde.

¹²To on nyaami, on kaari, on nyiɓi cuuɗi booɗɗi, on njooɗi ton,

¹³na'i e dammooji e cardi e kaŋŋeeri e marle mooɗon fuu ɓesdake,

¹⁴nden ɓerɗe mon mawnito, on ngejjita Jawmiraawo, Allah mooɗon gurtinɗo on njeyaaŋgu haa Misra.

¹⁵Kaŋko ɗowi on nder ladde mawnde hulniinde nde boɗɗe mbarooje e jahe ngoni e mum. Walaa ndiyam nder lesdi man, ammaa kaŋko o ilni ndiyam diga tapaare saatunde, haa on njara.

¹⁶Kaŋko nyaamni on mannu nder ladde man, nyaamdu ndu baabiraaɓe mooɗon anndaano, o leesni on, o foondi on ngam woonango on nder garanɗum.

¹⁷Taa nume on ndiskiri bee baawɗe e semmbe mon!

¹⁸Ciftore Jawmiraawo, Allah mooɗon, ngam kaŋko riskini on bee hokkugo on semmbe. O waɗi ɗum ngam alkawal ngal o haɓɓi bee kaakiraaɓe mooɗon bee hunayeere haa wargo hannde.

¹⁹To on ngejjiti Jawmiraawo, Allah mooɗon, to on tokkake ɗowanteeɓe woɗɓe, on teddini ɓe, on njagganake ɓe, nden kam on kalkan fakat! Mi ɗon seedo on ɗum hannde.

²⁰To on nananaay Jawmiraawo, Allah mooɗon, o nattinan on bana o nattinirta ummaatooje go yeeso mooɗon.”