Read Fulfulde Yuhanna 10 Bible Online

Yuhanna 10 - Fulfulde bible

Yuhanna 10

¹Yeesu waɗi balndol ngo'ol, wi'i: “Gooŋga mi wi'ata on: Koo moy mo nastiraay waalde baali gal dammugal, ammaa o diwi kowaagol, o nasti, goɗɗo oo gujjo, jaɓtoowo.

²Ammaa mo nastiri dammugal, kaŋko woni gaynaako baali.

³Aynoowo dammugal maɓɓitanan mo, baali boo nanan sawtu maako. O ewnoto baali maako bee inɗe maaji, o yahran ɗi yaasi.

⁴To o wurtini baali ɗi o mari fuu yaasi, o ardoto ɗi, baali boo tokkoto mo, ngam ɗi anndi sawtu maako.

⁵Ammaa fakat ɗi tokkataako mo ɗi anndaa, ɗi ndoggan daayiiɗum bee maako ngam ɗi anndaa sawtu jananɓe.”

⁶Yeesu wolwani ɓe balndol ngo'ol, ammaa ɓe paamaay dow ɗume o wolwani ɓe.

⁷Fahin Yeesu wi'i: “Gooŋga mi wi'ata on: Min, mi dammugal waalde baali.

⁸Aartuɓe yam wargo fuu, ɓe wuyɓe, jaɓtooɓe, ammaa baali nananaay ɓe.

⁹Min, mi dammugal, to goɗɗo nastiri bee am, hisan. O nastan, o wurtoto, o heɓan nyaamdu.

¹⁰Gujjo ɗon wara ngam wujjugo e mbarugo e halkugo. Min mi wari ngam haa yimɓe keɓa ngeendam, ɓe keɓa ɗam bee feecaare.

¹¹Min, mi gaynaako booɗɗo. Gaynaako booɗɗo ɗon hokka yoŋki muuɗum ngam baali mum.

¹²Ammaa duroowo ngam ngeenaari, mo laataaki gaynaako, mo maraay baali, to o yi'i saafaandu ɗon wara, o wudinan baali, o doggan, o acca ɗi. Nden saafaandu hippoto baali, saŋkita ɗi.

¹³O doggan ngam o duroowo haa o heɓa ngeenaari tan, walaa ko yaali mo bee baali.

¹⁴Min, mi gaynaako booɗɗo, mi anndi baali am, baali am boo anndi yam.

¹⁵Bana no Baabiraawo anndiri yam, bana non min boo mi anndiri mo. Mi hokkan yoŋki am ngam baali am.

¹⁶Mi woodi baali goɗɗi, ɗi ngonaay nder waalde nde'e. Sey mi wadda ɗi kanji boo, ɗi nana sawtu am, ɗi laato tokkere woore, bee gaynaako gooto.

¹⁷Baabiraawo yiɗi yam, ngam mi hokkan yoŋki am, nden mi hoosita ki fahin.

¹⁸Walaa mo hoosata yoŋki am, ammaa min hokkata ki bee hoore am. Mi woodi baawɗe hokkugo ki, mi woodi baawɗe hoosititgo ki boo. Kanjum woni umroore nde Baabiraawo am hokki yam.”

¹⁹Ngam daliila bolle ɗe'e, Yahuudu'en cennditi hakkunde muuɗum'en fahin.

²⁰Ɗuuɗɓe caka maɓɓe mbi'i: “O woodi ginnawol, o ginnaaɗo, ngam ɗume on nanata mo?”

²¹Woɗɓe feere mbi'i: “Marɗo ginnawol wolwataa bana nii. Kadi ginnawol wumtinan gite wumɓe na?”

²²Saa'i juulde cenki haykaliiru haa Urusaliima waɗi, ɗum dabbunde.

²³Yeesu ɗonno waanca nder haykaliiru les daŋki Suleymaanu.

²⁴Yahuudu'en ɗonno taari mo, ɓe mbi'i mo: “Haa ndey ittata saklere amin? To an a Almasiihu, wi' min ɗum laaɓɗum.”

²⁵Yeesu jaabi ɓe: “Mi wi'i on ɗum diga ɓooyma, ammaa on nuɗɗinaay ɗum. Kuuɗe ɗe mi ɗon huuwa bee baawɗe Baabiraawo am, ɗon ceedano yam.

²⁶Ammaa on nuɗɗintaa, ngam on ngonaay nder baali am.

²⁷Baali am ɗon nana sawtu am, mi anndi ɗi, ɗi ɗon tokko yam.

²⁸Mi hokkan ɗi ngeendam nduumiiɗam, ɗi kalkataa sam. Walaa mo jaɓtata ɗi diga juŋngo am.

²⁹Baabiraawo am mo hokki yam ɗi, ɓuri koo moy fuu maŋngu, walaa mo jaɓtata ɗi diga juŋngo Baabiraawo am.

³⁰Min e Baabiraawo, min gootum.”

³¹Yahuudu'en koo'i kaa'e fahin ngam fiɗugo mo.

³²Ammaa Yeesu wi'i ɓe: “Mi huuwi kuuɗe booɗɗe ɗuuɗɗe yeeso mooɗon bee baawɗe Baabiraawo am. Ngam daliila kuugal ngale nder maaje on ngiɗi fiɗugo yam?”

³³Yahuudu'en njaabi mo: “Naa ngam daliila kuuɗe booɗɗe min piɗata ma, ammaa ngam a wolwi kalluka dow Allah. An a neɗɗo, ammaa a waɗi hoore maaɗa a Allah.”

³⁴Yeesu jaabi ɓe: “Naa ɗum binndaaɗum nder tawreeta mooɗon, Allah wi'i: Onon on ɗowanteeɓe?

³⁵En anndi ko Deftere wi'i sottintaake. Allah ewni nanɓe wolde man ɓe ɗowanteeɓe.

³⁶Ammaa min, cenaaɗo Baabiraawo, nelaaɗo nder duniyaaru, on mbi'i: A ɗon wolwa kalluka dow Allah, ngam mi wi'i mi Ɓiɗɗo Allah?

³⁷To ko mi huuwi laataaki kuuɗe Baabiraawo am, nden kam taa nuɗɗineeɗam.

³⁸Ammaa to ɗum kuuɗe maako fakat, koo to on nuɗɗinaay yam min, nuɗɗine kuuɗe ɗe'e, ngam haa on annda e on paama Baabiraawo ɗon nder am, min boo mi ɗon nder Baabiraawo.”

³⁹Ɓe ɗaɓɓi naŋngugo mo fahin, ammaa o teetori ɓe.

⁴⁰Fahin Yeesu dilli gaɗa maayo Urdun, haa nokkuure nde Yuhanna aartuno waɗugo baptisma, o jooɗi ton.

⁴¹Yimɓe ɗuuɗɓe ngari haa maako. Ɓe mbi'i: “Yuhanna waɗaay kaayeefiwol koo ngole, ammaa ko o wolwi dow gorko oo fuu ɗum gooŋga.”

⁴²Ɗuuɗɓe wonɓe ton nuɗɗini mo.