Read Fulfulde Yuhanna 12 Bible Online

Yuhanna 12 - Fulfulde bible

Yuhanna 12

¹Lutti balɗe joweego haa juulde Paska waɗa. Yeesu yehi Baytaniya, wuro Laazarus mo Yeesu ummitinno diga maayde.

²Ɓe mbaɗani mo nyaamduuji haa ton. Marta ɗonno hokka ɓe nyaamdu, Laazarus ɗonno caka nyaamdanɓe bee Yeesu.

³Nden Mariyama hoo'i uurdi nardi laaɓndi caɗndi masin baakin reeta liitir, rufi ndi dow kosɗe Yeesu, nden o yiggi ɗe bee gaasa hoore maako. Suudu fuu heewi uureeŋga uurdi maajum.

⁴Yahuuda Iskariyot, gooto nder pukara'en Yeesu, zammbotooɗo mo wi'i:

⁵“Koni ɓe coorraay uurdi ndi'i baakin ceede cardi teemeɗɗe tati ngam ɓe ndokka talaka'en?”

⁶O wi'i ɗum naa ngam o enɗi talaka'en, ammaa ngam o gujjo. Kaŋko woni jogoowo booro ceede, o ɗon wujja ceede ɗe ɓe kalfini mo.

⁷Ammaa Yeesu wi'i: “Acce debbo oo, o aarti waɗugo ɗum ngam nyalaade uweeki am.

⁸Talaka'en ngondan bee mooɗon foroy, ammaa min mi wondataa bee mooɗon foroy.”

⁹Yahuudu'en ɗuuɗɓe nani Yeesu ɗon haa Baytaniya. Ɓe njehi ton, naa ngam daliila Yeesu tan, ammaa ngam laarugo Laazarus mo Yeesu ummitinno diga maayde boo.

¹⁰Mawɓe liman'en mbaɗi anniya mbarugo Laazarus boo,

¹¹ngam daliila maako, Yahuudu'en ɗuuɗɓe acci ɓe, nuɗɗini Yeesu.

¹²Jaŋngo man, mooɓre yimɓe warɓe ngam juulde Paska go nani Yeesu ɗon wara haa Urusaliima.

¹³Ɓe koo'i lice dibinooje, ɓe njehi fottoygo bee maako, ɓe ɗon ngooka bee sawtu: “Hosanna! Barka laatano laamiiɗo Isra'iila, garanɗo bee innde Jawmiraawo!”

¹⁴Yeesu tawi wamnde molde, wa'i nde, bana ko winnda nder Deftere:

¹⁵“Taa hultor, an berniwol Siyona! Ndaa, laamiiɗo maaɗa ɗon wara, o ɗon wa'i wamnde molde.”

¹⁶Saa'i man pukara'en maako paamaay ɗum tawon. Ammaa nde Yeesu teddinaama, ɓe ciftori, ɗum binndaaɗum dow maako nder Deftere, kanjum ɓe ngaɗani mo ɗum.

¹⁷Saa'i Yeesu ewni Laazarus, wurtinno mo yenaande, ummitinno mo diga maayde, yimɓe ɗuuɗɓe ɗonno ton. Kamɓe ɓe tokki seedaago.

¹⁸Ngam maajum mooɓre ɗuuɗnde wari fottugo bee Yeesu, ngam ɓe nani haala kaayeefiwol ngol o waɗno.

¹⁹Nden Farisa'en mbi'mbi'tiri hakkunde muuɗum'en: “Ndaa, ko en mbaɗi fuu nafaay koo ɗume, ngam duniyaaru fuu ɗon tokko mo.”

²⁰Yunaniŋke'en[14] woɗɓe ɗonno caka warɓe haa Urusaliima ngam sujidango Allah saa'i juulde.

²¹Ɓe ngari haa Filip mo wuro muuɗum Baytisayda nder lesdi Galiili, ɓe mbi'i mo: “Moodibbo, min ngiɗi laarugo Yeesu.”

²²Filip yehi yecci ɗum Andire, nden ɓe ɗiɗo fuu ɓe njehi, ɓe ngecci ɗum Yeesu.

²³Yeesu jaabi ɓe: “Saa'i waɗi jonta, haa Ɓii-neɗɗo heɓa tedduŋgal.

²⁴Gooŋga mi wi'ata on: To wabbere alkamaari uwaaka nder lesdi, to nde waataay, nde jooɗoto feere maare. Ammaa to nde waati, nde riman gabbe ɗuuɗɗe.

²⁵Koo moy yiɗi yoŋki muuɗum, majjinan ki. Ammaa koo moy wanyi yoŋki muuɗum nder duniyaaru ndu'u, aynan ki haa foroy.

²⁶Sey kuuwanoowo yam fuu tokko yam, ngam haa o wona haa ngonmi. Koo moy laatake kuuwanoowo yam, Baabiraawo am teddinan mo.”

²⁷Yeesu wi'i: “Jonta ɓernde am sakli. Ɗume mbi'anmi? Mi wi'a Baabiraawo hisnammi torra saa'iire nde'e na? Ammaa fakat mi wari ngam mi torro nder saa'iire nde'e.

²⁸Baabiraawo, teddin innde ma.” Nden sawtu iwi diga asama, wi'i: “Mi teddini nde, mi teddinan nde fahin.”

²⁹Yimɓe wonɓe ton nani sawtu maajum, ɓe mbi'i: “Ɗum riggaaŋgo.” Woɗɓe mbi'i: “Malaa'ikaajo wolwani mo.”

³⁰Ammaa Yeesu wi'i ɓe: “Sawtu oo waraay ngam am, ammaa ɗum wari ngam mooɗon.

³¹Jonta woni saa'iire kiita duniyaaru ndu'u. Jonta laamiiɗo duniyaaru ndu wudinaama haa yaasi.

³²Min, to mi ɓaŋgtaama diga lesdi, mi fooɗan yimɓe fuu haa am.”

³³Bee bolle ɗe'e o tinndini irin maayde nde o tammi maayugo.

³⁴Yimɓe mbi'i mo: “Min nani nder tawreeta no Almasiihu duumoto. Kadi noy a wi'rata: Haani Ɓii-neɗɗo ɓaŋgte? Moy woni Ɓii-neɗɗo man?”

³⁵Yeesu jaabi ɓe: “Annoora ɗon wondi bee mooɗon wakkati seɗɗa tawon. Ngance saa'i on ngoodi annoora, ngam taa nyiɓre juha on, ngam jahanɗo nder nyiɓre anndaa haa o yahata.

³⁶Nde annoora ɗon wondi bee mooɗon, nuɗɗine annoora, ngam haa on laato ɓiɓɓe annoora.” Ɓaawo Yeesu wolwi bolle ɗe'e, o dilli, o suuɗi ɓe.

³⁷Koo nde Yeesu waɗi kaayeefiiji ɗuuɗɗi yeeso maɓɓe, ɓe nuɗɗinaay mo,

³⁸ngam haa annabaaku ngu Esaaya waɗi hiɓɓa, o wi'no: “Jawmiraawo, moy nuɗɗini ko min mbolwi? Haa moy Jawmiraawo waŋgini baawɗe muuɗum?”

³⁹Ɓe mbaawaay nuɗɗingo, ngam Esaaya wi'i fahin:

⁴⁰“Allah wumni ɓe, saatini ɓerɗe maɓɓe, ngam taa ɓe ngi'a bee gite maɓɓe, taa ɓerɗe maɓɓe paama, taa ɓe lorto, mi yamɗitina ɓe.”

⁴¹Esaaya wi'i non ngam o yi'i tedduŋgal Yeesu, o wolwi dow maako.

⁴²Koo nder mawɓe Yahuudu'en boo, ɗuuɗɓe nuɗɗini Yeesu. Ammaa ɓe mbaŋginaay ɗum, ngam daliila Farisa'en, ngam taa ɓe ngurtina ɓe suudu dewal Yahuudu'en.

⁴³Ngam ɓe ɓuri yiɗugo yerduye yimɓe dow yerduye Allah.

⁴⁴Yeesu hooli bee sawtu, wi'i: “Koo moy nuɗɗini yam, naa min tan o nuɗɗini, ammaa o nuɗɗini nelɗo yam.

⁴⁵Koo moy yi'i yam, yi'i nelɗo yam.

⁴⁶Min, mi annoora, mi wari nder duniyaaru, ngam taa nuɗɗinɗo yam fuu jooɗo nder nyiɓre.

⁴⁷To goɗɗo nani bolle am, ɗowtanaaki ɗe, naa min hiitoto mo, ngam mi waraay hiitaago duniyaaru, ammaa ngam hisnugo ndu.

⁴⁸Koo moy sali yam, jaɓaay bolle am, o kiiteteeɗo. Bolle ɗe mi wolwi, kanje kiitoto mo nyalaade darŋgal.

⁴⁹Ngam mi wolwaay bee ngiɗa am, ammaa Baabiraawo nelɗo yam, kaŋko umri yam ko mi wolwata, ko mi anndinta yimɓe.

⁵⁰Mi anndi umroore maako, ɗum ngeendam nduumiiɗam. Walaa ko mi wolwata, sey ko Baabiraawo umri yam wolwugo.”