Read Fulfulde Yuhanna 16 Bible Online

Yuhanna 16 - Fulfulde bible

Yuhanna 16

¹“Mi wolwani on ɗum bana nii ngam taa on acca nuɗɗingo yam.

²Ɓe ngurtinan on cuuɗi dewal Yahuudu'en. Saa'iire waran, nde koo moy mbari goɗɗo mooɗon tammi o waɗi ko Allah yiɗi.

³Ɓe mbaɗan ɗum ngam ɓe anndaa Baabiraawo, ɓe anndaa yam min boo.

⁴Ammaa mi wolwani on bana nii ngam to saa'i man waɗi, on ciftora mi biiɗo on ɗum.” Mi wi'aayno on ɗum diga fuɗɗam, ngam mi ɗonno wondi bee mooɗon.

⁵Jonta, mi ɗon dilla haa nelɗo yam, walaa koo gooto mooɗon ƴami yam: Toy njahataa?

⁶Ammaa jonta ɓerɗe mon cunake ngam mi wi'i on ɗum.

⁷Ammaa gooŋga mi wi'ata on: Ɗum ɓuran nafugo on to mi dilli, ngam to mi dillaay, Balloowo go warataa haa mooɗon. To mi dilli, mi nelan mo haa mooɗon.

⁸Kaŋko, to o wari, o waŋginan boofi yimɓe duniyaaru dow haala hakke e adilaaku e kiita.

⁹Ɓe ɗon mboofa dow haala hakke, ngam ɓe nuɗɗinaay yam.

¹⁰Ɓe ɗon mboofa dow haala adilaaku, ngam mi ɗon dilla haa Baabiraawo, on meetataa yi'ugo yam.

¹¹Ɓe ɗon mboofa dow haala kiita boo, ngam laamiiɗo duniyaaru ndu hiitaama.

¹²“Kuuje goɗɗe ɗuuɗɗe luttani yam wi'ugo on, ammaa ɗum ɓuran faamu mooɗon tawon.

¹³To Ruuhu mo gooŋga wari, o ɗowan on nder gooŋga fuu. Ngam o wolwataa ngiɗa maako, ammaa o wi'an on ko o nani, ko tammi wargo fuu.

¹⁴Kaŋko o teddintam, ngam o yeccan on ko o heɓi haa am.

¹⁵Ko Baabiraawo mari fuu, min mari ɗum. Ngam maajum mbi'mi: Ruuhu yeccan on ko o nani haa am.”

¹⁶Yeesu wi'i: “Yeeso seɗɗa on ngi'ataa yam, ɓaawoɗon seɗɗa on ngi'atam fahin.”

¹⁷Woɗɓe caka pukara'en maako ƴamƴamtiri: “Ɗume o yiɗi wi'go en: Yeeso seɗɗa on ngi'ataa yam, ɓaawoɗon seɗɗa on ngi'atam fahin. Kadiboo: Ngam mi ɗon dilla haa Baabiraawo?

¹⁸Ɗume ɗum yiɗi wi'go: Yeeso seɗɗa? En paamataa ko o yiɗi wi'ugo.”

¹⁹Yeesu anndi ɓe ngiɗi ƴamugo mo, o wi'i ɓe: “Mi wi'i on: Yeeso seɗɗa on ngi'ataa yam, ɓaawoɗon seɗɗa on ngi'atam fahin. Dow maajum on ɗon ƴamƴamtira na?

²⁰Gooŋga mi wi'ata on: On mboyan, on cunoto, ammaa duniyaaru seyoto. On cunoto, ammaa suno mooɗon laatoto seyo.

²¹To debbo reeduujo ɓadake ɓesnugo, o sunoto ngam saa'i torra warani mo. Ammaa to o ɓesni, o yejjitan bone man ngam daliila seyo, ngam o danyi neɗɗo haa duniyaaru.

²²Bana non onon boo, on cunake jonta, ammaa mi yi'an on fahin. Nden kam ɓerɗe mooɗon ceyoto, walaa mo ittata seyo mooɗon sam.

²³To nyalaade man yottake, on ƴamataa yam koo ɗume. Gooŋga mi wi'ata on: Koo ɗume on tori Baabiraawo bee innde am fuu, o hokkan on ɗum.

²⁴Haa wargo hannde on toraaki koo ɗume bee innde am. Tore, on keɓan ko on tori, ngam haa seyo mooɗon heewa.”

²⁵Yeesu tokki wi'ugo: “Mi wolwani on kuuje ɗe'e fuu bee balndi. Saa'iire waran nde mi wolwantaa on bee balndi fahin, ammaa mi wolwanan on haala Baabiraawo bee laaɓɗum.

²⁶To nyalaade man yottake, on toroto Baabiraawo bee innde am. Mi wi'aay on, mi toroto Baabiraawo ngam mooɗon.

²⁷Baabiraawo bee hoore mum yiɗi on, ngam on ngiɗi yam, on nuɗɗini mi iwi haa Allah.

²⁸Mi iwi haa Baabiraawo, mi wari nder duniyaaru. Jonta mi accan duniyaaru, mi hootan haa Baabiraawo.”

²⁹Pukara'en maako mbi'i mo: “Ndaa, jonta a ɗon wolwa laaɓɗum, bilaa balndi.

³⁰Jonta min paami a anndi koo ɗume fuu. A walaa haaje goɗɗo ƴame, a anndi ko o yiɗi ƴamugo. Ngam maajum min nuɗɗini a iwi haa Allah.”

³¹Yeesu jaabi ɓe: “Jonta on nuɗɗini na?

³²Saa'i waran, koo jonta maa ɗum waɗi, on fuu on caŋkititto, koo moy fuu haa saare muuɗum, on accatam min feere am. Ammaa mi laataaki feere am, ngam Baabiraawo ɗon wondi bee am.

³³Mi wolwani on ɗum ngam haa on keɓa salaaman nder am. On njaran bone nder duniyaaru, ammaa tiɗɗine ɓerɗe mooɗon, min mi jaalake duniyaaru.”