Read Fulfulde Yuhanna 17 Bible Online

Yuhanna 17 - Fulfulde bible

Yuhanna 17

¹Nde Yeesu timmini bolle ɗe'e fuu, o tijji asama, o wi'i: “Yaa Baabiraawo, saa'i am waɗi. Waŋgin tedduŋgal am, min Ɓiɗɗo maaɗa, ngam haa Ɓiɗɗo boo waŋgina tedduŋgal maaɗa.

²A hokki yam baawɗe dow yimɓe fuu, ngam mi hokka ngeendam nduumiiɗam haa yimɓe ɓe a hokki yam.

³Ndaa ko woni ngeendam nduumiiɗam: Ɓe annda an woni Allah gooto, gooŋgaajo, ɓe annda boo Yeesu Almasiihu, nelaaɗo ma.

⁴Mi waŋgini tedduŋgal maaɗa nder duniyaaru, mi timmitini kuugal ngal a hokki yam.

⁵Jonta, yaa Baabiraawo, hokkam tedduŋgal haa yeeso ma, tedduŋgal ngal mi marno yaake mi ɗonno wondi bee maaɗa, diga duniyaaru tagaaka tawon.

⁶Mi waŋgini innde ma haa yimɓe ɓe a wurtini nder duniyaaru, a hokki yam. An mari ɓe, a hokki yam ɓe, ɓe ɗowtani wolde ma.

⁷Jonta, ɓe anndi ko a hokki yam fuu iwi haa maaɗa.

⁸Ngam mi wolwani ɓe bolle ɗe a wolwani yam, ɓe njaɓi ɗe. Ɓe annditi fakat mi iwi haa maaɗa, ɓe nuɗɗini an neli yam.

⁹Mi ɗon toro ma ngam maɓɓe. Mi torataako ngam duniyaaru, ammaa mi ɗon toro ma ngam yimɓe ɓe a hokki yam, ngam ɓe yimɓe maaɗa.

¹⁰Ko marmi fuu, an jeyi, ko marɗa fuu boo, min jeyi, mi teddinaama nder maɓɓe.

¹¹Mi jooɗataako nder duniyaaru fahin, ammaa kamɓe ɓe ɗon njooɗi nder maaru. Jonta mi ɗon yaha haa maaɗa. Yaa Baabiraawo Ceniiɗo, a waŋginani yam baawɗe innde maaɗa, aynu ɓe bee baawɗe man, ngam haa ɓe laato gootum, bana min bee ma en gootum.

¹²Yaake mi ɗonno wondi bee maɓɓe, mi faddi ɓe bee baawɗe innde ma nde a hokki yam. Mi ayni ɓe, walaa koo gooto maɓɓe halki, sonaa mo majjini hoore muuɗum, ngam haa ko winnda nder Deftere gooŋɗa.

¹³Jonta mi ɗon yaha haa maaɗa, mi ɗon wi'a ɗum fuu diga mi ɗon nder duniyaaru tawon, ngam haa ɓerɗe maɓɓe keewa seyo am timmididŋgo.

¹⁴Mi anndini ɓe wolde ma. Duniyaaru wanyi ɓe, ngam ɓe laataaki ɓe duniyaaru, bana min boo mi laataaki mo duniyaaru.

¹⁵Mi torataako ma ngam a wurtina ɓe duniyaaru, ammaa a fadda ɓe diga Kalluɗo[20].

¹⁶Ɓe laataaki ɓe duniyaaru, bana min boo mi laataaki mo duniyaaru.

¹⁷Wolde maaɗa woni gooŋga. Senu ɓe bee gooŋga man.

¹⁸Bana a neldiri yam nder duniyaaru, bana non min boo mi neldi ɓe haa duniyaaru.

¹⁹Mi lii'ani ma yoŋki am ngam maɓɓe, ngam haa ɓe laato lii'anaaɓe ma daliila gooŋga.

²⁰Mi ɗon toro ma naa ngam maɓɓe tan, ammaa mi ɗon toro ma boo ngam nuɗɗinanɓe yam daliila waazu maɓɓe fuu,

²¹ngam haa ɓe fuu ɓe laato gootum. Bana an, Baabiraawo, a ɗon nder kawtal bee am, min boo mi ɗon nder kawtal bee maaɗa. Kamɓe boo ɓe ngona nder kawtal bee meeɗen, ngam haa duniyaaru nuɗɗina an neli yam.

²²Mi hokki ɓe tedduŋgal ngal a hokki yam, ngam haa ɓe laato gootum, bana an bee am en laati gootum.

²³Min mi ɗon nder kawtal bee maɓɓe, an boo a ɗon nder kawtal bee am, ngam haa ɓe laato gootum fakat, ngam haa duniyaaru annda an neli yam, a yiɗi ɓe bana a yiɗiri yam.

²⁴Yaa Baabiraawo, yimɓe ɓe a hokki yam, mi yiɗi ɓe ngonda bee am haa ngonanmi, ngam haa ɓe ngi'a tedduŋgal am ngal a hokki yam, ngam a yiɗi yam diga duniyaaru tagaakano tawon.

²⁵Yaa Baabiraawo, adiliijo, duniyaaru anndaa ma, ammaa min mi anndi ma, yimɓe ɓe boo anndi an neli yam.

²⁶Mi anndini ɓe innde ma, mi tokkoto anndingo ɓe boo, ngam haa yiide nde a yiɗiri yam wona nder maɓɓe, min boo mi wona nder kawtal bee maɓɓe.”